“Dumanlı Albion”da bir çox nazir buna inanmır
Böyük Britaniyada hakim Mühafizəkarlar Partiyasının bir hissəsi müxalifətin populyarlığının artması fonunda hakimiyyətdə qalmaq məqsədilə parlament seçkilərinə qədər ölkənin Baş naziri Rişi Sunakın istefasına nail olmaq niyyətindədir. Bu haqda Britaniyanın populyar “The Times” qəzeti sensasiyalı xəbər yayıb.
Qəzet yazır: “ Qiyamçı qrup Londonun mərkəzində yerləşir. Deyilənlərə görə, onlar mühafizəkarlardan olan 10 deputatla işləyirlər və Sunakı vəzifədən kənarlaşdırmağı planlaşdırırlar”. Bu qrupa ölkənin keçmiş daxili işlər naziri Suella Braverman da daxildir. Qəzetə informasiya sızdıran mənbənin məlumatına görə, Braverman həmçinin yeni baş nazirin seçilməsinə zərurət olduğuna qəti əminliyini də bildirib.
Sunakın əleyhinə olanlar qəti əmindirlər ki, mayda mühafizəkarları yerli seçkilərdə bir sıra fəlakətli nəticələr gözləyir. Bu səbəbdən onlar istəyirlər ki, 3 ay müddətində Mühafizəkarlar Partiyasından kifayət sayda parlamentarilərin dəstəyini əldə edəndən sonra, partiyadaxili mübarizəyə başlasınlar. Buna baxmayaraq, hökumətin bir çox üzvləri “qiyamçılar”ın Sunak üzərində qələbə çalacaqlarına inanmırlar.
Yeri gəlmişkən, ötən ilin dekabrında “YouGov” şirkətinin 14 min respondent arasında apardığı rəy sorğusunun nəticələrinə görə, Britaniya Baş nazirinin reytinqinin rekord həddə aşağı düşdüyü qeydə alınıb. Sunaka olan inam bir ay ərzində 10 bənd azalıb. Sorğu iştirakçılarının 73 faizi Sunak haqqında neqativ fikir bildirib, bununla yanaşı, həmin dövrdə respondentlərin 21 faizinin onun haqqında müsbət fikirdə olmaları məlum olub. Sorğular həmçinin göstərib ki, hökumətin 2024-cü ilin ikinci yarısına planlaşdırdığı parlament seçkilərində mühafizəkarlar 200 deputat mandatını itirmək riski ilə üzləşəcəklər. Hazırkı Sunak hökumətinin 11 naziri parlamentdəki yerini itirə bilər. Onların arasında maliyyə naziri Ceremi Xant da var.
Rişi Sunakın keçmiş müşaviri, partiyadakı həmkarlarından Baş nazirin əleyhinə çıxış edən qrup yaratmaqla məşğul olan Uilli Draya “The Times” nəşrinə verdiyi müsahibədə deyib: “Aydın olur ki, biz, qarşımızda duran çağırışların dəf edilməsini tələb edən ciddi və qəti addımlar atmırıq. Düşünürəm ki, mühafizəkarlar maksimum dağıdıcı məğlubiyyətə doğru getməkdədirlər. Heç şübhə yoxdur ki, qarşıda bizi leyboristlərin onilliklərlə idarəetməsi gözləyir”.
“Qiyamçı” mühafizəkarlar güclü şəkildə səfərbər olunurlar və fikirlərində qətidirlər. Onlar Sunakın miqrasiya siyasətinin qeyri-qanuni miqrantlara qarşı kifayət qədər sərt olmadığını nəzərə alaraq, onun siyasətindən məyus olduqlarını bildirirlər. Baş naziri vəzifədən kənarlaşdırmaq üçün onlara Mühafizəkarlar Rartiyasından olan 53 deputatın səsi lazımdır.
“Politico” nəşrinin keçirdiyi rəy sorğusunda da Mühafizəkarlar Partiyasının reytinqinin son vaxtlar sürətlə aşağa düşdüyü göstərilir. Rəyi soruşulanların 26 faizinin mühafizəkarlara səs verdiyi bir vaxtda, Leyboristlər Partiyası 44 faiz səs qazanıb. Belə davam edərsə, Mühafizəkarlar Partiyasını 1997-ci ildən bugünədək ən böyük məğlubiyyət gözləyə bilər.
Buna qədər bəzi mənbələrin yaydığı məlumatlardan aydın olub ki, Britaniya mühafizəkarları 2024-cü ildə keçiriləcək prezident seçkilərində qalib gələcəyi ehtimalı gündən-günə güclənən ABŞ-ın keçmiş prezidentı Donald Trampa böyük rəğbət bəsləyirlər.
Britaniya Nazirlər Kabinetinin keçmiş üzvü Saymon Klark bildirib ki, Sunakın istefaya getməsi zəruridir. Onun fikrinə görə, Baş nazir onun ölkəsinə nə lazım olduğunu bilmir. Ona görə də Mühafizəkarlar Partiyası öz lideri və ölkənin Baş naziri Rişi Sunakın istefaya getməsinə nail olmalıdır.
