Ermənistan baş naziri Nikol Paşinyan, necə deyərlər, ağzını açıb, gözünü yummaqla məşğuldur. O, ölkə hökumətinin dünən keçirilmiş iclasındakı çıxışında bildirib ki, Azərbaycan Ermənistana qarşı ərazi iddiası irəli sürməyə cəhd göstərir.
Paşinyanın belə “münəccim”liyinin, əslində, nə ilə bağlı olduğunu müəyyənləşdirmək o qədər də çətin deyil. Məsələ burasındadır ki, erməni baş nazir ölkəsinin, eləcə də dünya erməniliyinin və ermənipərəst qüvvələrin anti-Azərbaycan ritorikasını körükləmək istəyir. Ancaq məsələ yalnız bunda da deyil...
Qeyd edək ki, Paşinyanın Azərbaycanın Ermənistana ərazi iddiası irəli sürmək istədiyini bildirməsi heç də indinin söhbəti deyil. Görünür, baş nazir ölkəmizin bütün davranışlarını mövcud xüsusda izah etmək potensialını özündə, kifayət qədər, ciddi bəsləyib. Ona görə hər fürsətdə belə sarsaq fikirləri səsləndirməyə öyrəncəlidir.
***
Sarsaqlıqdan söz düşmüşkən, Nikol təbiətinə hakim kəsilmiş bu xüsusiyyətini daha qabarıq şəkildə Ali Avrasiya İqtisadi Şurasının bu il mayın 25-də Moskvada keçirilmiş geniş tərkibdəki iclasında ortaya qoymuş və gülünc vəziyyətə düşmüşdü. Paşinyan toplantıya qonaq qismində qatılmış Prezident İlham Əliyevin söylədiklərinə münasibət bildirərkən, demişdi ki, Azərbaycanın dövlət başçısı çıxışında son illər Ermənistana qarşı ərazi iddialarının irəli sürülməsinə əsas verən ifadədən istifadə edib.
Məlum olduğu kimi, ölkəmizin lideri sözügedən tədbirdə Zəngəzur dəhlizinin perspektiv iqtisadi faydalarından söz açmışdı. Əlbəttə, cənab İlham Əliyevin Nikola cavabı da tutarlı olmuşdu: “Mən, əlbəttə, diskussiya açmaq istəmirəm. Lakin Ermənistana qarşı ərazi iddialarımızın olması barədə ittihamlar səsləndiyinə görə demək istəyirəm ki, bizim belə iddialarımız yoxdur. Mənim sözlərimdə ərazi iddialarının olmasını görmək üçün xüsusi canfəşanlıq etmək və ya güclü fantaziyaya malik olmaq lazımdır. Mənim istifadə etdiyim “dəhliz” sözünə gəldikdə, o zaman mən bu kəlməni dəqiq olaraq “Şimal–Cənub” dəhlizinə münasibətdə də işlətmişəm, bu söz elə həmin dəqiqliklə “Şərq–Qərb” dəhlizinə münasibətdə də istifadə olunur. “Dəhliz” sözü heç də kiminsə ərazisinə göz dikmək demək deyil. Bu, beynəlxalq termindir və düşünürəm, beynəlxalq terminologiya ilə tanış olan insanlar, yəqin ki, ona bu gün Ermənistanın baş naziri kimi məna verməzdilər”.
***
Bəli, Azərbaycan Prezidentinin təbirincə desək, Nikol Paşinyan yenə fantaziyasını işə salaraq, “canfəşanlıq” etməkdədir. O, fikrini Laçın yolunun bloklanması və Qarabağda humanitar böhran kimi qondarma məsələlərə yönəldərək bildirib ki, ölkəsinin “tır”ları yollarda qalmaqdadır. Daha doğrusu, Laçın–Xankəndi yolunun başlanğıcındakı şərti sərhəddə – Həkəri çayı üzərində qurduğumuz nəzarət-buraxılış məntəqəsinə yaxın zonada.
Əlbəttə, nəzərə alsaq ki, Nikol fantaziyasını işə salaraq, Azərbaycan əleyhinə təbliğat aparmaqda püxtələşib, onun həmin “tır”lardakı yüklərin artıq iyləndiyini və kif atdığını söyləməsi də tam mümkündür. Görünür, baş nazir bunu başqa çıxışlarına saxlayıb. Hələlik isə o deyib ki, rəsmi Bakı 10 noyabr 2020-ci il tarixli üçtərəfli Bəyanatın (Azərbaycan, Rusiya və Ermənistan lidelərinin imzaladıqları – red.) şərtlərini kobud şəkildə pozaraq, yük avtomobillərinin Qarabağa doğru hərəkətini əngəlləyir.
