Azərbaycan Mətbuat Şurası “Azərbaycan media landşaftı üzrə məlumat bazasının yaradılması” təşəbbüsünü uğurla gerçəkləşdirir. Dünən şurada layihə ilə bağlı keçirilən ilk təqdimatda görülmüş işlər geniş müzakirə edildi, rəy və təkliflər dinlənildi.
AMŞ sədri Rəşad Məcid layihə barədə ətraflı məlumat verərək bildirdi ki, Azərbaycan media məkanı barədə aydın təsəvvür formalaşdıran məlumat bazası yaratmaq ideyası şuranın 2022-ci ildən nəzərdə tutduğu iş planının mühüm tərkib hissəsidir. O, belə bir bazanın vacibliyinə duyulan ehtiyacı vurğulayaraq qeyd etdi ki, bu istiqamətdə fəaliyyət mərhələli və davamlıdır. Çünki ölkəmizin media mühiti daim inkişafda, yeni seqmentlər qazanmaqdadır.
Müzakirə edilən layihənin uğurlu və faydalı olacağına əminliyini söyləyən şura sədri dedi: “Mediamızdakı dinamika istər-istəməz palitra zənginliyi yaradır. Bu zənginlik isə ortaya institusional baxış qoyulmasını ehtiyaca çevirir. Elə bir baxış ki, ona yalnız Azərbaycanda deyil, dünyada da müraciət edilsin. Bu, informasiya cəbhəsində mübarizəmiz baxımından da önəmlidir”.
Rəşad Məcid belə bir önəmli layihənin gerçəkləşdirilməsinə göstərdiyi maliyyə köməyinə görə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinə, təşkilati dəstəyə görə isə Medianın İnkişafı Agentliyinə və Jurnalistlərin Həmkarlar İttifaqına təşəkkürünü bildirdi.
Medianın İnkişafı Agentliyinin icraçı direktorunun müavini Natiq Məmmədli layihənin əhəmiyyətini vurğulayaraq bu fəaliyyətin KİV məkanındakı pərakəndəliyin aradan qalxmasına töhfə verəcəyini, beynəlxalq miqyasda Azərbaycan jurnalistikası ilə bağlı üstün təəssürat formalaşdıracağını ifadə etdi. Qeyri-Hökumət Təşkilatlarına Dövlət Dəstəyi Agentliyinin layihələrin idarə olunması üzrə meneceri Natiq Lahıcov isə təmsil etdiyi qurumun Mətbuat Şurasının bu faydalı təşəbbüsü ilə bağlı müvafiq dəyərləndirilmələr apardığını və layihənin icrası üçün vəsait ayırdığını diqqətə çatdırdı.
Mətbuat Şurasının icraçı katibi Əvəz Rüstəmov toplantı iştirakçılarını qurumun “presscouncil.az” saytında yaradılmış “Azərbaycanın media landşaftı” barədə məlumatlandırdı. O, həmin kateqoriyada “Azərbaycanda informasiya dövriyyəsini tənzimləyən qanunlar”, “İnformasiyanın etik standartlarını müəyyən edən yerli və beynəlxalq sənədlər”, “Azərbaycanın aparıcı media subyektləri”, “Azərbaycan mediasından gender balansı”, “I və II Qarabağ müharibəsi dövründə Azərbaycan mediası” yarımbölmələrinin yer aldığını söylədi.
AMŞ İdarə Heyətinin üzvü, “Azərbaycan media landşaftı üzrə məlumat bazasının yaradılması” layihəsinin eksperti Müşfiq Ələsgərli qeyd etdi ki, ölkəmizin media məkanı barədə bütün informasiyaların vahid mənbədə toplanılması bu sahə barədə detallı və obyektiv bilgi əldə etmək imkanını hədəf alıb. Bu məqsədlə də “Presscouncil.az” internet səhifəsində yaradılmış “Azərbaycanın media landşaftı” kateqoriyasında ölkəmizdə informasiya dövriyyəsini tənzimləyən bütün qanunla, etik standartları müəyyən edən milli və beynəlxalq sənədlər, fəaliyyətdə olan media subyektlərinin adları və keçid linkləri yerləşdirilib.
Layihə çərçivəsində görüləcək işlər məlumat bazasını daha da zənginləşdirəcək. Məlumat bazasının Azərbaycan dili ilə yanaşı, ingilis dilində də fəaliyyəti təmin ediləcək.
AMŞ İdarə Heyətinin üzvü, BDU jurnalistika fakültəsinin kafedra müdiri, professor Qulu Məhərrəmli layihənin KİV məkanımızın məlumat bazasını zənginləşdirəcəyinə və ondan istifadəni asanlaşdıracağına xidmət etdiyini vurğuladı, media ictimaiyyəti adından bu ideyanı dəstəkləyənlərə minnətdarlığını bildirdi və icraçılara uğur arzuladı.
Toplantıda iştirakçıların sualları cavablandırıldı, təklifləri qeydə alındı.
Tahir AYDINOĞLU
XQ
