Yaxud Makronun yeni baş nazir təyinatına sözardı

Fransa ermənipərəstliyini dur­madan gücləndirir. Ölkənin yeni baş nazirinin Mişel Barnye olması bunun təsdiqidir. Söhbət 2021-ci ildə Azərbaycan ərazilərinə qey­ri-qanuni səfər edən Barnyedən gedir. 

Bəli, yeni baş nazir o zaman Fransa­da prezidentliyə namizəd Valeri Pekreslə birgə Qarabağdakı separatçı rejimin təm­silçilərini ziyarət edib. Böyük ehtimalla onlara ruh yüksəkliyi aşılayıb, yəni sabun köpüyü ritorikasına üstünlük verib. Ən əsası isə Barnye səfər əsnasında anti-Azər­baycan fikirlər səsləndirib və Pekreslə bir­gə ölkəsinin Azərbaycandakı səfirini geri çağırmasına dair bəyanat yayıb. Habelə, bununla kifayətlənməyərək, Bakıya qarşı sanksiyaların tətbiqi istiqamətində çağırışa da imza atıb. 

Əslində, Emmanuel Makron kimi er­mənipərəst prezidentə malik Fransanın Barnye kimi ermənipərəst baş nazirinin olması o qədər də təəccüblü deyil. Əlbəttə, ikincinin ölkəsində yüksək posta təyinat alması Parisin Bakıya qarşı hərəkətlərin­dəki rəng çalarlarını bir qədər də tündləş­dirəcək. Ancaq, necə deyərlər, islanmışın yağışdan qorxusu yoxdur. Bu mənada, Azərbaycan da heç nədən və heç kimdən çəkinmir.

Bəli, Fransa istər rəsmi, istərsə də qeyri-rəsmi formada ölkəmizə qarşı ən ağlasığmaz vasitələri işə salaraq mübarizə aparır. Qərəz dolu qətnamələr, bəyanatlar və sair anti-Azərbaycan mahiyyət daşıyan lakmus kağızları günümüzün acı reallıqla­rı, ümumən Fransa adına son dərəcə böyük utanc gətirən səhnələrdir. Şübhəsiz ki, za­man keçdikdən sonra ölkədə Bakıya müna­sibət baxımından bu gün yaşananlara görə utananlar tapılacaq. 

Yeri gəlmişkən, bu məqamı vurğulayaq ki, o boyda Fransa, demokratiyanın beşi­yi, ənənələrə malik məmləkət otuz illik müstəqilliyi olan gənc dövlətə münasibət­də aşkar həyasızlıq yolu tutur, bütün etiket qaydalarını, mənəvi dəyərləri, beynəlxalq hüquq normalarını saymır. O da şübhəsiz­dir ki, vaxt gələcək ümumən Makronun prezidentliyi dövrü Fransanın qara ləkəsi kimi tarixə düşəcək. Elə Barnye kimi er­mənipərəstin baş nazirliyi də həmçinin. 

Beləliklə, Ermənistanın Fransadakı sə­firi Asmik Tolmacyan bildirib ki, Ermənis­tan M.Barnyenin ölkəyə iki səfərini böyük qədirbilənliklə xatırlayır. Onun sözlərinə görə, həmin səfərlərdən biri 1995-ci il no­yabrın 7-də gerçəkləşib. O vaxt Barnye Avropa məsələləri üzrə nümayəndə statu­sunda İrəvanda olubmuş və Fransanın Er­mənistandakı səfirliyinin açılışına qatılıb. 

Barnyenin Ermənistana ikinci səfə­ri isə vurğuladığımız kimi, 2021-ci ildə, daha dəqiq desək, həmin ilin dekabrında reallaşıb. Sən demə, o, həmin vaxt mühari­bədən əziyyət çəkənlərlə həmrəylik nüma­yiş etdirmək istəyibmiş. Elə bu məqsədlə də Qarabağa yollanıbmış və hərəkətinin beynəlxalq hüquqa tüpürmək olduğunun fərqinə varmayıbmış. 

