Ekofəallarımızın keçirdiyi aksiya nəticəsində təbii sərvətlərimizin Laçın-Xankəndi yolu ilə daşınmasının qarşısı alınıb. Ermənilər bu aksiya səbəbindən həmin yoldan istədikləri kimi istifadə edə bilmirlər. Amma buna baxmayaraq, təəssüf ki, yenə də mənfur əməllərindən əl çəkmirlər. 

Ermənistan 2020-ci ilin 10 noyabr tarixində imzalanmış üçtərəfli Bəyanatın şərtlərini yerinə yetirməkdən imtina edir. Bu isə Azərbaycanı adekvat, öz suveren ərazisində təhlükəsizliyin təmini üçün ciddi addımlar atmaq məcburiyyəti qar­şısında qoyur. Rusiya sülhməramlıları qanunsuz erməni silahlı birləşmələrinin Azərbaycan torpaqlarından çıxarılmasını təmin etməli, erməni təxribatlarına qarşı sərt mövqe nümayiş etdirməlidir.

Rəsmi Bakının Qarabağda erməni təxribatına Müdafiə Nazirliyi tərəfindən hərbi, Xarici İşlər Nazirliyin tərəfindən siyasi müstəvidə, eləcə də Ombudsma­nın verdiyi bəyanat Laçın yolunda nə­zarət-keçid məntəqəsinin qurulmasının, qanunsuz erməni silahlı dəstələrinin Azərbaycan ərazisindən çıxarılmasının vacibliyini ortaya qoymuş olur. 

Nəzərə alsaq ki, Xocalı görüşü ermə­ni əhalisinin Azərbaycana inteqrasiyası məsələsində ilk gediş idi, separatçılar bu görüşü “bizi tərəf kimi qəbul edirlər” formasında tirajladılar. Beynəlxalq icti­maiyyət isə bu görüşü “erməni əhalisi ilə Bakının təması” saydı. 

Ekoaksiya dünya mətbuatının və beynəlxalq siyasətçilərin də diqqət mərkəzindədir. Belə ki, Əlcəzairin “Əl Hərir” portalı xarici jurnalistlərin işğaldan azad olunmuş ərazilərimizə səfəri barə­də xəbərlər dərc edib. Xəbər portalı xa­rici jurnalistlərin Laçın-Xankəndi yolunun Şuşa ərazisindən keçən hissəsində təşkil olunan aksiya yerinə gəlmələri barədə xəbər və fotoşəkillər yerləşdirib. Xəbər­də qeyd olunub ki, ekoaksiyanın gedişi barədə məlumatlandırılan əcnəbi media nümayəndələri aksiyadan reportajlar ha­zırlayıblar. Onlar eyni zamanda, Rusiya sülhməramlılarına məxsus avtomobillərin Laçın-Xankəndi yolundan keçidini də iz­ləyiblər. Oxucuların diqqətinə çatdırılıb ki, xarici jurnalistlər etirazçıların toplaşdığı ərazidən keçən yolda nəqliyyatın sərbəst hərəkətinə heç bir maneə olmadığını, yo­lun humanitar məqsədlər üçün tam açıq olduğunu müşahidə ediblər.

Azərbaycanla bağlı mütəmadi açıq­lamaları ilə gündəmə gələn İsrailin sa­biq rabitə, peyk və kibertəhlükəsizlik naziri, İqtisadi Sülh Mərkəzinin prezi­denti, tanınmış siyasətçi və politoloq Ayub Kara ABŞ-ın geniş oxucu kütləsinə malik populyar nəşri “Jewish Press”ə Laçın-Xankəndi yolunda gedən proses­lərdən danışıb. O, Laçın yolunda etiraz aksiyası keçirən azərbaycanlı ekofəallar ilə həmrəy olduğunu vurğulayıb. Polito­loq bunu onunla izah edib ki, təmiz ətraf mühit hüququ və millətin öz təbii sərvət­lərindən ekoloji cəhətdən təmiz şəkildə istifadə etmək imkanı hazırda Ermənis­tan tərəfindən Azərbaycana münasibət­də kobud şəkildə pozulan əsas insan hüququdur. Bu səbəbdən o, Azərbayca­nın Ermənistana qarşı başladılan arbitraj prosesinin Enerji Xartiyası Müqaviləsinə uyğun aparılmasını dəstəkləyir. Belə ki, beynəlxalq hüquqa əsasən, Ermənistan Azərbaycanın Qarabağ iqtisadi rayonun­da enerji resurslarına çıxışına yol ver­məməklə və onun enerji resurslarını öz maraqları naminə istismar etməklə həmin sənədin çoxsaylı müddəalarını, eləcə də beynəlxalq hüququn digər prinsipləri­ni pozub, BMT Təhlükəsizlik Şurasının dörd qətnaməsinə aşkar saymamazlıqla müşayiət olunan otuzillik işğal zamanı Azərbaycanı öz enerji ehtiyatlarını geniş­ləndirmək hüququndan məhrum edib.

İsrailli siyasətçi təəssüflə bildirib ki, Almaniyanın Xarici işlər naziri kimi bəzi şəxslər Ermənistanın bu münaqişədə təcavüzkar olduğunu anlamaqdan imti­na edirlər. Onlar Azərbaycanı Laçın yolu boyu etiraz aksiyası keçirməkdə və nəq­liyyatın qarşısını almaqda ittiham edir, bunu “humanitar fəlakət”, hətta “soyqırı­mı” adlandırırlar. A.Kara sözügedən eti­razların bu formada qələmə verilməsini ciddi təhqir hesab edib.

Ermənistan tərəfindən 30 illik işğal dövründə Azərbaycan əraziləri ekolo­ji soyqırımına məruz qalıb. Bu da bio­müxtəlifliyə ciddi ziyan vurub. Hazırda Azərbaycan həmin ərazilərdə biomüxtə­lifliyin qorunması üçün ciddi tədbirlər hə­yata keçirir. Bu gün biomüxtəliflik Azər­baycan üçün aktual məsələlərdən biridir.

Rizvan FIKRƏTOĞLU, “Xalq qəzeti”