Böyük Britaniyanın məşhur “The Daily Telegraph” qəzetində dərc edilmiş məqalədə mühafizəkar deputat, 2019-2022-ci illərdə maliyyə və krallığın regional inkişaf və mənzil tikintisi nazirliklərinin müavini vəzifələrində çalışan Saymon Klark yazıb: “Bizim aydın seçimimiz var. Biz Rişini dəstəkləyə və solçulara Britaniyanı öz istədikləri kimi dəyişdirməyə kart-blanş verə bilərik. Yaxud da liderimizi dəyişib, ölkəyə və partiyaya öz gələcəyi uğrunda mübarizə aparmağa şans verməliyik”.
Klark məqalədə sonra yazır ki, Sunakın intellekt, təmizlik, yüksək işgüzarlıq kimi bütün üstün keyfiyyətlərinə rəgmən, baş nazirin iki təhlükəli çatışmazlığı var. “O başa düşmür ki, Britaniyaya nə lazımdır və nə istədiklərini hayqıran britaniyalıların səsini eşitmir”, – deyə deputat qeyd edir. Klark hesab edir ki, hökumətin miqrasiya siyasəti sərt, iqtisadi siyasəti isə qətiyyətli və radikal olmalıdır.
Bu ərəfədə Avropa ölkələrində keçirilən sorğuların nəticələrini təhlil edən və seçkilərlə bağlı ictimai rəyi öyrənən “Europe Elects” analitik mərkəzinin dərc etdiyi material da Britaniyada gerçək siyasi mənzərəni ortaya qoyub. Qurum qeyd edir ki, Britaniyada keçirilən son sorğular leyboristlərin total üstünlüyünü göstərir. Belə ki, onlar Mühafizəkarlar Partiyasını 23-25 faiz qabaqlayırlar.
Ortaya sual çıxır ki, 26 illik liderlikdən sonra Mühafizəkarlar Partiyasını və onun hökumətini gözdən salan nədir? Birincisi, onu diqqətə çatdırırlar ki, 8 il sonra seçicilər Britaniyanın Avropa İttifaqından (Aİ) çıxmasını neqativ qiymətləndirirlər. “WeThink” təşkilatının bununla bağlı keçirdiyi sorğuya görə, respondentlərin 61 faizi Birləşmiş Krallığın Aİ-yə qayıtmasını dəstəkləyib, ancaq bir şərtlə ki, Londona əvvəlki kimi xüsusi imtiyazlar verilsin. Təəccüblüdür ki, hətta rəyi soruşulanların 39 faizi avronun əsas valyuta kimi qəbul edilməsini dəstəkləyiblər. Bu kifayət qədər ciddi rəqəmdir. Aİ-yə daxil olacaqları təqdirdə funt sterlinqin saxlanmasını isə yalnız 40 faiz insan dəstəkləyib.
İkincisi, heç nəyə baxmadan insanlar ölkədə əsaslı dəyişikliklər edilməsini istəyirlər. Rəy sorğularına əsasən, leyboristlərin potensial seçicilərinin 41 faizi Leyboristlər Partiyasına deyil, 14 ildən artıq hakimiyyətdə olan Mühafizəkarlar Partiyasının əleyhinə səs verməyi planlaşdırırlar.
Bu da ondan irəli gəlir ki, leyboristlər həyatın nəbzini tuta bilirlər. “Tektonik yerdəyişmələr” həm siyasi, həm də sosial aspektlərdə baş verir. Məsələn, Fələstinin birmənalı olaraq tanınması, səhiyyəni və ekologiyanı maliyyələşdirmək addımları bu aspektlərdəndir.
Ən başlıcası isə, lap kobud səslənsə də, mühafizəkarlar sadəcə insanları bezdiriblər və ona görə də leyboristlərin fəaliyyət planının mühafizəkarlardan elə də fərqlənməməsi belə seçiciləri elə də maraqlandırmır.
Britaniyada parlament seçkiləri elə də uzaqda deyil. Bu günlərdə Baş nazir Rişi Sunak bəyan etmişdi ki, krallıqda seçkilər bu ilin ikinci yarısında keçiriləcək və onun bəyan etdiyi kimi seçkilərin ilin ikinci yarısına keçirilməsi “işçi qənaətdir”, mövcud müddət “çoxlu məsələlərin həllinə” imkan verəcək. Sunak bu müddətdə özünün və partiyasının nüfuzunu qaldırmaq üçün “əhalinin vergilərinin aşağı salınmasına” və daha çox tənqidə məruz qaldığı “qeyri-leqal miqrasiya ilə mübarizəyə” diqqət yetirməyə çalışacaq.
Seçkilər isə 2025-ci ilin yanvarına qədər mütləq keçirilməlidir. Ehtimal olunan ən real tarix 2024-cü ilin may ayıdır. Amma Sunakın bəyan etdiyinə baxmayaraq, baş nazir səsverməni ilin sonuna çəkməyə çalışacaq ki, seçicilərin mühafizəkarlara etmadını, az da olsa, bərpa edə bilsin. Buna necə nail olacaq, “qiyamçılar” imkan verəcəkmi? Bunu zaman göstərəcək.
İlqar RÜSTƏMOV
XQ