Əlbəttə, Nikola və ya onun komandasındakı kiməsə Ermənistanın sözügedən bəyanatın müddəalarını pozub, qeyri-qanuni hərbi birləşmələri Qarabağdan çıxarmadığını xatırlatmağın heç bir faydası yoxdur. Çünki onlar üçün üçtərəfli razılaşma manipulyasiya vasitəsindən başqa bir şey deyil.
Məsələn, həmin sənəddə Qarabağ ermənilərinin Azərbaycanla təmasında hüquqi mexanizmlərin mövcudluğu barədə heç nə olmadığı halda, hazırda erməni iqtidarı məsələni beynəlxalq müstəviyə çıxarmaq yolunu tutur. Bəyanatda Azərbaycanın digər əraziləri ilə Naxçıvan arasında quru yolunun təmin edilməsi öhdəliyi İrəvan üzərinə qoyulsa da, Ermənistan bundan yayınır. Deməli, Paşinyanın Azərbaycan Prezidentinin fikirlərinə qarşı öz aləmində, guya, arqument qoymaq üçün Zəngəzur dəhlizinə “ilişməsi”, elə üçtərəfli bəyanata qarşı çıxmaq idi. Qayıdaq günümüzə.
***
Paşinyanın Ermənistan hökumətinin iclasında səsləndirdiyi ikinci absurd fikrə diqqət yetirək. Nikol deyir ki, bəs, iyunun 15-də Laçın dəhlizi müstəvisində yaranmış insident zamanı, guya, Azərbaycan Ermənistan ərazisinə bayraq asmağa cəhd göstərib və qarşı tərəf buna imkan verməyib.
Maraqlıdır, Azərbaycanla Ermənistan arasında sərhəd xətti müəyyən olunub ki? Nikol və onun komandası iki ildən də artıq bir müddətdə sərhədlərin delimitasiyası və demarkasiyana mane olursa, erməni baş nazir bu fikri hansı haqla dilinə gətirir? Üstəlik, Azərbaycan ərazisində – Qarabağda qondarma erməni rejiminin bayrağının dalğalandığı yerlər var. Nikolun məntiqi ilə yanaşsaq, ölkəmizin hərbçiləri həmin bayraqların asıldığı əraziləri atəşə tutmalıdırlar. Həm də ona görə ki, baş nazir Qarabağ daxil olmaqla, Azərbaycanın ərazi bütövlüyünü tanıdığını bəyan edib...
Bəli, hərbi təxribata, yəni Azərbaycan hərbçilərinə açılan atəşə görə Laçın yolu bağlanmalı idi, bu öz yerində. Əgər Nikol bayraq və ərazi məsələsinə belə ciddi önəm verirsə, o zaman gərək, Azərbaycanın Qarabağ ərazisində anti-terror əməliyyatı aparmasına da dözümlü yanaşsın. Axı, yuxarıda vurğuladığımız kimi, bölgədə erməni hərbi birləşmələri qalmaqdadır. Bakı düşünə bilər və düşünür ki, həmin birləşmələr təhlükə mənbəyidir.
***
Maraqlıdır ki, Azərbaycan hərbçilərinin bayraq sancmaq üçün Ermənistan ərazisinə daxil olduğunu iddia edən və buna görə onlara atəş açıldığını deyən Nikol Paşinyan sərhədlərin delimitasiya və demarkasiyasının aparılmadığını vurğulayacaq qədər həyasızlığa da yol verməkdədir. Onun həyasızlığındakı daha bir motiv isə Prezident İlham Əliyevin “Euronews” telekanalına müsahibəsində bildirdiyi fikirlərə reaksiya zəminindədir.
Nikol deyir ki, cənab İlham Əliyev həmin müsahibədə Azərbaycanın Ermənistana qarşı heç bir ərazi iddiasının olmadığını bəyan etməklə yanaşı, Ermənistanla Azərbaycan arasında sərhədlərin müəyyənləşmədiyini diqqətə çatdırıb. Sən demə, Paşinyan bu fikri də ərazi iddiası kimi görməkdədir. Yenə də fantaziya. Həqiqətən, erməni baş nazirin təfəkkürünün mücərrəd güşəsində bəslədiyi səfeh fikirlər bitib-tükənmək bilmir.
