Görkəmli aktyor və rejissor, Xalq artisti Aleksandr Şarovski müasir Azərbaycan teatr sənətinin inkişafında danılmaz xidmətləri olan qüdrətli sənətkarlardandır. 1991-ci ildən Azərbaycan Dövlət Akademik Rus Dram Teatrının baş rejissorudur. Səhnədə 50-dən çox parlaq obraz yaradıb, 54 tamaşaya quruluş verib. Bugünlərdə XQ-nin müxbirləri sevimli sənətkarla görüşərək geniş müsahibə alıblar.
– Aleksandr Yakovleviç, bildiyimizə görə, siz peşəkar teatr təhsili almamısınız. Necə oldu ki, teatr aləminə qədəm basdınız?
– Mən, həqiqətən, ixtisasca aktyor deyiləm. Bu sahədə fəaliyyətə 1967-ci ildə Dövlət Gənc Tamaşaçılar Teatrının səhnəsində başlamışam. Məni bura xoş bir təsadüf gətirib. Etiraf edirəm ki, teatra gəlişimin səbəbi ilk sevgim ilə bağlı olub. Belə ki, hələ orta məktəbin 10-cu sinfində oxuyarkən bir gözəl qıza bərk vurulmuşdum. Qız da mənə biganə deyildi. Bir-birimizdən ayrı qala bilmirdik. O qız musiqi məktəbini bitirib Dövlət Gənc Tamaşaçılar Teatrının orkestrində pianoçu kimi işləməyə başladı. Nə gizlədim, onu hər gün, hər an görmək istəyirdim. Axı, həyatımın çox qaynar çağları idi.
Bir dəfə qızı təəccübləndirməyi qərara aldım. Məktəbdə dram dərnəyində məşğul olmuşdum, aktyorluq bacarığım var idi. Özümdə cəsarət tapıb teatra getdim. Yaxşı xatırlayıram, o vaxt teatrın baş rejissoru Zəfər Nemətov, direktoru isə Bala Qasımov idi. Çox peşəkar və xeyirxah insanlar idilər. Onlara dedim ki, aktyor olmaq istəyirəm. Məni yoxladılar və teatrın truppasına qəbul etdilər.
Qız biləndə ki, onunla bir kollektivdə çalışıram, buna çox sevindi. Mən bu teatrın səhnəsində 1976-cı ilə qədər çalışdım. Beləcə bu sənətə əbədi bağlandım. Qeyd etmək istərdim ki, mənə ən çox uğuru A.Dümanın “Üç muşketyor” əsərindəki müşketyor Dartanyan obrazı gətirib.
Atam aktyor olmağıma heç razı deyildi. Artıq səhnədə müxtəlif tamaşalarda rol alsam da, onun könlünü almaq üçün Xarici Dillər Universitetinə qəbul olundum. Atama vəd verdim ki, institutu bitirən kimi, teatrla vidalaşacağam.
– Lakin teatrdan ayrıla bilmə-diniz...
– Səhnənin qeyri-adi bir aurası var. Ona ürək vermisənsə, ayırlmaq olmur. Başa düşdüm ki, teatr mənim taleyimdir. Burada özümü azad və xoşbəxt hiss edirəm.
Bir müddət sonra Gənc Tamaşaçılar Teatrı artıq mənə “dar gəlməyə” başladı. O vaxt bir teatrdan başqasına keçmək çox çətin idi. Bəxtim gətirdi ki, həmin ərəfədə məni Dövlət Akademik Rus Dram Teatrına Fərhad roluna (S.Vurğunun “Fərhad və Şirin” əsəri nəzərdə tutulur – red.) dəvət etdilər. O vaxtdan bugünə qədər bu istedadlı kollektivin üzvüyəm. Fərhad rolundan sonra Ostrovskinin, Puşkinin, Qoqolun, başqa klassik rus və dünya dramaturqlarının əsərlərində əsas rolları oynadım. Bu gün də səhnədəyəm.
– Bəs rejissorluğa necə keçdiniz?
– Dartanyan rolundan sonra qəlbimin dərinliklərində rejissor olmaq arzusu baş qaldırmışdı. Həmin tamaşada mən həm də rejissor assistenti olmuşam. Rus Dram Teatrında “Müqəddəs günahkar” tamaşası səhnəyə hazırlanırdı, mənə İblis obrazı həvalə olunmuşdu. Məşq vaxtı quruluşla bağlı müəyyən təkliflərimi verirdim. Hiss edirdim ki, aktyorlar məni eşidirlər və rejissorun dediklərindən daha həvəslə qəbul edirlər.
Bir gün teatrın direktoru Qəzənfər Topçuyev məni kabinetinə çağırıb dedi ki, tamaşanı sənə həvalə etmək istəyirəm. Dedim ki, axı, rejissor məndən inciyə bilər. Topçuyev bir an düşünüb təklif etdi ki, o zaman tamaşanı birlikdə hazırlayın.
O vaxtdan məni teatra rejissor ştatına qəbul etdilər. Bir çox tamaşalarda həm aktyor, həm də rejissor kimi çalışırdım. Uzun müddət qoşa fəaliyyətim bu münvalla davam etdi. Sonra o vaxtkı mədəniyyət naziri Polad Bülbüloğlu məni teatrın baş rejissoru təyin etdi.
