Milli Məclisin yaz sessiyasının sonuncu plenar iclası keçiri­lib. Spiker Sahibə Qafaqova əvvəlcə Milli Məclis nümayəndə heyətinin İnkişaf etməkdə olan kiçik ada dövlətlərinin “Daya­nıqlı firavanlıq üçün istiqamətin müəyyən olunması” mövzu­sunda 4-cü Beynəlxalq Konfransında iştirakı, səfər çərçivə­sində keçirilən görüşlər və Prezident İlham Əliyevin konfrans iştirakçılarına müraciətinin oxunması barədə məlumat verib. 

Gündəliyin birinci məsələ­si barədə Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili məlumat verərək cari ilin yan­var-aprel aylarında Azərbaycan iqtisadiyyatında yaranmış əlavə dəyərin 38,2 milyard manat, iqti­sadi artım tempinin 4,3 faiz təşkil etdiyini diqqətə çatdırıb. O, ar­tımın tamamilə qeyri neft – qaz sektoru hesabına təmin edildiyini və bu dövrdə iqtisadiyyatın bu sahəsində 24,2 milyard manat­lıq məhsul istehsal olunduğunu bildirib. Dövlət büdcəsinin gəlir­ləri proqnozdan əlavə 1 milyard 115,1 milyon manat olub, xərclər isə 123,6 faiz icra olunub. İxracın miqdarı isə idxala nisbətən 2,5 milyard dollar çoxdur. Qeyd edilib ki, yenidən baxılacaq 2024-cü il icmal büdcənin əsas parametrlə­rinə dair icmal büdcənin gəlirləri 43 milyard 480 milyon manat, xərcləri isə 45 milyard 592 milyon manat proqnozlaşdırılır.

Sonra Hesablama Palatası­nın sədri Vüqar Gülməmmədov “Azərbaycan Respublikasının 2024-cü il dövlət büdcəsi haqqın­da” Qanununda dəyişiklik edil­məsi barədə” qanun layihəsinə Hesablama Palatasının rəyini təqdim edib. Sədr bununla yana­şı, “Dövlət sosial müdafiə fondu­nun 2024-cü il büdcəsi haqqında” və “İşsizlikdən sığorta fondunun 2024-cü il büdcəsi haqqında” qa­nunlarda dəyişiklik edilməsi barə­də” qanun layihələrinə dair He­sablama Palatasının rəylərini də diqqətə çatdırıb. Qanun layihəsi səsə qoyularaq birinci oxunuşda qəbul edilib.

Sonra S.Qafarova iyun ayın­da Milli Məclisin növbədənkənar sessiyanın çağrılacağını bildirib. O vurğulayıb ki, ali qanunverici orqan Prezident İlham Əliyevin Andiçmə mərasimində söylədiyi proqram xarakterli nitqində Azər­baycan dövlətinin yeni dövrün tələblərindən irəli gələn vəzifələ­rini müəyyən edib və Milli Məclis yaz sessiyasındakı fəaliyyətini həmin vəzifələrə və onlardan irəli gələn tələblər səviyyəsində qurmağa çalışıb. Spiker həm­çinin deyib ki, sessiya ərzində parlamentin 13 iclası keçirilib, 61 qanun qəbul edilib. Yəni, 2 yeni qanun qəbul olunub, 50 qanunda dəyişiklik aparılıb, 9 beynəlxalq müqavilə təsdiq olunub.