Replika

Səkilər birmənalı olaraq piyadalar üçündür. Təəssüf ki, bəzən onlar səkilərlə rahat və sakit yeriyə bilmirlər. Bir də görürsən ki, sən yeridiyin yerdə böyük qaya parçası kimi bir avtomobil qarşına çıxdı və az qala səni vurdu. Həmin yerdə piyadalar toqquşmalı olur, “tıxac” yaranır və əsəblər korlanır. 

Doğrudur, əvvəllər belə hallar daha çox olurdu, indi azalıb. Buna görə də bənzər məzərəyə rast gələndə təəccüb­lənirik, sakinlər bir yana, paytaxtımızda bol olan xarici turistlərin haqqımızda nə düşünəcəkləri də bizi narahat edir. Şə­killərdə gördüyünüz mənzərələrin orada 2 gün dalbadal şahidi olmuşuq, özü də eyni yerdə – şəhərin mərkəzi ərazilərin­dən sayılan Şəmsi Bədəlbəyli küçəsin­dəki səkidə, “28 Mall” ticarət mərkəzi ilə Azərbaycan Dövlət Neft və Sənaye Uni­versitetinin yaxınlığında. 

Bu yerdə Vaqif Bəhmənlinin hələ ötən əsrin 70-ci illərində yazdığı bir şeir yada düşür: “Ehey, kim saxlayıb bu səkidə ma­şını?” Sətiraltı mənaları başqa olsa da, şair hələ maşınların qarışqa kimi qay­naşmadığı o vaxt səkiləri zəbt edən sürü­cülərə etirazını şeirə gətirmişdi. Görünür, şeir hərfi mənasında bu gün də aktual olaraq qalır. 

Yaxşı, bəs, yol polisi nə üçün həmin maşınları cərimə meydançasına aparıb, özbaşına sürücüləri cərimələmir? Axı, onlar maşınlarını xəlvət guşədə deyil, məhz, necə deyərlər, göz deşən yerdə saxlamaqla piyadalara etinasızlıq göstə­rirlər! İradımız həm də Nəsimi Rayon İcra Hakimiyyəti başçısının 3 nömrəli Sahə İnzibati Ərazi Dairəsi üzrə Nümayəndəli­yinədir. İnanmazsınız, fotoları düz həmin nümayəndəliyin qarşısında çəkmişik. Bəs, onlar buna necə göz yumurlar? 

Onu da deyək ki, sözügedən küçə­nin aşağı başında da belə xoşagəlməz mənzərə olur, özü də, necə deyərlər, “qanuniləşmiş” şəkildə. Dəmiryol vağza­lı ilə “28 May” metro stansiyasının qar­şısındakı meydanda, görkəmli drama­turq Cəfər Cabbarlının abidəsinin düz arxa tərəfində rəsmi pullu dayanacaq fəaliyyət göstərir. Bu da günün istənilən vaxtında böyük piyada sıxlığı müşahidə olunan bir yer üçün tamamilə qəbule­dilməzdir. Hələ onu demirik ki, bu az­mış kimi, həmin dayanacağın ətrafında da minik avtomobilləri “park” edilməklə daha acınacaqlı vəziyyət yaradır. “Par­kinq”in yerində gül-çiçəkli park və ya xiyaban yaradılsa, daha məqsədəuyğun olmazmı?

P.S.: Bu yazıda biz yalnız eyni yerdə 2 gün ardıcıl şahidi olduğumuz faktları qabartdıq. Sözsüz ki, paytaxtın digər yer­lərində də belə narahatedici mənzərələr var. Əlaqədar qurumların bu barədə dü­şünüb, təsirli tədbirlər görməsi günün tələbidir. 

Əli ƏLİYEV
XQ