Ermənistanın siyasi rəhbərliyinin gözü önündə belə bir rəzil hadisə baş verir və buna heç bir reaksiya verilmir. Deməli, Ermənistan hakimiyyəti, hökuməti, dövləti bu çirkin əməlin müəllifidir. Amma onlar unutmamalıdırlar ki, bu gün Azərbaycan Bayrağı harada dalğalanır. Bu gün Azərbaycan Bayrağı Qarabağda dalğalanır. Ağdamda, Füzulidə, Cəbrayılda, Qubadlıda, Zəngilanda, Kəlbəcərdə, Laçında, Şuşada, Hadrutda, Talışda, Suqovuşanda və neçə-neçə kənddə, yüzlərlə kənddə Azərbaycan Bayrağı dalğalanır.
Azərbaycan Prezidenti İlham Əliyevin AzTV-yə müsahibəsindən
Salyan şəhəri, 18 aprel 2023-cü il
Son zamanlar ölkəmizdə və regionda baş verən hadisələr, ictimai-siyasi proseslər sübut edir ki, Prezident İlham Əliyev nəinki “nəyi, nə zaman, necə etməyi”, hətta, “nəyi, nə zaman, necə deməyi” də yaxşı bilir. Dövlət başçımızın Salyanda Azərbaycan Televiziyasına verdiyi müsahibəni də bu arqumentimizin təsdiqi kimi qəbul edə bilərik.
Əslində, həmin müsahibədə ayrıca yazı hazırlamaq üçün ondan çox mövzu var. İqtisadi uğurlar, sosial layihələr, ordu quruculuğu, işğaldan azad edilmiş ərazilərin bərpası, beynəlxalq aləmlə əməkdaşlığımız, Ermənistanın sülh danışıqlarından yayınması və bu kimi digər məsələlərin hər biri ayrıca şərh olunası mövzulardır. Ancaq mən həmin müsahibədəki bayraq məsələsinə toxunmaq istəyirəm. Çünki son zamanlar haylar elə səviyyədə həyasızlaşıblar ki, hətta bizim dövlət bayrağımıza əl qaldırmaq kimi şərəfsizliyə də əl atdılar.
Dövlət başçımız xatırlatdı ki, biz 2020-ci ilin payızında düşmənin başını əzərək möhtəşəm Qələbə əldə etmişik. Ancaq Ermənistanda revanşist qüvvələr yenə baş qaldırır, biz istənilən vəziyyətə hazır olmalıyıq və elə bir ordu yaratmalıyıq ki, dünya miqyasında nümunəvi olsun və ən güclü ordulardan biri olsun: “Bu gün də Azərbaycan Ordusu güclüdür. Biz gücümüzü döyüş meydanında göstərmişik. Biz döyüş meydanında həm Azərbaycan xalqının gücünü, iradəsini, əyilməz ruhunu göstərdik, eyni zamanda, hərbçilərimizin peşəkarlığını göstərdik, öz hərbi potensialımızı göstərdik”.
Ancaq işğala, erməni vəhşiliyinə, barbarlığına baxmayaraq, məhz rəsmi Bakı təklif etmişdir ki, Azərbaycanla Ermənistan arasında sülh müqaviləsi imzalansın və biz məlum beş prinsipi ortaya qoymuşuq. Bunlar beynəlxalq hüququn norma və tələblərinin təməl prinsipləridir. Dövlət başçımız bəyan etmişdi ki, məhz bu prinsiplər əsasında ölkələrin suverenliyi, ərazi bütövlüyü, sərhədlərin toxunulmazlığı və sair üzrə danışıqlar mümkündür və sülh müqaviləsi imzalana bilər.
Məlum olduğu kimi, İkinci Qarabağ müharibəsindən keçən iki il yarım ərzində Ermənistan, onun havadarları və eyni zamanda, ona dəstək verən ölkələr və qüvvələr bizim iradəmizi, qətiyyətimizi, gücümüzü əyani şəkildə görüblər. Azərbaycan dəfələrlə göstərib ki, bu torpaqların sahibləri bizik və heç kimə imkan vermərik ki, bizim ərazimizdə kimsə at oynatsın.