Əslində, Fransada hər şeyi çox yaxşı bilirlər. Yəqin, Barnyeni baş nazir edənlər bunun nə demək olduğunun fərqindədirlər. Artıq tam əminliklə demək olar ki, Fransa­nın ən yüksək rütbəli bir məmuru ölkəmizə ayaq basmaq qadağası ilə üzləşəcək. Pa­ris, necə deyərlər, Azərbaycanla körpüləri yandırmağın bu fazasını özü istədi. Amma onu da nəzərə alaq ki, Barnyenin təyinatı, eyni zamanda, Makronun fransız xalqı ilə də körpülərini yandırması anlamına gələn hadisədir. Ən mühüm məqam da elə budur. 

Qeyd edək ki, Fransadakı hazırkı situa­siyada M.Barnyenin ciddi hökumət forma­laşdırması çətin görünür. Yəni, onun yeni hökumətinin bu il iyunun 30-da və iyulun 7-də keçirilmiş seçkilərdən sonra heç bir partiyanın mütləq çoxluğa malik olmadığı parlamentin üzvləri arasında etimad qaza­na biləcəcəyi mümkünsüz təsir bağışlayır. Elə buna görədir ki, Makron iki aydır baş nazir təyin edə bilmirdi. Nəhayət, o, Bar­nyeni tapıb ki, belə bir mənfi reputasiyalı şəxsin yüksək vəzifəyə gətirilməsi ölkənin siyasi dairələrində də süngü ilə qarşılanıb. 

Məsələn, Fransanın Milli Birlik hərə­katının lideri Jordan Bardella bildirib ki, rəhbərlik etdiyi qurum yeni baş nazirin ümumi çıxışlarını, büdcə ilə bağlı təklif­lərini qiymətləndirib və onların realizə imkanlarına baxaraq qərar verəcək: “Biz tələb edəcəyik ki, alıcılıq qabiliyyətinin yüksəlməsi, təhlükəsizlik və imiqrasiya kimi fransız xalqının qarşısında dayanan başlıca tələblər yerinə yetirilsin. Bunun baş verməyəcəyi təqdirdə, etirazçı siyasi mühit formalaşdırmaq haqqımızı özümüz­də saxlayırıq”. 

Fransız solçular da Barnyenin təyina­tından narazıdırlar. İfrat solçuların lideri Jan Lyuk Melenşon deyib ki, prezident Barnyeni baş nazir təyin etməklə, ölkədə qanunverici hakimiyyət orqanlarına keçi­rilmiş seçkilərin nəticələrini rəsmi şəkildə təkzib etdi. Onun sözlərinə görə, baş nazir seçkidə birincilik qazanmış “Yeni xalq cə­bhəsi”ndən olmadığı üçün seçkilərin nəti­cələri xalqdan oğurlandı. 

“Hakimiyyətin seçkidəki məğlubiyyə­tindən 52 gün sonra Makron özünü avtok­rat saydığını göstərdi”, – deyən “Yenilməz Fransa” sol radikal partiyasının deputatı Matilda Pano vurğulayıb ki, prezident seç­ki məntəqələrinə gələn insanların seçiminə hörmətsiz yanaşdığını göstərib. Pano buna görə də insanları küçələrə çıxmağa və Bar­nyenin təyinatına etiraz bildirməyə çağırıb. Eyni fikri “Yaşıllar”ın lideri Marina Ton­delye də “X” sosial şəbəkəsində yazıb. 

Göründüyü kimi, M.Barnyenin təyi­natına qarşı hiddət var. Bəli, belə təəssürat yaranır ki, Fransada ermənipərəstlərin sa­yı-hesabı yoxmuş. Hesab edirik ki, ölkənin hazırkı siyasi sisteminin ən böyük bəlası da elə budur. Bəla isə bəla gətirir. Qarşıda Fransada 2025-ci ilin büdcə müzakirələri var. Ölkənin hazırda düşdüyü bu bataq­lıqda müzakirələrin Barnyenin formalaş­dıracağı hökuməti məhvə sürükləyəcəyi şübhəsizdir. 

Ə.RÜSTƏMOV
XQ