Əslində, riyakarlıq insana xas ən naqis xüsusiyyətlərdən sayılsa da, mənbəyindən, tarixi şəraitdən və ətrafındakı geomühitdən asılı olaraq, tədricən, “infeksion xəstəliyə” də çevrilə bilirmiş... 

Artıq bütün kartların açılıb masanın üstünə qoyulacağı məqama yetişmi­şik. Bunu otuz ildən artıq davam edən, SSRİ-nin məzarını qazmış, son gediş­lərini yaşayan Qarabağ münaqişəsinə şamil etmək tam məntiqli olar. Deyəsən, istər cavan, istərsə də qoca dünyanın güclü və zəif bütün oyunçuları bu məqa­mın yetişdiyini yaxşı başa düşür və bu səbəbdən də oyunun klassik qaydala­rını pozmağa başlayıblar. Bunun lokal miqyasda əyani sübutunu Rusiya Mü­dafiə Nazirliyinin erməni separatçıları­nın Xəlfəli yolunda törətdiyi qanlı olaya münasibətində və yaydığı məlumatında görmək mümkündür. 

Sərrast verilmiş layiqli cavab 

Rusiya Müdafiə Nazirliyinin Azər­baycanın ərazisində, öz yolumuzda Er­mənistan ordusunun tör-töküntülərinin özbaşınalığına göz yummağı bir yana, Xankəndi-Xəlfəli-Turşsu torpaq yolunda baş vermiş silahlı insidentlə bağlı yaydığı bülletendə də bizi ittiham etməyə girişib. Guya, hərbçilərimiz bu yolda “pasport və viza” xidməti həyata keçirən erməni polis əməkdaşları”nı gülləbaran ediblər. Azərbaycan Müdafiə Nazirliyinin bölgəyə sülh yaratmağa hərbi kontingentini gön­dərmiş Rusiyanın müvafiq qurumuna ca­vabı bu dəfə sərrast və daha kəskin oldu: 

“Martın 6-da Rusiya Fe­derasiyası Müdafiə Nazirliyi Xankəndi-Xəlfəli-Turşsu tor­paq yolunda baş vermiş si­lahlı insidentlə bağlı yaydığı bülletendə faktları təhrif edib və həqiqəti əks etdirməyən məlumat yayıb. Silah-sursatla tam təchiz olunmuş bu hər­bi qulluqçuların “pasport və viza” xidməti həyata keçirən polis əməkdaşları kimi təqdim edilməsi riyakarlıqdan başqa bir şey deyildir. İnsident nə­ticəsində yaralanan hərbi qulluqçularımıza Rusiya sülhməramlı kontingentinin nü­mayəndələri tərəfindən ilkin tibbi yardımın göstərilməsi və təxliyə edilməsi barədə yayı­lan məlumat da həqiqəti əks etdirmir”.

Əgər Rusiya MN yaydığı məlumatın istinad ünvanını göstərmirsə, deməli, açıq-aşkar insidentə birtərəfli yanaşıb, yalnız ermənilərdən aldığı xəbəri əsas götürüb. 

Riyakarlıq yoluxucu virusa çevriləndə

Ermənistan mediasını, ölkənin so­sial şəbəkə seqmentini izləyəndə belə qənaətə gəlmək olar ki, Rusiya Mü­dafiə Nazirliyinin informasiya mənbəyi məhz bu platformadır. Deyəsən ruslar, konkret Qarabağ məsələsində riyakar­lıq üsulunu elə ermənilərdən əxz edib­lər. Sadəcə, haylar hər zaman yalanı, şər-böhtanı, riyakarlığı aşkarda edir­dilər, onların şimallı ağası isə gizlincə və üstüörtülü. İndi məlum olur ki, bəşər övladına xas bu naqis cəhətin yoluxu­cu virus kimi yayılma versiyası da var­mış. Kartların üzü çevrilib, hər şey göz qabağındadır. Yəni, ruslar riyakarlığın, ən azından, hərbi müstəvidəki çeşidini məhz haylardan öyrəniblər. Bu iki diaq­noz arasındakı yeganə fərq “infeksiya­nın” dərəcəsindədir. 

