Məğlub Ermənistanın siyasi hakimiyyətinin başbilənlərinin, o cümlədən də baş nazir Nikol Paşinyanın saxtakarlığa əl atması, faktları, proseslərin mahiyyətini təhrif etməsi, yalanları ilə daxili auditoriyanı və beynəlxalq ictimaiyyəti aldatmaq cəhdləri, bir növ, ənənə halını alıb.
Erməni tərəfi həyasızcasına aksiyaların Azərbaycanın siyasi hakimiyyəti tərəfindən dəstəkləndiyi, yolun blokadaya alındığı və bölgədə yaşayan erməni əhalisinin humanitar böhran yaşadığını iddia edir. Reallıq budur ki, qarşı tərəfin səsləndirdiyi iddiaların heç bir əsası yoxdur. Bu aksiyalar ermənilərin Rusiya sülhməramlı kontingentinin müvəqqəti xidmət apardığı Azərbaycan ərazilərində yerləşən faydalı qazıntı yataqlarının qeyri-qanuni istismarı, sərvətlərimizin talanması, ekologiyaya ziyan vurulması ilə əlaqədar keçirilir. Aksiya iştirakçıları vətəndaş mövqeyi ortaya qoyaraq qeyri-qanuni fəaliyyətlərin dayandırılmasını tələb edirlər. Onların tələbi budur ki, Azərbaycanın müvafiq qurumlarına ermənilərin qeyri-qanuni şəkildə istismar etdikləri faydalı qazıntı yataqlarında monitorinqlər aparmalarına şərait yaradılmalıdır. Hələlik belə bir imkan yaradılmayıb və buna görə də ekofəallar gecə-gündüz fasilə vermədən aksiyalarını davam etdirirlər.
Xarici işlər naziri Ceyhun Bayramov jurnalistlərə açıqlamasında deyib ki, rəsmi İrəvan Azərbaycan-Ermənistan şərti sərhədində nəzarət-buraxılış məntəqələrinin qurulması ilə bağlı təklifi məqbul hesab etməyib. Nazirin sözlərinə görə, Ermənistan danışıqlardan yayınır və verilən təklifə heç bir izah vermədən imtina edir: “Son iki ildə Laçın yolu ətrafında çox böyük qanun pozuntuları baş verib. Yoldan qanunsuz istifadələr var idi. Bununla bağlı dəfələrlə beynəlxalq təşkilatlara məlumat verilib, ölkəmizdə fəaliyyət göstərən diplomatik korpus nümayəndələri üçün brifinqlər keçirilib. Burada müxtəlif istiqamətlər üzrə yüzlərlə fakt var idi. Təbii ki, bu da Azərbaycan cəmiyyətinin haqlı narazılığına səbəb olmuşdu. Eyni zamanda, dekabrda başlamış etirazların səbəbi də məhz Laçın yolundan qanunsuz məqsədlərlə istifadə ilə bağlı idi”.
Nazir bildirib ki, məsələnin həlli üçün bəlli çağırışlar var: “Həll yollarından biri kimi Prezident Münxen Təhlükəsizlik Konfransında Ermənistanın baş naziri ilə görüşdə, daha sonra panel müzakirəsi zamanı Ermənistan-Azərbaycan şərti sərhədində sərhəd-buraxılış keçid məntəqələrinin qurulmasını təklif etmişdi. Bu, yolda şəffaflığı təmin edə bilər. Çünki hər kəs bilir ki, üçtərəfli bəyanatda nə yazılıb, tərəflərin öhdəliyi nədən ibarətdir. Ancaq şəffaflığın olmaması ciddi problem və suallar doğurur. Bu təklif işçi qaydada müzakirə ediləndə də beynəlxalq tərəfdaşlardan təklifin sağlam olduğunu eşidirik. Lakin Ermənistanın xarici işlər naziri bu təklifə istinad edərək heç bir izah vermədən ölkəsi üçün məqbul olmadığını açıqladı. Hesab edirik ki, bu açıqlama Ermənistanın üçtərəfli bəyanatla bağlı öhdəliyini yerinə yetirməkdə maraqlı olmadığı mənasına gəlir. Laçın yolunda hansısa gərginliyin olmaması üçün verilən təklifdən imtina edir. Ermənistan manipulyasiyalarla məşğul olmaq, beynəlxalq aləmdə çaşdırıcı məlumatların verilməsi ilə yanlış təsəvvür yaratmaq və lazımsız gərginlik yaratmaqda maraqlıdır”.
