yaxud “Armenpress”in “Qara dəniz” klubuna sırıdığı sərsəmlik

Məlum olduğu kimi, Er­mənistan dövləti bütün sə­viyyələrdə “Dünyanın kəsiş­məsi” təşəbbüsünü qaldırır və onun yaşadığımız Cənubi Qafqaz regionu ilə bağlı önə­mini vurğulamağa çalışır. Əl­bəttə, bu cəhdlər Azərbayca­nın 44 günlük müharibədən sonra Naxçıvana asan yol məsələsində irəli sürdüyü “Zəngəzur dəhlizi” ideyasına qarşı çıxmaq məqsədini da­şıyır. Avrasiya İqtisadi İttifaqı Ali Şurasının Moskvada iki gün əvvəl keçirilmiş iclası da bu baxımdan istisna olmadı. Baş nazir Nikol Paşinyan ora­da “Dünyanın kəsişməsi”n­dən söz açaraq, onu mühüm iqtisadi paradiqma kimi vur­ğuladı.

Lakin Nikolun Qərbdəki dostları­na arxalanaraq uydurduğu avantü­ranı təbliğ edən təkcə erməni rəs­miləri deyil. Görünür, “Armenpress” informasiya agentliyi də bu işə gi­rişib. Özü də təhrif yolu ilə. Media qurumunun Qara Dəniz İqtisadi Əməkdaşlıq Təşkilatının (QDİƏT) baş katibi Lazar Komaneskudan götürdüyü müsahibə belə deməyə əsas verir. “QDİƏT-in baş katibi əməkdaşlığın vacibliyini vurğuladı və “Dünyanın kəsişməsi” təşəb­büsünü alqışladı” sərlövhhəli mü­sahibənin mətnində L.Komanesku “Dünyanın kəsişməsi” ifadəsini bir dəfə də olsun dilə gətirməyib. Üstə­lik, diqqət yetirəndə görürsən ki, o, jurnalistin sualına cavab olaraq, yalnız ümumi ifadələrlə məhdud­laşıb. Cənab baş katibin konkret nələri dediyini diqqətə çatdıracağıq. Hələlik isə bir məqamı vurğulayaq. 

Deməli, Ermənistan gələn il­dən rotasiya qaydasında QDİƏT-ə sədrlik edəcək. “Armenpress” bu amilə söykənərək bildirir ki, Cənubi Qafqazda və onun hüdudlarından kənarda sülhün və sabitliyin təmin edilməsində regional və transsər­həd əməkdaşlıq vacibdir. Ermənis­tan hökuməti Hayastan və qonşu ölkələr arasında kommunikasiyaları inkişaf etdirmək məqsədi daşıyan “Dünyanın kəsişməsi” təşəbbüsü­nü hazırlayıb və elan edib. Təşəb­büs suverenlik və milli yurisdiksiya, eləcə də bərabərlik və qarşılıqlılıq prinsiplərinə əsaslanaraq, Fars körfəzi, Qara və Xəzər dənizlərini birləşdirir ki, bu da regiondakı bütün ölkələrə böyük kommersiya faydası gətirəcək. Media orqanının sualı isə belədir: Bu iddialı layihəni necə qiy­mətləndirərdiniz?

İndi isə L.Komaneskunun cava­bına diqqət yetirək. QDİƏT-in baş katibi deyib ki, təmsil olunduğu təşki­lat üçün regionun həm iqtisadi, həm mədəni, həm də siyasi problemləri­nin həlli vasitəsi kimi əməkdaşlığın real alternativinin olmadığı aydındır. İndiyə qədərki təcrübə açıq şəkildə göstərdi ki, istər ikitərəfli, istərsə də çoxtərəfli güclü iqtisadi əlaqələr və əməkdaşlıq təkcə iqtisadi inkişaf baxımından faydalı olmayıb, həm də sabitliyə, qarşılıqlı anlaşmaya və mehriban qonşuluq münasibət­lərinin möhkəmlənməsinə, yəni təhlükəsizliyə töhfə verib. “QDİƏT-in əsasını təşkil edən prinsiplər bunlardır. İstər iqtisadi, istərsə də siyasi aspektlərdə bu təşkilatın mövcudluğunun əsasını təşkil edən iqtisadi əməkdaşlıq, həqiqətən, üzv dövlətlər arasında diqqətlə öyrənil­məyə layiq olan səmərəli əlaqələr qurulmadan həyata keçirilə bilməz. Ermənistanın QDİƏT-ə qarşıdakı sədrliyi bu baxımdan yaxşı imkan yarada bilər”, – deyə L.Komanesku fikrini tamamlayıb. 

Bir daha görünür ki, QDİƏT baş katibinin cavabı heç də “Dünyanın kəsişməsi”ni təqdir etmək ruhunda deyil. O, sadəcə diplomatik nəzakət göstərərək, Ermənistanın təşkilata gələcək sədrliyi məsələsində pozitiv fikirlər səsləndirir. “Armenpress” isə həmin fikirləri baş katibin, ümumən, QDİƏT-in “Dünyanın kəsişməsi”nə dəstəyi kimi təqdim edir. Əlbəttə, bu media prinsiplərindən sui-istifa­dədir. 

“Armenpress”in, yəni Ermənis­tanın dövlət informasiya agentliyi­nin yanaşması həm də onu göstərir ki, rəsmi İrəvan QDİƏT-i də özünün avantürizm plasdarmına çevirməyi düşünür. Əvvəldə də bildirdik ki, ha­zırda Paşinyan bu baxımdan Aİİ-ni hədəf seçib. 

R.ƏVƏZ
XQ