Təəssüf ki, haylar bu həqiqətləri anlaya bilmirlər və ya kimsə onları “anlamağa” qoymur. Əgər elə olmasaydı, ilin-günün bu vaxtında – bütün ölkələrin və beynəlxalq təşkilatların Ermənistana yardım göstərməkdən imtina etdiyi, diaspor təşkilatlarının geriyə çəkildiyi bir zamanada – nümayişkaranə şəkildə Azərbaycan Bayrağına qarşı hörmətsizlik etməzdilər. Dövlət başçımızın fikrincə, bu, erməni hökumətinin növbəti çirkin əməlidir: “Bu, təsadüfən baş vermiş, hansısa bir fərdin əməli deyil. Bu, Ermənistan hökumətinin növbəti çirkin əməlidir. Bunu deməyə əsas verən bir çox səbəblər var. Birincisi, bu hadisəni törədən insanabənzər məxluq Ermənistan hakim dairələrinin yüksəksəviyyəli şəxsləri ilə birbaşa təmasdadır. İkincisi, bu məxluqa heç bir cəza verilmədi, əksinə, Ermənistanda onu qəhrəmanlaşdırırlar”.
Ancaq ermənilər unudurlar ki, bu gün Azərbaycan Bayrağı haralarda dalğalanır. Bu hadisə bizi sarsıda bilməz, bizim iradəmizə heç bir təsir edə bilməz. Dövlət başçımız xəbərdarlıq edir ki, onlar yaxşı fikirləşsinlər.
Yeri gəlmişkən, mən bu sətirlərin müəllifi ermənilərin törətdikləri rəzalətin ertəsi günü İrəvanda Türkiyə bayrağının qaldırılmasını və qardaş ölkənin Dövlət Himninin səsləndirilməsini təmin edən Anadolunun qız yavrularına göndərdiyim “Facebook” təbrikimi də yada salmaq istəyirəm. Yazmışdım: “İrəvanda bir bayrağımızı it dişlədi, qaldıra bilmədik, o biri bayrağımızı sən ucaltdın, Cansu! Xoşbəxt olasan, qızım, bacım, ƏZİZİM! Anadolu türklərinin Qız Qardaşım ifadəsi necə də yerinə düşdü”.
Bəli, Salyanda dövlət başçımıza həmin qız qardaşımızın hünəri barədə də sual verildi (Xatırladım ki, Cansu Bektaşi İrəvanda artıq üç qızıl medal qazanmış və Türkiyə bayrağının üç dəfə qaldırılmasına nail olmuşdur). Fikrimcə, dövlət başçımızın bu məsələyə münasibəti bütün azərbaycanlıların, türklərin və ümumilikdə, Türk dünyasının sonsuz alqışına, təqdirinə səbəb oldu. Cənab Prezident xatırlatdı ki, Mehriban xanım və mən əziz qızlarımız Cansu və Qəmzəni təbrik etdik: Nə qədər gözəl bir hərəkətdir. Ona görə onlar bütün Azərbaycan xalqının sevgisini qazandılar”.
Bu məqamda onu da əlavə edək ki, dövlət başçımız Azərbaycan xalqını sevindirəcək bir hadisənin anonsunu da verdi: “Bu gün mən Neftçala Olimpiya Kompleksinin açılışında olarkən Gənclər və İdman nazirinə tapşırdım ki, bizim qızlarımızı mənim adımdan Azərbaycana dəvət etsin və onlar bizim qonağımız olsunlar... Bir yaramaz bizim bayrağımızı yandırır, ertəsi gün qardaş Türkiyə dövlətinin şanlı bayrağı o düşmənlərin başının üzərində ucaldılır və onlar Türkiyənin Dövlət Himninə ayaq üstə qulaq asmağa məcbur olurlar”.
Fikrimcə, cənab Prezidentin müsahibəsindəki iki arqumenti bu sətirlərin sonunda da təkrar etməyə lüzum var: “Bir gün gözlərini açıb Azərbaycan Bayrağını öz başları üzərində görə bilərlər” və “Bu torpaqların sahibləri bizik və heç kimə imkan vermərik ki, bizim ərazimizdə kimsə at oynatsın”.
Yəni, Qarabağ da, Zəngəzur da Azərbaycandır!
İttifaq MİRZƏBƏYLİ, “Xalq qəzeti”