Dünən Türkiyənin ingilis dilində nəşr olunan “The Daily Sabah Newspaper” qəzetində tanınmış yazar Məlik Altinokun “Ermənistanın yeganə ixrac yolu Türkiyədən keçir?” adlı məqaləsi dərc olunub. Yazıda irəli sürülən bir çox fikir və mülahizələrin aktuallığını nəzərə alaraq, kiçik ixtisarlarla “Xalq qəzeti”nin oxucularına təqdim edirik.
“Azərbaycanın bu günlərdə cəmi 24 saat ərzində Dağlıq Qarabağda həyata keçirdiyi lokal xarakterli antiterror addımlarında parlaq uğur əldə etməsi İrəvan üçün gözlənilməz olub və bütün Ermənistanı şoka salıb.
Bu ölkədəki qatı millətçilər Qarabağdan gələn ermənilərin “qaçqınların acınacaqlı vəziyyətini əks etdirən şəkilləri” ilə uydurma 1915-ci il deportasiyası arasında müqayisə apararaq cəmiyyətdəki ajiotajı daha da qızışdırırlar.
Son günlər paytaxt İrəvanı kütləvi etiraz aksiyaları bürüyüb. Nümayişçilər baş nazir Nikol Paşinyanı korafəhmlik və ətalətdə günahlandırır. Etirazçılar, həmçinin hökumətin başçısını həmçinin “xalqı satmaqda” ittiham edirlər.
Paşinyan hakimiyyətə gəldiyi zaman ona sələflərindən miras qalan ağır problemləri “rasional yolla” həll edəcəyini vəd etmişdi. Bu, əvvəlcə cəmiyyətdə ümidlər yaratmışdı. Bununla belə, tezliklə baş nazirin səriştəsizliyi üzə çıxdı, belə ki, onun Rusiya ilə Qərb arasında “müvazinət” yaratmaqda çətinlik çəkdiyi bəlli oldu.
Məqalədə qeyd olunur ki, Azərbaycan 2020-ci ilin sentyabrında Qarabağda uğurlu hərbi əməliyyat həyata keçirə bildi və tarixi zəfər qazandı. Burada qardaş Azərbaycanın hünərvər əsgər və zabitlərinin qeyri-adi qəhrəmənlığını zərrə qədər belə azaltmadan vurğulanmalıdır ki, işğalçı Ermənistanın 44 günlük müharibədə ciddi uğursuzluğa düçar olmasının əsas səbəblərindən biri də məhz Paşinyanın xarici siyasətdəki kobud səhvləri və səbatsızlığı idi. Moskva Paşinyandan narazı idi və İrəvanı Türkiyənin hərtərəfli dəstəyini alan Azərbaycan qarşısında müdafiə etmədi.
Müəllif sonra bunları yazır: “Paşinyan başa düşürdü ki, Ermənistan 1990-cı illərin əvvəllərində işğal etdiyi ərazilərdən geri çəkilməlidir. Əks təqdirdə, Ermənistan dövlətinin mövcudluğu sual altına düşə bilər. Lakin Paşinyanın bu mövqeyi erməni cəmiyyətində baş nazirə qarşı etimadsızlığı gücləndirdi. Paşinyan artıq cəmiyyətdə ciddi problemlərlə üzləşirdi, lakin siyasi arenada baş nazirə alternativ görməyən erməni elektoratı sonda onu öz vəzifəsində saxladı.
Paşinyan Ermənistana uzun müddət mane olan “Böyük Ermənistan” kimi xülyalardan, digər tarixi yanlışlıq və məhdudiyyətlərdən qurtulmaq əzmində qətiyyətli görünürdü. Hətta Prezident Rəcəb Tayyib Ərdoğanın andiçmə mərasimində iştirak etmək üçün Ermənistanın “əbədi düşməni” hesab edilən Türkiyəyə də gəlmişdi. Eyni zamanda, o, müttəfiqi Rusiyanı əvəz etmək üçün Qərbdə alternativ ittifaqlar axtarırdı, hətta ABŞ ilə birgə hərbi təlimlər keçirməyə qərar vermişdi.
