...Otuz beş-qırx il öncə, isti yay günlərindən birində Cəlilabada gedirdik. Salyan ərazisində, bir yeməkxananın qarşısında sürücü avtobusu saxladı ki, mühərrik “nəfəsini dərsin”, biz də çay içək. Görkəmli xanəndəmiz Sabir Mirzəyev də orada idi. Hamımız sənətkarın başına toplaşdıq. “Bu istidə xeyir ola?” – deyə soruşduq. Cavabı qısa oldu: “Cəlilabada, doğma Bayxanlı kəndinə gedirəm. Yurd üçün darıxmışam”. 

Xeyli söhbət elədik. Kimi xanəndənin həm bəm, həm də zil pərdədə heyran-edici səsindən, kimi “Çahargah”ı daha gözəl ifa etməsindən danışdı, kimi də onun “Mirzə Hüseyn segahı”nı, “Rast”ı, “Dəşti”ni məxsusi səsləndirdiyini vur­ğuladı. Təşəkkürünü bildirən sənətkar dedi: “Amma bəziləri məni İran muğam ifaçılığına xas zəngulələr vurmaqda suçlayır. Ola bilər, bəlkə də bu, mənə tanınmış xanəndə olmuş atam Nüsrət kişidən keçib. Hər bir halda, mən bunda bir qəbahət görmürəm”. 

Sonralar öyrəndim ki, Sabir Mirzə­yev Cəlilabad şəhər mədəniyyət evində muğam dərsləri keçir, gənc istedadları başına yığıb onlara sənətin sirlərini mə­nımsədir. O zamanlar həftədə iki dəfə Bakıdan rayona gedib cavanlara dərs keçmək asan deyildi. Amma o, bunu sevə-sevə edirdi. Əməkdar artist, Pre­zident təqaüdçüsü Sabir Mirzəyev indi aramızda yoxdur. Ancaq Cəlilabadda xeyli gözəl xanəndə yetişib. Aralarında unudulmaz sənətkarı xatırladanlar da var, doğma yurdun “səs açan” möcüzəli bulaqlarının sirrini-sehrini aləmə yayan­lar da. Xanəndənin nəvəsi – balaca Sa­bir Mirzəyev də oxuyur, mərhum Xalq artisti Əlibaba Məmmədov onun ifaları­nı bəyənib, qabiliyyətini təqdir edib. 

Bir neçə gün əvvəl Beynəlxalq Mu­ğam Mərkəzində unudulmaz xanəndə Sabir Mirzəyevin 80 illiyinə həsr olunan xatirə gecəsi keçirilib. Milli Konserva­toriyanın rektoru, Xalq artisti Siyavuş Kərimi, Xalq artisti Ağadadaş Ağayev onun həyat və yaradıcılığından, muğam sənətimizdə qoyduğu izdən söz açıblar. Qeyd olunub ki, Sabir Mirzəyev 40 ildən çox Dövlət Filarmoniyasında, “Azərkon­sert” birliyində, teleradio şirkətində çalışıb, ifa etdiyi “Qarabağın maralı”, “Şuşanın dağları”, “Nazlana-nazlana”, “Gülə-gülə”, “Aşiqəm” xalq mahnıları, muğamlar Azərbaycan musiqi mədəniy­yətinin “qızıl fond”una daxil olub. 

Gecədə BMM-in solistləri – Əmək­dar artistlər Sevinc Sarıyeva, Arzu Əli­yeva, Səbuhi İbayev, xanəndə Rəvanə Qurbanova, həmçinin Əməkdar artist Yusif Mustafayev, eləcə də gənc xanən­dələr Xəyal Hüseynov və Nemət Mirzə­yevin ifaları təqdim olunub. İfaçıları tar­zən Rövşən Qurbanovun rəhbərliyində ansambl müşayiət edib.

Əli NƏCƏFXANLI , “Xalq qəzeti”