Son hadisələr Laçın yolunda şəffaflığın təmin olunmasının zəruriliyini bütün ciddiliyi ilə gündəmə gətirib. “Azərbaycan tərəfi dəfələrlə bəyan edib ki, Laçın yolundan istifadə qanuni və şəffaf olmalıdır və yoldan sui-istifadə hallarına yol verilməməlidir. Bu səylərin tərkib hissəsi kimi, Azərbaycan Laçın yolunun başlanğıcında sərhəd nəzarət keçid məntəqəsi yaradılması barədə təkliflə çıxış edib. Bu təklif Azərbaycanla Ermənistan arasında postmünaqişə normallaşma prosesi çərçivəsində Laçın yolu üzrə şəffaf mexanizm və etimad quruculuğu tədbiri kimi beynəlxalq tərəfdaşlar tərəfindən də müsbət qarşılanıb. Lakin Ermənistanın bu təklifdən heç bir əsas gətirmədən imtina etməsi Ermənistanın Laçın yolunda şəffaflıqda maraqlı olmadığını və sui-istifadə hallarını davam etdirmək niyyətinin göstəricisidir”, - deyə Azərbaycan XİN-in bəyanatında qeyd edilib.
Dünən gün ərzində Rusiya sülhməramlılarına və Beynəlxalq Qırmızı Xaç Komitəsinə məxsus, ümumilikdə, 60-dan çox humanitar təyinatlı avtomobilin keçidinə şərait yaradılıb. Ekoaksiyanın 77-ci günündə nəqliyyat vasitələrinin ərazidən heç bir maneə olmadan hərəkət etmələri bir daha aksiyanın məramının dinc olduğunu nümayiş etdirir. Azərbaycanlı ekofəallar etirazların ilk günündən humanist prinsiplərə sadiqdirlər. Heç də siyasi xarakter daşımayan bu aksiya Qarabağ ərazisində faydalı qazıntı yataqlarının istismarına qarşıdır.
Elşən MƏCİDOV,
politoloq:
- Azərbaycan tərəfinin Ermənistana və Qarabağdakı separatçılara bir neçə tələbi var. Bu tələblər içərisində Laçın-Xankəndi yolunda nəzarət-buraxılış məntəqələrinin qurulması, təbii sərvətlərimizin talanmasının qarşısının alınması, Qarbağda qalmış erməni silahlılarının ərazini tamamilə tərk etməsi, qondarma müdafiə ordusunun buraxılması, Zəngəzur dəhlizinin açılması da var. Lakin Azərbaycanın haqlı tələblərinə hələ də etinasızlıq göstərilir. Əlbəttə ki, bu halda belə Azərbaycan öz strateji yanaşmasını və tələblərini dəyişdirmək fikrində deyil. Bu da onu deməyə əsas verir ki, tələblər yerinə yetirilənədək ekofəallar aksiyalarını davam etdirəcəklər.
Ermənilər yaranmış vəziyyəti yolun “blokada”da olması və Qarabağda yaşayan ermənilərin humanitar böhran yaşaması kimi təqdim edirlər. Guya, Azərbaycan hökuməti orada yaşayan erməniləri deportasiya etmək istəyir. Reallığa baxdıqda isə yol blokadada deyil və humanitar yüklər üçün açıqdır. Deportasiya məsələsinə gəldikdə isə, cənab Prezidentimiz dəfələrlə bəyan edib ki, Qarbağda yaşayan ermənilər Azərbaycan vətəndaşlarıdır. Onlar Azərbaycan vətəndaşlığını qəbul edib təhlükəsiz şəraitdə və yüksək səviyyədə yaşaya bilərlər.
Digər tərəfdən, üçtərəfli Bəyanatın prinsiplərinə zidd mövqe nümayiş etdirən Ermənistan digər havadarlarını məsələyə qatmaqla danışıqlar prosesindən yayınır. Ermənistan hakimiyyətinin bugünkü siyasəti yalan danışmaqla beynəlxalq ictimaiyyəti çaşdırmaqdır. Nikol Paşinyan hökuməti prosesin əvvəlində Azərbaycan-Rusiya gərginliyini yaratmaq üçün cizgilər ortaya qoysa da, Azərbaycan tərəfinin siyasi iradəsi göstərdi ki, əslində, Ermənistan Rusiyadan üz döndərib. KTMT məsələsi, Ermənistanda yerləşən 102-ci hərbi baza qarşısındakı mitinqlər, Paşinyan və digərlərinin Rusiya əleyhinə çıxışları açıq göstərir ki, Ermənistan Rusiya ilə əlaqələrini pozmaq, Fransa kimi müttəfiqlər axtarışındadır. Bu proses başlayıb. Çünki Rusiya hazırda tarixdə görünməmiş səviyyədə reputasiyasını itirib. Bu isə fürsətcil Ermənistanın başqa müttəfiqlər axtarışına gətirib çıxarıb.
Düzdür, aksiyaçılar müəyyən mənada uğur əldə ediblər. Buna Ruben Vardanyanın qondarma dövlət naziri postundan getməsi, aksiya müddətində təbii sərvətlərimizin talan edilməsinin qarşısının alınması misal ola bilər. Lakin iş bununla bitmir. Qarşıda hələ ərazilərimizin monitorinqləri var. Bu monitorinqlərdən sonra vurulmuş ziyan hesablanacaq və Ermənistan tərəfi kompensasiya ödəyəcək. Ermənistanın qeyri-konstruktiv siyasəti, ilk növbədə, özünə ziyandır.
Rizvan FİKRƏTOĞLU, “Xalq qəzeti”