Paşinyanın ABŞ-a arxalanaraq, regional aktyorları özündən uzaqlaşdırması səhv addım idi və bu məntiqi başa düşmək çətindir. Çoxsaylı şərhçilərin fikrincə, bu, ilk baxışda baş nazirin təcrübəsizliyi kimi görünürdü. Bununla belə, İrəvanın xarici siyasəti Ermənistan daxilindəki kəskin hakimiyyət mübarizəsini əks etdirirdi.
Paşinyan üçün rəqiblərinin zərərsizləşdirmək arzusu hər şeyin fövqündə dururdu və indi də belədir. Bu, onun stixiyasıdır. 30 ildən artıqdır ki, Dağlıq Qarabağda möhkəmlənmiş hakimiyyət Ermənistanın “dərin dövləti”ni təmsil edir. Paşinyan isə, faktiki olaraq millətçi ictimaiyyətin mənəvi lideri kimi fəaliyyət göstərir. Heç kəsə sirr deyil ki, İrəvanda hazırkı iqtidarın hər bir addımı Dağlıq Qarabağın müqaviməti ilə üzləşib.
Status-kvonun əbədiləşdirilməsini özünün həyati məqsədi hesab edən erməni diasporasu və lobbisi də baş naziri dəstəkləməkdən imtian etdi. Bütün qüvvələr cinayətkar “Qarabağ klanı”nın hakimiyyətə qayıdışı üçün səfərbər olunurdu. Lakin Ermənistan əhalisi vaxtilə koçaryan və sarkisyanların qəddar və korrupsioner siyasətindən təngə gəldiyi üçün Paşinyanı hakimiyyətdən qovmağa tələsmədi.
Xülasə, Paşinyanın Azərbaycanın Dağlıq Qarabağdakı antiterror addımlarına qarşı çıxmaq istəməməsinin kökündə onun özünün bir düşməni digərinə qarşı qoymaq strategiyası dayanırdı və ədalət naminə demək lazımdır ki, o, bu hiyləgər siyasəti hələlik “uğurla” həyata keçirir, yəni hakimiyyətini qoruyub saxlaya bilir.
Baş nazir bir çox digər məkrli manevrlərə də əl atırdı. Belə ki, o, həyat yoldaşı Anna Akopyanı dəstək üçün Ukraynaya göndərdi və regionda gərginliyin tüğyan etdiyi bir vaxtda Ermənistan parlamentinə Rusiya Prezidenti Vladimir Putinin həbsini nəzərdə tutan Beynəlxalq Cinayət Məhkəməsinin (BCM) Roma statutunu ratifikasiya etmək təklifi göndərdi. Bütün bunlar Moskvanın qəzəbinə tuş gəlməyə bilməzdi.
Azərbaycan ordusu mümkün qətiyyətli hərəkətlərə hazırlaşarkən, Paşinyan bu təxribat xarakterli addımlar ilə Kremli hadisələrə müdaxilədən çəkindirdi. Doğrudan da, Paşinyanın səriştəsizliyi yoxlanıla bilər, amma o, axmaqlıqdan uzaqdır. Bu tezisin etibarlılığını onun Zəngəzur dəhlizinin açılması ilə bağlı mövqeyi müəyyən edəcək. Erməni millətçilərinin müqavimətinə baxmayaraq, bu yol layihəsi regional ticarəti əhəmiyyətli dərəcədə canlandırmaq potensialına malikdir və ölkənin yoxsul əhalisinə rifah bəxş edə bilər.
Hazırda Türkiyədə 100 mindən çox erməni işləyir və Ermənistandakı ailələrinə maddi yardım göndərir. Sərhəd açılsaydı, kiçik bir türk şəhəri qədər əhalisi olan Ermənistanda iqtisadi canlanma yaşana bilər.
Bu arada Türkiyə Prezidenti Rəcəb Tayyib Ərdoğan “Ermənistan buna (Zəngəzur dəhlizi nəzərdə tutulur - müəllif) yol açmasa, İrandan keçəcək” deyərək Ankaranın rəsmi mövqeyini bəyan edib. Bir sözlə, vaxt gözləmir. Paşinyan düzgün seçim etməlidir”.
Təqdim etdi:
M.HACIXANLI
XQ