Azərbaycan Ordusunun Qarabağ iqtisadi rayonunda keçirdiyi lokal xarakterli antiterror tədbirlərinin 1-ci ildönümü, gözlənildiyi kimi, Ermənistanda da müəyyən reaksiyalarla müşayiət olundu. Əsasən Nikol Paşinyan iqtidarına qarşı müxalifətdə dayanan siyasi qüvvələr, Qarabağdakı keçmiş separatçı rejimin Ermənistan paytaxtına sığınmış qalıqları, eləcə də radikal revanşist mövqeyi ilə seçilən deputatlar, siyasətçilər, politoloqlar ölkəmizin ərazi bütövlüyünün və dövlət suverenliyinin tam bərpası ilə nəticələnmiş tədbirləri özlərinə sərf edən formada şərh etməyə çalışıblar. Bundan əlavə, separatçı tör-töküntülər məlum hadisələrin ildönümünü müxtəlif tədbirlərlə qeyd ediblər. Onlar dünən səhər ölkəmizə qarşı işğalçı müharibədə həlak olmuş şəxslərin dəfn edildikləri İrəvandakı Yerablur qəbiristanlığında olublar.

Qarabağın dağlıq hissəsində və iş­ğal olunmuş ətraf yeddi rayonumuzda 32 il (1991-2023) mövcud olmuş separatçı rejimin sonuncu “qlavar”ı Samvel Şah­ramanyan burada jurnalistlərə yenə də sərsəm açıqlamalar verib. Hadisələrin əsl mahiyyətini təhrif etməyə uğursuz cəhd göstərib və Paşinyan iqtidarını suçlayıb. “Sputnik Ermənistan” agentliyinin “Dağ­lıq Qarabağın lideri” kimi təqdim etdiyi Şahramanyan sosial şəbəkələrdə və media resurslarında “Artsax xalqı”na qarşı infor­masiya təzyiqi və terror barədə danışıb. O, Qarabağ sakinlərinin Ermənistanda dövlət çevrilişi planlaşdıran cinayətkar qruplaş­mada iştirak etməsi ilə bağlı məlumatlara münasibət bildirib və bunu informasiya terrorizminin tərkib hissəsi adlandırıb. Qeyd edib ki, vətəndaşları əsassız ittiham­lardan qoruyacaq qanunvericilik tədbirləri tətbiq etməklə Ermənistanın informasiya məkanını tənzimləmək lazımdır. Şahra­manyan Hayastan parlamentini təkcə ölkə vətəndaşlarını deyil, həm də burada yaşa­yan hər kəsi qorumaq üçün belə qanunlar qəbul etməyə çağırıb.

Baş separatçı onu da deyib ki, “Artsax” sakinləri Ermənistanda tez-tez ağır cinayət­lərdə, o cümlədən maliyyə cinayətlərində ittiham olunurlar. Əlavə edib ki, əgər bu ittihamların əsası varsa, hüquq-mühafizə orqanları onlara hüquqi qiymət verməlidir.

Qeyd edək ki, Şahramanyan bu sözlə­ri deyərkən Ermənistan milli təhlükəsiz­lik xidmətinin əməliyyat-axtarış tədbirləri nəticəsində ölkədə hakimiyyətin zorla ələ keçirilməsinə cəhdin qarşısının alınması­na dair Hayastan istintaq komitəsinin bu­günlərdə yaydığı məlumata istinad edib. Komitədən bildirilib ki, Qarabağdan Er­mənistana gələn iki nəfərin daxil olduğu, ümumilikdə 7 nəfərlik cinayətkar qruplaş­ma ölkədə hakimiyyəti silah gücünə devir­mək məqsədi ilə plan hazırlayıb: “Araş­dırma zamanı müəyyən edilib ki, həmin qanunazidd əməlin icrası üçün bu şəxslə­rin hər birinə 3 ay ərzində hər ay 220 min rubl ödənilməklə onların Rusiya ərazisində təlim keçmələrinə, eləcə də Ermənistana qayıtdıqdan sonra təlimlərdə qazandıqla­rı bilik və bacarıqları ölkədəki müəyyən şəxslər arasında yaymalı olduqlarına dair razılıq əldə olunub. Bir müddət sonra on­lar Rusiyanın Rostov şəhərinə gələrək, bu­radakı “Arbat” hərbi bazasında təlimlərə cəlb edilib, müxtəlif silah və hərbi texnika­dan istifadənin sirlərinə yiyələniblər”.

