Söhbət 1945–1946-cı illər Təbrizdə Milli Hökumət qurmuş Azərbaycan Demokrat Firqəsinin mərkəzi nəşri olmuş “Azərbaycan” qəzetindən gedir. Bu yazı isə konkret hadisənin, məsələnin, şəxsiyyətin, əsərin deyil, zəngin mövzular çələnginin səciyyələndirilməsinə həsr olunub..
“Azərbaycan” qəzeti, həqiqətən, elə bir cəzbedici çələngdir ki, onun yolunu – surətinin çap edilməsini hamımız on illər boyu həsrətlə gözləmişik. Kiminsə özündə təpər tapıb onu arxivlərin girovundan qurtaracağının, geniş ictimaiyyətə təqdim edəcəyinin sorağında olmuşuq.
Artıq ümidlərimiz doğrulmaqdadır – bu zəngin salnamə hissə-hisə albom şəklində çap edilir. Alimlər, tədqiqatçılar, geniş ictimaiyyət, müxtəlif dövlətlərdə yaşayan insanlar tərtibçinin Azərbaycan Respublikası Prezidentinin İşlər İdarəsinin Siyasi Sənədlər Arxivində, İranlı Mühacirlər Cəmiyyətinin arxivində aylarla apardığı axtarışlarına verilən dəstəyin nəticələrindən bəhrələnməkdədirlər.
Azərbaycan Demokrat Firqəsinin (ADF) Təbrizdə nəşr olunmuş orqanı ilə tanışlıq üçün daha kiminsə arxivlərə baş çəkməsinə ehtiyac yoxdur. Bu mənada “Azərbaycan” qəzeti, Azərbaycan Demokrat Firqəsinin orqanı (1945–1946-cı illər, Təbriz)" kitabının IV hissəsi də artıq işıq üzü görüb. Burada 1946-cı ilin 5 sentyabr – 11 dekabr tarixlərini əhatə edən daha 80 sayın toplanması yarımçıq çevrəni qapayıb.
Sponsor – ABŞ-ın Şimali Koreya ştatında fəaliyyət göstərən “Azərbaycan Mədəniyyət Mərkəzi”nin Saratoga şəhərində keçirdiyi birinci cildin təqdimat mərasimində bu çoxcildliyin nəşri yüksək dəyərləndirilmişdi. Mərkəzin rəhbəri Həmid Azəri və tədbirin digər iştirakçıları növbəti cildləri də böyük intizarla gözlədiklərini qeyd etmişdilər. Artıq bu arzu gerçəkləşib.
Kitab nəsillərə yadigardır. Məziyyətlərinə varmazdan əvvəl fundamental işdə kimlərin adlarının keçdiyinə aydınlıq gətirilməsi mənəvi borcumuzdur. Söhbət konkret olaraq hansısa şəxsin reklamından getmir. Hesab edirəm ki, onların tanıdılması digər xeyirxah insanları da belə əməllərə kökləyə bilər. Təşəbbüs akademik Şahin Mustafayevə məxsusdur. O, bu təşəbbüsü 2015-ci ildə Şərqşünaslıq İnstitutunun “21 Azər-70” mövzusunda elmi-praktik konfransa hazırlıq çərçivəsində düzənlənən yığıncağında irəli sürmüşdü.
Akademik fikrini bununla əsaslandırmışdı ki, “Azərbaycan” təkcə xalqı 21 Azər Hərəkatının qələbəsinə qovuşduran Azərbaycan Demokrat Firqəsinin orqanı deyil, dövrünün bütün mütərəqqi qüvvələrinin, insanların, tanınmış şəxsiyyətlərinin tribunası olduğundan misilsiz salnamədir. Belə xüsusiyyətləri mətbu nəşrin Təbrizdə çıxmış bütün saylarının toplu şəklində çapını, ictimaiyyətin istifadəsinə verilməsini şərtləndirir.