Ermənistan mediasının, onların si­yasi ekspertlərinin təxribatla bağlı tiraj­ladığı tezislərinə, şərhlərinə, “interpre­tasiyalarına” fikir verin: “Pasport-viza rejiminə nəzarət edən erməni polisləri”, “erməni polisi ilə Azərbaycan hərbçiləri arasında atışma”, “Artsaxın Daxili İşlər Nazirliyinin polisləri güllələnib”, “prob­lemi sadəcə qonşularımızla barışmaq yolu ilə həll etmək olmaz”, “Rusiya sülhməramlıları olmadan Bakı ilə heç bir məsələdə razılaşmaq mümkün de­yil ”, “Bakıdan səslənən bəyanatların məqsədi Artsaxı etnik təmizləməyə mə­ruz qoymaqdır” və s. bu qəbildən olan siyasi sayıqlamalar, xəstə təxəyyülün məhsulu olan fərziyələr və riyakarcası­na ağlaşmalar. 

Zəruri və qəti tədbirlər görüləcək

İrəvan Qarabağın erməni sakinləri­nin özlərinin uydurduğu, olmayan prob­lemini beynəlxalq arenaya daşımaq cəhdlərindən hələ də əl çəkmək istə­mir. Paşinyan iqtidarı bu məsələdə ən çox da, ətəyindən əl çəkmədiyi Fransa başda olmaqla, Avropadan nəsə umur. Fəqət, bu zaman ortadakı reallığı, çıl­paq həqiqəti görməzdən gəlir. Rəsmi İrəvanın doğrudanmı bunu dərk etməyə azacıq ağlı, dərrakəsi yetmir ki, Bakı artıq onlara güvənlərini itirmiş həmin Avropa nəhəngləri, eləcə də beynəlxalq güc mərkəzləri üçün enerji təhlükəsizli­yinin təminatçısı rolunda çıxış edir. 

Azərbaycan Müdafiə Nazirliyinin cavab-məlumatında Moskvaya “Rusi­ya sülhməramlı kontingentinin üzərinə düşən vəzifələri yerinə yetirməli oldu­ğu” xatırladılır. Ərazimizdə müvəqqəti yerləşdirilmiş sülhyaratma missiyasının əsas vəzifəsi 2020-ci il 10 noyabr Bə­yanatında göstərildiyi kimi, qanunsuz erməni hərbi birləşmələrini Qarabağdan çıxarılması idi. Bəs, adına Ermənis­tan ordusu deyilən bu təxribatçı-quldur dəstələri torpağımızdan niyə çıxarılmır? Axı, səbrin də bir həddi var. 

“Bir daha xəbərdarlıq edi­rik ki, Ermənistan tərəfindən Azərbaycan ərazisinə hərbi təyinatlı yüklərin daşınmasına, Ermənistan silahlı qüvvələrinin şəxsi heyətinin göndərilmə­sinə və rotasiyasına dərhal və birdəfəlik son qoyulmalı, Er­mənistan qoşunları ölkəmizin ərazisindən tam çıxarılmalıdır. Əks təqdirdə Azərbaycan tərəfi bütün imkanlardan istifadə et­məklə qeyri-qanuni silahlıların tərksilah edilməsi və zərərsiz­ləşdirilməsi istiqamətində qəti zəruri tədbirlər görmək məcbu­riyyətində qalacaqdır”. 

Fikrimizcə, rəsmi İrəvan kimi, Krem­lin də Azərbaycan Müdafiə Nazirliyinin bu cavab-məlumatındakı xəbərdarlıq notlarının yetərincə ciddi və birmənalı olduğuna şübhələri qalmayacaq. Necə ki, Azərbaycanın tezliklə həmin Laçın yoluna, Ermənistanla hələlik şərti sərhə­dimizin digər təmas nöqtələrinə nəzarət rejimini təmin etmək üçün sərhəd-keçid məntəqələrini quracağına da əmindirlər.

İmran BƏDİRXANLI, “Xalq qəzeti”