– Bir çoxları deyirlər ki, aktyor Şarovski teatrda parlaq obrazlar yaradıb, amma, kinematoqrafiyada bəxti gətirməyib.
– Bu, həqiqətən, belədir. Cəmi 4 filmə çəkilmişəm. Etiraf edirəm ki, mən kinoya çəkilməyi sevmirəm. Ona görə də kino taleyim yoxdur. Çəkiliş meydanında bir gün bir kadrı, sabah isə digər bir kadrı çəkirlər, sonra da uzun montaj prosesi başlayır. Bütün bunlara mənim səbrim çatmır.
Teatr sənəti isə tamamilə başqadır. Burada hər şey təbii və canlıdır. Teatrda məşq prosesi, premyeralar, canlı tamaşalar daha maraqlıdır. Səmimiyyətimə inanın, teatr mənim həyatımdır. Mən tamaşa hazırlayanda dincəlirəm. İnsan sevdiyi işlə məşğul olanda yorulmur.
Özünü tərifləmək olmasın, inzibatçılığı sevmirəm. İclaslar, yığıncaqlar keçirmək mənlik deyil. Həmişə demişəm, bu gün də deyirəm ki, aktyor məşqdə olar, iclasda yox. Teatrımızda çox səmimi bir ab-hava var. Biz tamaşaçıları heyrətləndirmək üçün əlimizdən gələni edirik. Teatrsevərlər bunu hiss edirlər.
– Repertuar ilə bağlı çətinlikləriniz varmı?
– Bu, çox vacib məsələdir. Bəzi müəlliflər özlərinin yarıtmaz pyeslərini teatra “sırımağa” çalışırlar. Onlara qətiyyətlə “yox” deməyi bacarıram. Repertuarda Rüstəm və Maqsud İbrahimbəyovların, Anarın əsərləri əsasında tamaşalar var. Bir müddət əvvət mənim quruluşumda “Üç gözəl” adlı yeni tamaşanın premyerası olub.
Hazırda əlimdə Avstriya dramaturqunun bir əsəri var, onu səhnəyə hazırlayıram. Amma düşünürəm ki, zaman-zaman klassik əsərlərə müraciət etmək mütləq lazımdır. Klassika hər bir aktyorun yaradıcılıq imkanlarını üzə çıxarır. Bir müddət əvvəl Çexovun “Albalı bağı”nı səhnəyə qoymuşuq. Çox uğurlu alınıb.
– Aleksandr Yakovleviç, 4 ildən sonra 80 yaşınız olacaq. Yubileyinizi hansı əsərə quruluş vermək, yaxud obrazı yaratmaqla qeyd etmək istərdiniz?
– Mən sizi başa düşdüm. Siz, yəqin ki, Kral Lir obrazını nəzərdə tutursunuz. Böyük Şekspirin eyni adlı faciəsində mən illər öncəsi Henrix rolunu səhnədə canlandırmışam. 80 yaşımla bağlı planlarıma gəldikdə isə, necə deyərlər, yaşayarıq, görərik...
– Yaş üstünə yaş gəldikcə “işdən, gücdən yoruldum, usandım, bezdim” dediyiniz anlar olurmu?
– Əksinə, illər keçdikcə daha çox teatrla bağlı olmaq istəyirəm. Mənə elə gəlir ki, teatrı hələ indi dərk etməyə başlamışam. Yadınızdadırmı, rəhmətlik estrada müğənnisi İlhamə Quliyevanın belə bir mahnısı vardı: “Yaşın nə fərqi var...”(Gülümsəyir).
Əlbəttə, yaş öz işini görür. Amma illər keçdikcə təcrübə də qazanırsan. Bir də ki, insan gərək ruhən qocalmasın. Teatr elə peşə sahəsidir ki, orada bütün yaş qruplarında olan insanlara ehtiyac var.
– Siz həm də ölkəmizin ictimai-siyasi həyatında fəal iştirak edirsiniz. Bakıdakı Avropa Yəhudiləri İcmasının rəhbərisiniz...
– Dünayda çox az dövlət tapmaq olar ki, müxtəlif xalqların nümayəndələri bizim ölkədə olduğu qədər azad, sərbəst və əmin-amanlıq içərisində yaşasınlar. Mən dəfələrlə dünyanın böyük şəhərlərindəki teatrların rəhbərlərindən iş təklifləri almışam. Amma seçim etmək barədə heç vaxt düşünməmişəm. Sadəcə, ona görə ki, balıq susuz yaşaya bilmədiyi kimi, mən də Bakısız qala bilmərəm.
– Siz 2023-cü ildə “Azərbaycan Respublikası Prezidentinin Fəxri diplomu” ilə təltif edilibsiniz. Əməyiniz ondan əvvəl də yüksək qiymətləndirilib...
– Mən dövlətimdən çox razıyam. 2008-ci ildə ölkə Prezidentinin sərəncamı ilə “Şöhrət”, 2018-ci ildə “Şərəf” ordenləri ilə təltif olunmuşam. Hər dəfə belə mükafatlara layiq görüləndə deyirəm ki, bu yüksək qiymət, bütövlükdə, bizim teatrın kollektivinin əməyinə verilən böyük dəyərdir.
Söhbəti qələmə aldılar:
Ramilə QURBANLI,
Məsaim ABDULLAYEV
XQ