Milli Məclisin Sədri Sahibə Qafarova Cenevrə şəhərinə işgüzar səfəri çərçivəsində Parlament Sədrlərinin 6-cı Dünya Konfransının Təşkilat Komitəsinin 1-ci iclasında müzakirələrdə çıxış edib.

İclasda bir çox vacib məsələlərə diqqət yetirildiyini, vacib müzakirələr apa­rıldığını bildirən spiker sülh, təhlükəsiz­lik və qanunun aliliyini inkişaf etdirmək üçün parlament diplomatiyasının önə­mini diqqətə çatdırıb. Deyib ki, bu, gələ­cəyə dair düşüncələrimizlə sıx bağlı olan məsələdir. Həmçinin bildirib ki, qanunun aliliyi sülhün və təhlükəsizliyin təmin edil­məsində ilk şərtdir. Bu məsələyə istənilən yanaşmanın əsasında dövlətlərin suve­renliyinə və ərazi bütövlüyünə hörmət kimi, beynəlxalq hüququn hamı tərəfin­dən tanınmış normalarına ciddi riayət edilməsi, ayrı-seçkiliyə yol vermədən tət­biqi dayanmalıdır.

Spiker dünyadakı mövcud vəziyyə­ti nəzərə alaraq, Parlamentlərarası İt­tifaqın öz fəaliyyətində və 6-cı Dünya Konfransı çərçivəsində bundan sonra da bu məsələyə diqqət yetirilməli olduğunu bildirib. O, iqlim dəyişikliyi probleminə də toxunaraq, deyib ki, bu, təcili həll edilməli olan qlobal problemlərdən biridir. 

S. Qafarova xatırladıb ki, Azərbaycan bütün ölkələrin yekdil dəstəyi ilə COP29-a evsahibliyi etmək üçün seçilib və bu ilin noyabrında Bakıda bu möhtəşəm tədbir təşkil olunacaq. Onun sözlərinə görə, Azərbaycan bütün tərəfləri və ölkələri cəlb etmək, cəmiyyətləri ümumi məqsəd ətrafında birləşdirmək üçün əlindən gələ­ni edəcək. Spiker, həmçinin diqqətə çat­dırıb ki, Parlament Sədrlərinin 6-cı Dün­ya Konfransı da bu məsələ ilə bağlı yeni ideyalar və yanaşmalar formalaşdırmalı və gələcək fəaliyyətində bunları əks et­dirməlidir.

Spiker dünən Qadın Parlament Sədr­lərinin Sammitinə hazırlıq məqsədilə Qa­dın Parlament sədrlərinin də görüşündə iştirak edib. Tədbirdə əvvəlki sammitlərin nəticələri nəzərdən keçirilib və növbəti tədbirə hazırlıq məqsədilə bir sıra təşki­lati məsələlər müzakirə edilib. O, çıxışın­da dünyada gender bərabərliyinin təmin olunması məsələlərində qarşıya çıxan problemlərə diqqəti yönəldib. Deyib ki, gender bərabərliyi mövzusu müxtəlif təd­birlərdə müzakirə olunsa da, hələ də bir çox ölkələrdə bununla bağlı məsələlərin həlli mümkün olmayıb.

Növbəti sammitdə qadınların icti­mai fəallığının artırılması, onların təhsil hüququnun reallaşdırılması, yüksək və­zifələrdə təmsil olunması mövzularının geniş müzakirələrə çıxarılmasının zəru­riliyini qeyd edən S.Qafarova, həmçinin qlobal iqlim dəyişikliyi məsələsinin olduq­ca aktuallığını nəzərə alaraq, qadınların bu məsələdə də fəal iştirakının vacibliyini diqqətə çatdırıb.

Ə.BƏDƏLOV
XQ