Dövlətimizin başçısının dünya birliyi ilə birbaşa dialoqu: dünəndən bu günə
Azərbaycan Prezidenti İlham Əliyevin nüfuzlu “Euronews” telekanalına müsahibəsindəki ayrı-ayrı məqamları təhlil edərkən, gözlərimiz önündə nəinki bu gün Azərbaycan–Ermənistan münasibətləri, Cənubi Qafqazda sülh gündəliyi ilə, o cümlədən, ölkəmizlə bağlı beynəlxalq miqyaslı anti-təbliğatın ayrı-ayrı məqamları canlanır. O təbliğatın ki, müstəqillik qazandığımız ilk günlərdən başlamış və özünün kulminasiya anına 44 günlük müharibə dönəmində çatmışdı.
***
Vətən müharibəsindən, daha doğrusu, 10 noyabr 2020-ci il tarixli üçtərəfli Bəyanatın imzalanmasından sonra, Azərbaycan ictimaiyyətində belə fikir var idi – savaşın psixoloji və daha çətin mənzərəsi başlanacaq. Gözləntilərin özünü doğrultması üçün zamana ehtiyac qalmadı. Tezliklə Ermənistan rəhbərliyinin, erməni lobbi və diaspor təşkilatlarının, o cümlədən, xaricdəki ermənipərəstlərin “hərəkətə keçdiklərini” və ölkəmizə qarşı total antipatiya yaratmağa start verdiklərini gördük. Məqsədləri müharibə nəticəsində yaranmış reallıqları dəyişmək, itkilərini minimuma endirmək, onların yerini doldurmaq, bir sözlə, Azərbaycanın savaş meydanında qazandığı qələbəni informasiya müstəvisində onun əlindən almaq idi. Görünür, tarixdən belə bir şeyin mümkünlüyünü görmüşdülər. Yada salaq ki, Napoleon Fransası ağır məğlubiyyətə uğradıqdan sonra ölkə o zaman imperiyanın xarici işlər naziri olmuş Taleyranın bacarığı sayəsində heç nə itirməmişdi. Ermənistan hakimiyyətində də Taleyranlıq etmək eşqinə düşənlər tapıldı. Bu “işə” xaricdəki “taleyranlar” da qoşuldular.
Müharibədən ötən iki il yarımdan da artıq bir müddətdə Ermənistan hakimiyyəti və ermənipərəstlər, ilk növbədə, media amilindən faydalanaraq, beynəlxalq ictimaiyyətə Azərbaycanın mənfi imicini aşılamağa başladılar. “Prosesə” dünyanın aparıcı kütləvi informasiya vasitələrini qoşdular. Çalışdılar ki, media Azərbaycan əleyhinə qəbul olunması planlaşdırılan hüquqi sənədlər üçün mənəvi mühit formalaşdırsın. Beləcə, beynəlxalq hüququn norma və prinsiplərinin interpretasiyasına girişildi. İndi də eyni “kurs” davam etdirilməkdədir və yenə də media amilindən istifadə olunmaqdadır.
***
44 günlük müharibənin ilk günlərini xatırlayaq. O vaxt beynəlxalq ictimai rəyə təsir göstərən kütləvi informasiya vasitələri, ayrı-ayrı jurnalistlər elə təəssürat formalaşdırırdılar ki, sanki Azərbaycan işğalçıdır. Qanlı qarşıdurmanın ölkəmizin ərazisində getdiyinin fərqinə varan, demək olar ki, yox idi. Saxta sentimentallıq havasına köklənmiş bəyanatlar Bakını humanist dəyərlərə hörmətlə yanaşmağa çağırırdı. Beləliklə, beynəlxalq ictimai rəy yanlış yönləndirilirdi.
Lakin günlər keçdikcə biz bu mənfi tendensiyada tədrici dəyişikliklərin yarandığına şahidlik etdik. Azərbaycanın dirənişi fonunda ölkəmizə qarşı köklənmiş qüvvələr sanki yoruldular, emosiyaları bir kənara qoyaraq düşünməyə başladılar. Gördülər ki, əslində işğalçılıq edən Ermənistanın özüdür. Ancaq, demək olmaz ki, bu düşüncə heç də yalnız kimlərinsə Bakının dirənişi və qətiyyəti sayəsində yorğun, çarəsiz duruma düşməsinin məhsulu kimi meydana çıxdı.
Bəli, 44 günlük müharibə dönəmində Azərbaycan cəmiyyəti kimi, media orqanları da mütəşəkkillik nümayiş etdirdilər. Qarabağ həqiqətlərini, işğal reallıqlarını dünyaya daha sistemli və ardıcıl şəkildə çatdırdılar. Ancaq bu məqamı xüsusi vurğulamağa ehtiyac var – Vətən müharibəsi günlərində Azərbaycanın informasiya blokadasının aradan qaldırılmasında başlıca rolu o oynadı – Azərbaycan Prezidenti cənab İlham Əliyev.