***
Digər tərəfdən, Ermənistan baş naziri, deyəsən, sərhədlərin delimitasiyası və demorkasiyasının, bütövlükdə Bakı–İrəvan sülh prosesinin tərkib hissəsi olduğunu unudub. O prosesin ki, İrəvan ondan yayınır. Belədə Azərbaycan lideri nə deməli idi ki? Əslində məsələ heç bunda da deyil. Prezident İlham Əliyev fikirlərində həmişəki kimi, tam haqlıdır. Dövlətimizin başçısının söylədikləri reallıqla səsləşir və beynəlxalq hüquqa uyğundur.
Paşinyan isə, görünür, jurnalist işlədiyi dövrü yada salıb, saxta gündəm yaratmaq təcrübəsindən faydalanmaq qərarına gəlib. Çünki o, dövlətimizin başçısının fikirlərini kontekstdən çıxararaq, təqdim etmək yolu tutmaqdadır. Yəni, aydındır ki, Azərbaycanın Ermənistana ərazi iddiasının olmadığını bildirməklə, Azərbaycan və Ermənistan arasında sərhədlərin delimitasiyasının və demarkasiyasının aparılmadığını vurğulamaq, tamamilə ayrı-ayrı şeydlərdir və bu fikirləri birləşdirib Bakının ərazi iddiasında olduğunu demək üçün nəinki güclü fantaziya qabiliyyətinə maliklik, eyni zamanda, bitib-tükənməyən sarsaqlıq da lazımdır.
***
Baş nazir Paşinyanın sözlərinə görə, Ermənistan və Azərbaycan arasında sərhədlər 1991-ci il Alma-Ata Bəyannaməsi ilə müəyyən edilib və 2022-ci il oktyabrın 6-da Praqada dördtərəfli görüşdə təsdiqlənib: “Görünür, Bakının planı Alma-Ata Bəyannaməsində təsbit olunmuş Ermənistanla Azərbaycan arasında sərhədə etiraz etmək üçün yer buraxan müddəalarla sülh müqaviləsi imzalamaq və sonra demarkasiya və delimitasiya prosesində Ermənistana ərazi iddiaları irəli sürməkdir”.
N.Paşinyan diqqətə çatdırdığımız iqtibasda yer alan fikirləri ilə tipik erməni xislətinə xas xarakterini ortaya qoyur. Söhbət kələkbazlıqdan, fürsətcillikdən gedir. Nəzərə alaq ki, 44 günlük müharibədən sonra, bütövlükdə, Ermənistan diplomatiyasının fəaliyyəti məhz bu iki element üzərində qurulub. Bu gün rəsmi İrəvan cidd– cəhd göstərir ki, Bakı ilə imzalanacaq sülh müqaviləsində Qarabağ erməniləri ilə bağlı ayrıca müddəa yer alsın. Belə bir bəndin mövcudluğu, heç şübhəsiz, həmin ermənilərin Ermənistanla bağının rəsmiləşməsi anlamına gələcəkdir. Bu isə perspektivdə Ermənistana Qarabağ müstəvisində iddia irəli sürmək üçün hüquqi rıçaq verəcəkdir. Deməli, Ermənistan baş naziri öz iqtidarına xas mənfur xarakteri Azərbaycan hakimiyyəti üzərinə transformasiya etmək kimi uşaqsayağı varianta əl atır.
***
Bəli, göründüyü kimi, Nikol Paşinyan və Ermənistan rəhbərliyi, demək olar, hər gün Azərbaycanla sülhdən yayınmaq üçün müxtəlif bəhanələr qondarmaqdadır. Belə yanaşma, əlbəttə, olduqca ziyanlıdır. Həm də ona görə ziyanlıdır ki, ortada qeyri-səmimi mühit formalaşdırır. Əminliklə söyləmək mümkündür ki, Paşinyan ölkə hökumətinin dünən keçirilmiş iclasındakı fikirləri ilə səmimiyyətsizliyinə yeni “motivlər” qazandırmış oldu.
Ə.CAHANGİROĞLU, “Xalq qəzeti”