Hər zaman səhnədə azyaşlı tamaşaçılara sevgini, sədaqəti və inamı təlqin edən Azərbaycan Dövlət Kukla Teatrı bu mövsüm də ənənəyə sadiq qaldı. Balacalara vəd etdiyi sürprizlərlə onların könlünü oxşadı, estetik tərbiyə ünvanı kimi üzərinə düşən öhdəliyi daha uğurla tamamladı.
93-cü mövsümə iyulun 14-də “Dovşanın ad günü” nağıl-poeması ilə yekun vuracaq sənət ocağının kollektivi il ərzində bir-birindən maraqlı tamaşalar göstərib, müxtəlif qastrol səfərlərində olub, yerli və beynəlxalq festivallarda iştirak edib. Teatrın baş rejissoru Anar Məmmədov bildirdi:
– Bu mövsüm özümüz də iki festivala evsahibliyi etmişik. Bunlardan biri Azərbaycan və Türkiyə kuklaçılarını bir araya gətirən sənət bayramı – III Beynəlxalq Hadi Poyrazoğlu Kukla və Qaragöz Festivalı idi. Türkiyənin müxtəlif teatr və sənət mərkəzlərində və Azərbaycanda qonaq kukla tetrları bir araya gəlmişdi. Yaradıcı heyətimiz qardaş ölkə tamaşaçılarına M.F.Axundzadənin “Müsyö Jordan və Dərviş Məstəli şah” marionetini və xalq nağılı əsasında səhləşdirilən “Məlikməmməd” kukla tamaşalarını təqdim etdi.
Sonra Türkiyədə keçirilən XX Beynəlxalq Bursa Qaragöz Kukla və Kölgə Oyunları Festivalına qatıldıq. Orada türkiyəli kukla və uşaq teatr təmsilçiləri ilə yanaşı, Azərbaycan, Qazaxıstan, Özbəkistan, Türkmənistan və Qırğızıstandan kuklaçılar yer almışdı. Beynəlxalq Kukla Teatrları Assosiasiyası və ona üzv olan ölkələrin nüfuzlu kukla teatrı mütəxəssislərinin də qatıldığı festival çərçivəsində yaradıcılıq istiqaməti üzrə müxtəlif mövzularda müzakirələr aparıldı.
Bundan başqa, teatrın direktoru, Əməkdar mədəniyyət işçisi Rəşad Əhmədzadənin rəhbərlik etdiyi qrup Gürcüstanın paytaxtı Tibilisi şəhərində keçirilən Uşaq və Gənclər Beynəlxalq Teatr Festivalında uğurla iştirak etdi. Qastrol çərçivəsində tamaşaların hazırlanması, təcrübə mübadiləsi, ustad dərslərinin təşkili, eləcə də spesifik istiqamətlərdə kurs və qısamüddətli təlimlər keçirildi. Həmçinin Rəşad Əhmədzadə Kalininqradda reallaşan ənənəvi “Rus teatrı – xaricdə rus mədəniyyəti institutu kimi” adlı V Beynəlxalq Konfransda ölkəmizi təmsil etdi.
Öz səhnəmizə gəlincə, mövsüm ərzində biz 4 yeni tamaşa təhvil verdik. Bunlar “Dovşanın ad günü”, “Ələddinin sehrli çırağı”, “İtki”, “Melisa” tamaşalarıdır. Bundan başqa, teatrımızın ölkədaxili səfər proqramı da geniş oldu. İşğaldan azad olunan Şuşa, Laçın, Zəngilan, Füzuli, eləcə də Hadrud və Talışda çıxışlar etdik.
Baş rejissor yeniliklərin tətbiq edildiyini də söyləyərək dedi ki, tərtibat baxımından fərqli vasitələrindən istifadə ilə hazırlanan əsər gənc yazar Sevinc Elsevərin “Lokomotiv və vaqonlar” pyesi əsasında hazırlanan eyniadlı tamaşadır. Bu yeni tamaşada uşaqlara köhnə qatar stansiyasındakı qoca və lovğa Lokomotivin timsalında xudbinlik və kobudluğun lazımsız xüsusiyyətləri, bu keyfiyyətlərin ətrafdakılar tərəfindən daim mənfi qarşılandığı göstərilir.
Səhnə əsərinin premyerası növbəti mövsümün əvvəlinə nəzərdə tutulur.
Ceyhun ALIŞLI
XQ