***
Dövlətimizin başçısı müharibə müddətində dünyanın 30-dan artıq media orqanına müsahibələr verdi. Bu müsahibələr ölkəmizin liderinin beynəlxalq aləmlə birbaşa kommunikasiyası idi. Prezidentə ünvanlanmış bəzi suallar bu kommunikasiyanın nə qədər çətin və ağır proses olduğunu da sübuta yetirdi. Bəzən suallar bütün jurnalistika prinsiplərinə meydan oxuyacaq tərzdə verilsə də, ölkəmizin lideri təmkinini pozmadı, böyük ustalıqla onları cavablandırdı.
Cənab İlham Əliyev özünün ritorik yanaşmaları, faktoloji arqumentləri ilə həmin müsahibələrin məzmununa təsir göstərdi, nəticədə Azərbaycan əleyhinə formalaşdırılmalı olan anti-təbliğat həqiqətlərimizin təşviqi vasitəsinə çevrildi. Məsələyə bu baxımdan yanaşsaq, 44 gün müddətində 30-dan artıq müsahibənin necə böyük təsir qüvvəsinin olduğunun əlavə isbata ehtiyacı yoxdur. Mövcud səbəblərdən də qətiyyətlə söyləmək olar ki, Prezident İlham Əliyev müharibənin informasiya cəbhəsində təkbaşına döyüşdü.
***
Bu gün də əminliklə söyləyə bilərik ki, dövlətimizin başçısı 44 günlük müharibədən sonra, bütövlükdə, Cənubi Qafqaz coğrafiyası müstəvisində yaşanmaqda olan diplomatik və psixoloji savaşın müstəsna informatoru rolunda çıxış etməkdədir. Bu missiya isə obrazlı desək, cənab İlham Əliyevin erudik dünyagörüşünün siyasi çalarlarına tam şəkildə işıq salmaqdadır. O işıqda canlanan mənzərənin adı isə güclü və qüdrətli Azərbaycandır.
Bəli, yalnız cəmiyyətimiz deyil, bütövlükdə dünya ictimaiyyəti Prezident İlham Əliyevin müsahibələrində, ayrı-ayrı media orqanlarının nümayəndələri ilə təmaslarında qüdrətli, güclə düşüncə arasında düzgün balansı götürməyi bacaran Azərbaycanın əsl böyüklük obrazına şahidlik edir. Bu şahidlik ölkəmiz əleyhinə olan fikirləri dəyişdirir, onları obyektiv məcraya salır. Nəticə etibarilə, dürüst beynəlxalq rəy formalaşır. Daha doğrusu, beynəlxalq ictimai rəy Ermənistanın və ermənipərəstlərin monopolisiyasından çıxaraq, bir növ, cilalanır, obyektivliyə, həqiqətlərə köklənmə imkanı qazanır.
***
Xarici media orqanları ilə təmaslardan söz düşmüşkən, yada salaq ki, Azərbaycan Prezidenti 44 günlük müharibədən sonra ölkəmizdə düzənlənmiş müxtəlif mövzulu beynəlxalq miqyaslı toplantılarda dünyanın nüfuzlu ekspertləri ilə yanaşı, tanınmış kütləvi informasiya vasitələrinin təmsilçilərinin də suallarını ətraflı cavablandırması ilə yadda qalıb. Bəzən sual-cavabların saatlarla çəkdiyini də görmüşük. Onu da görmüşük ki, iştirakçılar toplantıların bitməsini istəmir, Azərbaycan Prezidenti ilə mükalimələrdən zövq alırlar. Nəzərə alaq ki, onlar üçün cənab İlham Əliyevlə ünsiyyət bir tərəfdən Azərbaycan və Cənubi Qafqaz reallıqları ilə bağlı geniş məlumatlanmaq fürsətidirsə, digər yandan bu təmas, bütövlükdə, müasir dünya düzəninin, qlobal transformasiyaların xüsusiyyətləri barədə bilgilər qazanmaq şansıdır.