İstintaq onu da müəyyən edib ki, həmin şəxslərin bəziləri sonradan Ermənistanda dövlət çevrilişinə dair tapşırığın icrasından imtina edib, üç nəfər isə hüquq-mühafizə orqanlarının xüsusi əməliyyatı zamanı sax­lanılıb. İstintaq komitəsindən 4 nəfər barə­sində axtarış elan edildiyi də açıqlanıb.

İndi Şahramanyan bu həbsləri infor­masiya terroru, dezinformasiya, əsassız ittihamlar və sair adlandırmaqla, bir növ özünü sığortalamağa çalışır. Başa düşür ki, təqsirləndirilən şəxslər təhqiqat zamanı Şahramanyanın da bu işdə əlinin olduğunu açıqlayarlar. Necə deyərlər, sonda kələfin bir ucu mütləq gəlib ona çatacaq. Ona görə də qabaqdangəlmişlik edərək, indidən pro­sesi siyasiləşdirməyə çalışır.

Ermənistan parlamentinin sədri Alen Simonyanın bugünlərdə verdiyi “Ermənis­tanla Dağlıq Qarabağ arasında parlament əməkdaşlığı komissiyasının mövcudlu­ğunun artıq heç bir mənası yoxdur, çünki “Arsax” tərəfi öz səlahiyyətlərini itirib” bəyanatına gəlincə, Şahramanyan bunu təəssüf hissi ilə qarşıladıqlarını deyib. Qeyd edib ki, bu cür bəyanatlar, eləcə də “Artsax xalqı”nın qonaq olması və “Art­sax”ın Azərbaycanın bir hissəsi kimi ta­nınması ilə bağlı bəyanatlar dərin yaralar, ağrılar və məyusluq yaradır.

Rejimin sonuncu “qlavar”ı narazılığını bu sözlərlə ifadə edib: “Mən Ermənistan hökumətinin bütün üzvlərinin və xalqının bu cür düşünməsinə ciddi şübhə edirəm. Mənim bu insanlara sözüm yoxdur, onlar bu hökuməti seçmiş Ermənistan vətəndaş­ları qarşısında cavab verməlidirlər”.

Parlamentdəki “Hayastan” fraksiya­sının deputatı Lilit Qalstyan isə ölkəmizi Qarabağda “erməni izlərini yox etmək­də” (?) suçlayıb. Azərbaycanda akkreditə olunmuş səfirliklərin, beynəlxalq təşkilat­ların rəhbər şəxsləri və hərbi attaşelərinin Kəlbəcər rayonuna səfərini hay xislətinə uyğun şəkildə şərh edən Qalstyan iddia edib ki, “Artsaxın erməni izini yox etmək siyasəti” (?) yeni formada təzahür edir. Guya, Azərbaycan diplomatik korpusu öz siyasətinin və təbliğatının iştirakçısına çevirməyi bacarır. Diplomatik korpusun nümayəndələrinin Kəlbəcər rayonunda dünya əhəmiyyətli memarlıq abidəsi olan Xudavəng monastır kompleksini ziyarət etməsi erməni deputata lap yer eləyib. O, qədim alban abidəsi olan monastır komp­leksini “işğal altında olan Dadivank” ad­landırıb. Eyni zamanda, dünya ölkələrinin Qarabağ həqiqətlərini getdikcə daha aydın dərk etmələri deputatı hiddətləndirib: “Xa­tırladım ki, Rossella Fabianinin müəllifi olduğu Vatikanda nəşr olunan “L'Osser­vatore Romano” dövri jurnalında bugün­lərdə “Azərbaycanda xristianlığın mən­şəyi: Alban apostol kilsəsinin izi ilə” adlı məqalə dərc olunub. XIII əsrə aid Dadi­vank və Qandzasar monastır kompleksləri qeyd-şərtsiz Azərbaycan ərazisində alban mədəniyyətinin və alban kilsəsinin ən bö­yük təzahürləri, Azərbaycan xristianlığın beşiyi kimi təqdim edilib”.

