Paşa ƏMİRCANOV
[email protected]
İndi bizə daş atırlar. Qərbdən, özü də vahid mərkəzdən – Fransadan. Amma daşlar təkcə Fransadan atılmır. Paris artıq Avropada Azərbaycana atmaq üçün hərənin əlinə bir daş verib. Ancaq Qərbdə əllərinə daş yığanlar unudurlar ki, bumeranq effekti deyilən bir şey var. Yəni, daşlar geri qayıdacaq. Necə deyərlər, ay daş atan baxtavar, daşın da bir vaxtı var. Azərbaycan xalqının tarixin sınaqlarından çıxararaq, günümüzə gətirdiyi atalar sözlərindən biri də belədir: Daldan atılan daş topuğa dəyər.
İndi Avropa, bax, bu vəziyyət qarşısında dayanıb. Avropadakı, elə lap Parisdəki başbilənlər yaddaşlarını itiriblər. Unudublar ki, Azərbaycan otuz ilə yaxın gözləyib. Gözləyib ki, ATƏT-in Minsk qrupunun həmsədrləri təmsil etdikləri ölkələrin gücündən, nüfuzundan istifadə edərək, bapbalaca Ermənistanın özündən üç-dörd dəfə böyük Azərbaycana qarşı ərazi iddialarına son qoyacaq. Amma məlum olub ki, “vasitəçilik missiyasındakı dostlar, tərəfdaşlar, müttəfiqlər, hətta bəzən strateji müttəfiqlər” ölkəmizin Qarabağı ermənilərə güzəştə getməsini istəyirlər. Azərbaycan yalnız bundan sonra silaha əl ataraq, özünün tarixi ərazilərini qaytarıb, suverenliyini bərpa edib. Yəni, bütün bunları avropalılar da, amerikalılar da yaxşı bilirlər. Bəs belə olan halda hansı haqla 30 il bunlara hörmət qoymuş Azərbaycana daş atmağa başlayıblar. Özü də Azərbaycan işğalçı Ermənistan ordusunu öz ərazisindən qovub çıxarandan sonra.
İndi bizi daşa tutanlar bütün sifətlərini ortaya qoyublar. Məlum olub ki, vaxtilə güvəndiyimiz bu başına qar yağan dağlar nəinki işğal dövründə, hətta ermənilər Qarabağı könüllü şəkildə tərk edəndən sonra da Azərbaycana qarşı düşmən mövqeyində dayanıblar. Birmənalı şəkildə İrəvanı dəstəkləyirlər. Bunlar Azərbaycanın vuruşaraq qazandığı şanlı Zəfəri sinirib həzm edə bilmirlər. Fransa, ABŞ, eləcə də bir sıra digər güclü dövlətlərin dəstəklədiyi Ermənistanın uduzması əsəblərini tarmar edib.
Fransa Senatının Azərbaycan əleyhinə qətnaməsinin mürəkkəbi qurumamış Avropa Şurası Parlament Assambleyası üstümüzə daş yağdırmağa başladı. Almaniya qabağa verildi. Frank Şvabenin yalan, qərəz üzərində qurulmuş çıxışından sonra Azərbaycan nümayəndələrinin hüquqlarının məhdudlaşdırılması barədə qərar qəbul olundu. Sanki vahid mərkəzdən verilmiş əmr icra olundu. Artıq hərəkətə, söz-söhbətə yol vermək olmazdı, hər şey tez-tələsik həll olunmalıydı. Yoxsa Fransa Prezidenti Emmanuel Makronun xətrinə dəyərdi.
Artıq Avropa İttifaqı da Fransanın felinə uyub. Təşkilatın xarici işlər və təhlükəsizlik siyasəti üzrə ali nümayəndəsi Jozef Borrel son günlər xüsusi ermənipərəstliyi ilə seçilir. Onun da əmri həmin vahid mərkəzdən aldığı şübhə doğurmur. O da Azərbaycanın ünvanına yersiz ittihamlar səsləndirir. Təbii ki, Azərbaycanın Xarici İşlər Nazirliyi bütün bu saxta və yalan ittihamlara layiqli cavab verir. XİN-in mətbuat katibi Ayxan Hacızadə haqlı olaraq bildirib ki, Jozef Borrell Bakıya qarşı aqressiv və militarist siyasət yeridir. Nazirlik onun ittihamlarını əsassız adlandıraraq rədd edib. XİN hesab edir ki, Avropa diplomatiyasının rəhbəri faktları təhrif etməklə, “Azərbaycanın qanuni maraqlarına etinasızlıq” nümayiş etdirib: “Belə hədələyici ritorika ikili standartların bariz nümunəsidir, Azərbaycanla Avropa İttifaqı arasında münasibətləri daha da gərginləşdirir”.
Yeri gəlmişkən, J.Borrell bir müddət əvvəl bəyan etmişdi ki, Azərbaycanın Ermənistan ərazisinə dair iddialarından narahatdır. Birincisi, Azərbaycan heç vaxt Ermənistan ərazisinə qarşı iddia irəli sürməyib. İkincisi, Azərbaycan ərazilərinin 20 faizi Ermənistanın işğalı altında olanda və Bakı bir milyon qaçqın və məcburi köçkün problemi ilə üzləşəndə, nə Borrel, nə onun sələfləri, nə Makron, nə də ondan əvvəlki prezidentlər qəti narahat olmamışdılar. Hətta, Qarabağın Ermənistana bağışlanmasına açıq işarələr vurur, Azərbaycana münaqişənin hərbi yolla həllinin mümkünsüzlüyünü təlqin edirdilər. Amma Azərbaycan siyasət qazanında, kifayət qədər bişmiş Avropa siyasətçilərinin bir neçə nəslinin bu cür riyakar iddialarına rəğmən, özünün ərazi bütövlüyünü məhz hərbi yolla bərpa etdi. 30 illik münaqişəni cəmi 44 günə bitirdi.
Borrel, eyni zamanda, Ermənistanın suverenliyinin hər hansı bir şəkildə pozulmasının Brüssellə Bakı arasında münasibətlər üçün ciddi nəticələrə səbəb olacağı ilə hədələyib. Bununla da Azərbaycanın bostanına iri bir daş atmış olub. Amma o da, digər həmkarları da unudublar ki, dünən qaz üçün Azərbaycan Prezidentinin qarşısında boyunlarını bükmüşdülər. Avropa Komissiyasının Prezidenti xanım Ursula fon der Lyayenin Bakıda Prezident İlham Əliyevlə görüşündə dediklərini xatırladırıq: “Əla münasibətləri daha da dərinləşdirmək istəyirik. Bu gün imzalayacağımız Anlaşma Memorandumuna nəzər salsaq, ... orada enerji sektorunda etibarlı tərəfdaşlıq, eləcə də orta və uzun perspektivdə bərpaolunan enerji məsələləri xüsusi qeyd edilir”.
Azərbaycanın “etibarlı tərəfdaşlığı”na beləmi cavab verirsiniz?! Qorxun, atdığınız daşların geri qayıdacağı gündən qorxun!..