8 Noyabr Zəfər Günü münasibətilə “İRƏLİ” İctimai Birliyinin təşəbbüsü və Nizami Kino Mərkəzinin təşkilati dəstəyi ilə Vətən Müharibəsi Qəhrəmanı Ramiz Cəfərovun şücaətindən və döyüş yolundan bəhs edən “Ömür vəfa etsəydi” filminin nümayişi keçirilib.
Ekran işində şəhid Ramiz Cəfərovun silahdaşları ilə birgə düşmən texnikasını sıradan çıxarması və erməni quldurlarını amansızcasına məhv etməsi səhnələrinin şahidi oluruq. Bədxah ermənilər ağır məğlubiyyətdən sonra sovet texnikası ilə hücuma keçirlər. Ramizin döyüş yoldaşları ilə birgə qurduğu plan isə çox gözlənilməz olur. İki qumbara partlayışından sonra düşmən yaraqlıları silahlarını hansı tərəfə tuşlayacaqlarını müəyyənləşdirənədək Ramizgil bütöv quldur dəstəsini məhv edir.
Həyat yoldaşı Sitarə Cəfərova da filmdə Ramizlə bağlı xatirələrini dannışır:
– Mən Ramizlə tanış olanda o, artıq hərbçi idi. Rusiyanın Ryazan şəhərində Ali Hava Desant məktəbini bitirib 1996-cı ildə Xüsusi Təyinatlı Qüvvələrdə (XTQ) polkovnik-Leytenant kimi qulluq edirdi. O, düz 29 il Vətənə xidmət etdi. Ümumiyyətlə, hərbçi yoldaşı olmaq çox çətindir. Qürur hissi keçirirəm ki, belə bir qəhrəmanın yoldaşıyam.
Şəhid Ramiz Cəfərovun özündən sonra qoyub getdiyi 5 övladı da qəhrəman atalarının ən böyük arzularını yerinə yetirmək, onun yarımçıq qalan ömür yolunun layiqli davamçıları olmağı qarşılarına məqsəd qoyublar.
Ömrünün 46-cı baharında şəhadətə ucalmış şəhid Ramiz Cəfərov Masallı rayonunun Ağakişibəyli kəndindəndir. Hələ yeniyetmə yaşlarından hərbiyə olan marağı onu Cəmşid Naxçıvanski adına Hərbi Litseyə gətirmişdi. ABŞ-də, Rusiyada, Almaniyada peşəkar kurslarda təhsil almış, hərbi təlimlər keçmiş Ramiz alman, ingilis və rus dillərinə mükəmməl yiyələnmişdi.
Filmdə dostları, sağ qalmış döyüş yoldaşları onun haqqında danışarkən deyirlər:
– XTQ-nin komandir müavini Ramiz Cəfərovun qəhrəmanlıq tarixinə gedən yolu 2016-cı il Aprel döyüşlərindən başlayır. O, həmişə birinci irəli atılaraq əsgərlərinə “arxamca gəlin!” əmrini verərək, nümunə göstərərdi. Qartal kimi irəli şığıyardı. Buna görə də ona “Şuşa qartalı” adını vermişdik. Ramiz Füzuli, Cəbrayıl, Hadrut istiqamətində gedən döyüşlərdə də iştirak etdi. Erməni faşizmi üzərində qələbələrimizə böyük töhfə verməklə işğal altında olan ərazilərin azadlığı uğrunda döyüşlərin önündə gedən əsl qəhrəman idi. O, heç vaxt torpaqların düşmən tapdağında qalması ilə razılaşmırdı. Həmişə deyirdi ki, nəyin bahasına olursa-olsun, torpaqları azad edəcəyik. Belə də oldu.
Müharibənin bitməsinə iki gün qalmış Ramizin şəhid xəbəri gəldi. Noyabrın 6-da Şuşa uğrunda savaşda döyüş yoldaşları ilə birgə ağır artilleriyadan və tanklardan açılan düşmən gülləsinə tuş gəldi. Şuşanın alındığını görsə də, qələbə sevincini axıra qədər yaşaya bilmədi. Nəşi Bakıya gətirilərək noyabrın 11-də II Fəxri xiyabanda dəfn olundu. Ölümündən sonra “Vətən Müharibəsi Qəhrəmanı”, “Vətən uğrunda”, Cəbrayılın, Şuşanın, Füzulinin və Xocavəndin azad olunmasına görə medalları ilə təltif olunub.
Sonda filmin yaradıcı heyəti ilə söhbətləşdik. Filmin ssenari müəllifi Rəfiqə Məsud XQ-yə bildirdi:
– Torpaqlarımızı işğaldan azad edən və cəbhədə mərdliklə həlak olan oğullarımızın igidliklərini, döyüş yolunu işıqlandırmaq, onlar haqqında gələcək nəsilləri bilgiləndirmək üçün belə bir film ərsəyə gətirdik. Qeyd edim ki, 20 milli qəhrəman haqqında çəkilmiş sənədli filmlərin müəllifiyəm. Bunu özümə borc bilirəm. Gənclərə də bu filmləri göstərməkdə məqsədimiz budur ki, onlar tariximizi bilsinlər. Nəinki gənclər, hər kəs bilməlidir ki, bizim necə tarix yazan qəhrəman oğullarımız olub.
Filmin rejissoru Taleh İsmayıl isə dedi:
– Ramiz və onun kimi oğullar Vətən yolunda canlarını fəda etdilər ki, millət, xalq yaşasın. Biz də bu qəhrəman oğullarımız haqqında silsilə filmlər ərsəyə gətiririk ki, gənc nəsillər də igid oğullarımızı tanısınlar. Gənclər arasında vətənpərvərliyi təbliğ etmək lazımdır. Çünki düşmənlərimiz yatmayıb. Hər an təxribat, hücumlar ola bilər. I və İİ Qarabağ müharibələrində şəhid olan bütün milli qəhrəmanların, igid soydaşlarımızın xatirəsini həmişə uca tutmalıyıq.
Fidan SALMANOVA
XQ