Bəli, Azərbaycan Prezidentinin dünyanın aparıcı media və ekspert cameəsi ilə müsahibələri, görüşləri yekun nəticədə ölkəmizin dünya birliyi ilə birbaşa kommunikasiyası, mükalimənin açıqlığı və sərbəstliyi baxımından son dərəcə müstəsna amildir. Mövcud kontekstdən yanaşsaq, ən azı “Euronews” telekanalına müsahibə qədər mühüm əhəmiyyət daşıyan Şuşa Qlobal Media Forumunu da vurğulamalıyıq. Nəzərə alaq ki, iyulun 21-23-də keçirilmiş forumda dünyanın yüzdən artıq jurnalisti iştirak edirdi. Onu da nəzərə alaq ki, belə bir toplantının təşkili ideyasının müəllifi də dövlətimizin başçısının özüdür. Prezident İlham Əliyevin tapşırığına əsasən “Heydər Əliyev İli” çərçivəsində və Azərbaycan Milli Mətbuatının 148-ci ildönümü ilə bağlı keçirilmiş tədbir media və informasiya-kommunikasiya sahəsində qlobal səviyyədə mühüm aktuallıq kəsb edən məsələlərin əsl müzakirə meydanına çevrildi. Dünyanın tanınmış və nüfuzlu media rəhbərləri, ekspertləri rəqəmsal dövrdə jurnalistika və kommunikasiyada yeni alətlər, rəqəmsal transformasiya, müasir informasiya mühitində media menecmenti və dayanıqlı media biznes modellərinin yaradılması, yeni mediada istehlak tendensiyaları və media savadlılığı, dezinformasiya və feyk nyusla mübarizə üsulları, jurnalistlərin təhlükəsizliyi və digər məsələləri nəzərdən keçirdilər. Yeri gəlmişkən, bütün bunlar ölkəmizin liderinin Azərbaycan həqiqətlərinin xarici aləmdə təbliği məqsədilə prioritet seçdiyi istiqamətlərin nəzəri və praktik tərəfləri kimi diqqət çəkməkdədir.
***
Bəli, Azərbaycan Prezidenti həmişəki kimi, birbaşa kommunikasiyaya getməkdə, bütün məsələlər üzrə ölkəmizin mövqeyini açıq şəkildə bəyan etməkdə təşəbbüskardır. Bu təşəbbüskarlıq isə heç şübhəsiz, haqqın göstəricisidir. Azərbaycan haqlı olduğu üçün heç nədən, heç bir diskussiyadan və müzakirədən çəkinmir.
Əlbəttə, diskussiyalara və müzakirələrə ehtiyac duyduğumuzu da vurğulamalıyıq. Mövcud anlamda cənab İlham Əliyevin Şuşa Qlobal Media Forumunda səsləndirdiyi fikirlərə diqqət yetirək: “Bu gün isə biz yenə də öz həqiqətlərimizi sübut etməyə məhkumuq. Çünki bizə qarşı bu gün yenə də kampaniya davam edir. Bizim Qələbəmizi həzm edə bilməyən, uğurlarımıza qısqanclıqla yanaşan, bizə qarşı açıq informasiya savaşına çıxanlara biz tutarlı, real arqumentlərlə cavab verməliyik və veririk. Məhz bunun nəticəsidir ki, bu gün bütün bu iftiralara, böhtanlara, yalanlara baxmayaraq, Azərbaycanın sözü, Azərbaycan xalqının, dövlətinin haqlı səsi eşidilir və bunun əsas aləti bizim media resurslarımızdır”.
***
Belə bir deyim də var ki, informasiya müharibəsi doğruya bürünmüş yalanın, yalana bürünmüş doğrunun qarşıdurmasıdır. Bu, həmin müharibənin sərt təbiətinə verilmiş təriflərdən biridir. Nəzərə alsaq ki, mövcud trayektoriyada insan, daha doğrusu, şəxsiyyət amili əsas rol oynayır, o zaman həmin şəxsiyyətin özünə əminliyi də başlıca şərtdir. Hər halda əbəs yerə bildirilmir ki, başqalarını inandırmaq üçün ilk növbədə özün-özünə inanmalısan.
Azərbaycan Prezidenti İlham Əliyev müsahibələrində, media təmsilçiləri ilə təmaslarında informasiya müharibəsinin sərt xarakterinə adekvat olaraq doğru, dürüst baxışlarını konseptual əsaslarla çatdırır və faktiki olaraq infosavaşın klassik deyimlərdəki mahiyyətinə alternativ qismində özünün şəxsi keyfiyyətlərindəki səmimiyyəti, prinsipiallığı, iradəni və əzmi ortaya qoyur. Bütün bunlar Ermənistan rəhbərliyinin anti-Azərbaycan təbliğatına, ümumən Cənubi Qafqazda sülh və əminamanlığın qərarlaşmasını istəməyən qüvvələrə qarşı mübarizənin mühüm əhəmiyyət daşıyan ideoloji bazasıdır. Əminliklə söyləyə bilərik ki, bu bazanı formalaşdıran və təkmilləşdirən də məhz Azərbaycan Prezidenti cənab İlham Əliyevdir.
Əvəz RÜSTƏMOV, “Xalq qəzeti”