Təklif institut rəhbərliyi tərəfindən bəyənildi, icraçı şöbə müdiri Səməd Bayramzadəyə həvalə edildi. Etimad şərqşünas və tarixçi alimin dövrə dərin bələdçiliyini təsdiqləyən çoxsaylı elmi-publisistik məqalənin, kitabın müəllifi, hərəkat iştirakçısının övladı, keçmiş diplomat olmasından, digər müsbət keyfiyyətlərindən qaynaqlanıb. Səməd müəllim vəzifəsinin icrasına məsuliyyətlə yanaşmışdır.
XX əsrdə “Azərbaycan”dan da əvvəl və sonra Avropada, Asiyada, Amerikada vətənpərvər, demokratik, mütərəqqi qüvvələrin yüzlərlə mətbu orqanı nəşr edilib. Əksəriyyəti tarixin yaddaşına qovuşub. “Azərbaycan” isə 78 ildir yol gəlir, yenə meydandadır, oxucuları onun hər sayını səbirsizliklə gözləyirlər. Nəyə görə sualının cavabı sadədir: “Azərbaycan” fəaliyyətə başladığı gündən məramına, məqsədinə sadiqdir.
Platformasının fövqündə “12 Şəhrivər” Bəyannaməsində, Azərbaycan Demokrat Firqəsinin proqramında ifadəsini tapan vəzifələrin, 21 Azər hərəkatı ideyalarının müntəzəm geniş təbliği dayandığından, missiyasını fasiləsiz yerinə yetirdiyindən varlığını, populyarlığını qoruyub saxlamaqdadır. Varislik onun Təbrizdən sonrakı saylarının da kitab şəklində çapını gündəmə gətirir.
Ötən əsrin birinci yarısı İranda, xüsusilə Cənubi Azərbaycanda inqilablar dövrü kimi xarakterizə olunur. Seyid Cəfər Pişəvərinin rəhbərlik etdiyi 21 Azər isə özündən əvvəlkilərin – Səttarxan, Şeyx Məhəmməd Xiyabani hərəkatlarının zirvəsi sayılır. Cəngəlilər hərəkatı, Məhəmməd Tağı Xan, Pesyan qiyamı da xalqa əsrlərlə arzusunda olduğu hüquq və azadlıqları bəxş edə bilməyib. Məhz bu baxımdan 21 Azər hərəkatının günümüzədək Qərbin, Amerikanın mürtəce fikirlilərinin, sapı özümüzdən olan “ideoloq”ların total şər, böhtan kampaniyalarının hədəfləri sırasında qalmasının səbəbi aydındır.
Bu öz yerində, əsl utancverici tendensiya budur ki, belələri saxta fikirlərini sırımaq üçün eybəcər hala saldıqları parçaları, sitatları xəcalət çəkmədən “Azərbaycan” qəzetinin adına yazmaqdadırlar. Misallar çoxdur. Qətiyyətlə deyə bilərəm ki, “Azərbaycan” çörəyi saxtakarlıqdan, qəzetə qarayaxmalardan çıxanların kitabını bağlayacaq bir salnamədir.
Nəşr yanlışlıqları aradan qaldırmaq üçün özündə təpər tapanlara gör-götür, faydalanma imkanıdır. Prinsipial məsələlərdə isə məhz özümüz hərəkətə keçməli, xətaları kiminsə aylardan, illərdən sonra aradan qaldıracağına ümid etməməliyik. Başqalarına örnək olaraq ilk nümunəni özümüz ortaya qoymuşuq. Söhbət yazıçı, jurnalist, tədqiqatçı Firudin İbrahiminin 1946-cı ildə Təbrizdəki “Sovet Mədəniyyət Evi” tərəfindən çap edilmiş “Azərbaycanın qədim tarixindən” kitabından gedir. O vaxt bu qiymətli nəşr farscadan dilimizə tərcümə edilərək əski əlifba ilə buraxılıb.
(ardı var)
Rəhim HÜSEYNZADƏ,
Əməkdar jurnalist