Bu il oktyabrın 7-də HƏMAS yaraqlılarının İsrail ərazisinə qəfil hücumundan artıq 76 gün keçir. O gündən tərəflər arasında ağır zorakılıqlarla müşayiət olunan amansız müharibə gedir.
Döyüşlərin nə vaxt bitəcəyi bəlli deyil. Dünya birliyinin sülh ilə bağlı çağırışları gözardı edilir. Rəsmi Təl-Əviv HƏMAS yaraqlıları tam məhv edilənə qədər yerüstü əməliyyatları davam etdirəcəyini bildirir.
BBC-nin son məlumatına görə, qarşıdurma zamanı ən azı 20 min Qəzza sakini ölüb, İsrail tərəfi isə 1200 vətəndaşını itirib. HƏMAS-ın ə 200-ə yaxın şəxsi girov saxladığı ehtimal olunur.
Qeyd edək ki, bir müddət əvvəl Qətər dövlətinin təşəbbüsü ilə əldə olunan atəşkəs razılaşması zamanı girovların bir qismi azad edilmişdi. İsrail HƏMAS təslim olmadığı üçün hərbi əməliyyatlara yenidən başladı.
Dünən İsrail Hərbi Hava Qüvvələri (HHQ) Qəzza şəhəri də daxil olmaqla, ətrafdakı yaşayış məntəqələrinə, o cümlədən Deyr əl-Bələhdə yerləşən hədəflərə zərbələr endirib. Bu barədə İsrail mətbuatı məlumat yayıb.
İsrail aviasiyasının Qəzzanın mərkəzindəki Nuseirat qaçqın düşərgəsinə endirdiyi hava zərbələri nəticəsində 18 nəfər həlak olub. Güclü dağıntıların olduğu bildirilir.
Başqa bir xəbərdə isə deyilir ki, İsrail Müdafiə Qüvvələrinin əsgərləri Qəzzada HƏMAS-ın terror məqsədləri üçün istifadə etdiyi xüsusi yeraltı tikilisini aşkar edərək məhv ediblər. Qarşı tərəf bu faktı nə təkzib, nə də təsdiq edib.
İsraildə nəşr olunan populyar “Yedioth Ahronoth” qəzeti yazıb ki, dünən Qəzza zolağının cənubunda yaraqlıların komanda məntəqəsi, rabitə mərkəzi və silah anbarlarının yerləşdiyi yüzlərlə metr uzunluğunda tunel aşkarlanıb.
Tuneldəki binalar enerji və su təchizatı üçün zəruri olan infrastrukturla təchiz olunub. Gizli tunel İsrailin 99-cu hərbi briqadası mühəndislərinin köməyi ilə dağıdılıb.
Son bir həftə ərzində İsrail hərbçiləri Qəzza zolağında terrorda şübhəli bilinən 200-dən çox fələstinlini saxlayıb, ümumilikdə isə 700-dən çox şəxs anklavda keçirilən hərbi əməliyyatlar zamanı həbs edilərək İsrailə göndərilib.
Yeri gəlmişkən, HƏMAS–İsrail qarşıdurması zamanı ağır itkilərə təkcə vuruşan tərəflər məruz qalmır. Belə ki, regionda təmsil olunan bir çox nüfuzlu beynəlxalq qurumların nümayəndələrinin həyatı da təhlükədədir.
Dünən BMT Baş katibi Antoni Quterreş özünün “X” səhifəsində qeyd edib ki, Qəzza zolağında artıq iki ay yarım davam edən qarşıdurma zamanı bu qurumun 136 əməkdaşı həlak olub. Baş katibin sözlərinə görə, bu, BMT tarixində görünməmiş haldır.
A.Quterreş sonra bu sözləri yazıbdır: “Əməkdaşlarımızın çoxu evlərini tərk etmək məcburiyyətində qalıb. Onlara və Qəzza zolağında mülki insanlara dəstək olmaq üçün həyatlarını riskə atan minlərlə yardım işçisinə dərin hörmətimi bildirirəm”.
Bundan əvvəl isə BMT Baş katibinin sözçüsü Stefan Dujarik jurnalistlərə bildirmişdi ki, təşkilatın Qəzza zolağında humanitar əməliyyatları tezliklə iflic ola bilər. Bir çox ölkələr öz vətəndaşlarını münaqişə zonasından təxliyyə etməyə çalışırlar.
HƏMAS–İsrail müharibəsi fələstinli uşaqlar üçün əsl fəlakətə çevrilib. Ərazidən yayılan məlumatlara görə, Qəzzada azyaşlı uşaqların 80 faizindən çoxu kəskin qida çatışmazlığından əziyyət çəkir. Beş yaşa qədər 335 min uşaq isə qida çatışmazlığı riski altındadır.
Təəssüf ki, hələlik HƏMAS–İsrail qarşıdurmasının sonu görünmür. Bundan ən çox əziyyət çəkənlər isə sadə, günahsız insanlardır. Onların ah-naləsini isə heç kəs eşitmək istəmir.
M.HACIXANLI
XQ