O, baş verənlərə görə, N.Paşinyan iqti­darını ittiham edib: “Biz ona görə belə fa­ciəvi hallarla üzləşmişik ki, faktiki olaraq, dövlətçiliyin yoxluğu şəraitində yaşayırıq. Liderlər millətlə dövləti, vətənlə dövləti qarşı-qarşıya qoyublar. Onlar Ermənistanı metodik şəkildə mənəviyyatından məhrum edir, yalan ismarıcların köməyi ilə bizi unutqan, vətəndən, kimlikdən məhrum, idarə etmək asan, cüzi tələbləri olan küt­ləyə çevirirlər”.

Ancaq N.Paşinyan hökumətinin üzvlə­ri də separatçıların və revanşistlərin ünvan­ladıqları ittihamları cavabsız qoymurlar. Sentyabrın 19-da jurnalistlərə açıqlama verən ölkənin iqtisadiyyat naziri Gevorq Papoyan bildirib ki, Ermənistanın sabiq prezidentlərinin Qarabağ üzrə fəaliyyət göstərmələrinin yeganə səbəbi onların ha­kimiyyəti ələ keçirmək şanslarını artırmaq üçün 100 mindən çox etirazçıya malik ol­maq istəyi ilə bağlı idi.

Nazirin sözlərinə görə, Qarabağ onun sonuncu “prezidentinin” imzası ilə təslim olub, Şahramanyanın imzası ilə bütün “dövlət orqanları” da buraxılıb. O əlavə edib ki, bütün bunlar bu adam Qarabağın başçısı olduqdan 10-15 gün sonra baş ve­rib.

Papoyan deyib: “2023-cü ilin sent­yabrında Qarabağda saray çevrilişi baş verərkən Ermənistanın ikinci və üçüncü prezidentləri və onların komandaları bunu nəinki alqışladılar, hətta sevincindən göyə hoppandılar. Bizə dedilər: görün indi Qara­bağda hansı siyasət həyata keçiriləcək. Biz də gördük. Cəmi 10 gün ərzində ikinci və üçüncü prezidentlərin komandaları Dağ­lıq Qarabağın bütün institutlarını “uğurla” ləğv etdilər, bundan sonra Dağlıq Qarabağ da ləğv olundu. Bu qüvvələr Ermənistan hakimiyyətinə təzyiq göstərərək “niyə Dağlıq Qarabağ əhalisinin tezliklə ora­nı tərk etməsi üçün hər şeyi etmirsiniz?” deyirdilər. Keçmiş prezidentlərin 20 ildən çox apardıqları danışıqlar yalnız Dağlıq Qarabağın və ətraf ərazilərin nə vaxt və necə təslim ediləcəyi ilə bağlı olub”.

Göründüyü kimi, Qarabağda ötən ilin bu günlərində keçirilən antiterror tədbirləri ilə bağlı Ermənistanda qarşılıqlı ittihamlar, bir-birini müxtəlif məsələlərdə təqsirlən­dirmək geniş vüsət alıb. Heç şübhəsiz ki, bu ittihamlar qarşıdakı illərdə də davam edəcək. Bu, artıq ermənilərin, necə deyər­lər, alın yazısına çevrilib. Ancaq bu alın yazısını onlar separatçılıq və işğalçılıq si­yasəti yürütməklə özləri yazıblar.

Səxavət HƏMİD
XQ