Avtomobil sükanı arxasında sürücülərin keçirdikləri əsəb, gərginlik... Üstəlik, yanacaq xərcləri, ağır tıxaclar, ətraf mühitin çirkləndirilməsi... Bunlar hamımızı narahat edən məsələlərdir. 

Sağlam həyat tərzi keçirən in­sanlar çıxış yolu kimi velosipedi ən yaxşı nəqliyyat vasitəsi hesab edir­lər. Bəziləri isə skuter, moped və di­gər vasitələrdən istifadəyə üstünlük verirlər. 

Bakıda artıq ötən ilin dekab­rından bütün hərəkət iştirakçıları üçün bərabər şəraitin yaradılmasına yönələn mikromobillik infrastrukturu­nun qurulmasına başlanılıb ki, bu da hamımızı sevindirir. Azərbaycan Ye­rüstü Nəqliyyat Agentliyi tərəfindən hazırlanan layihənin ilkin mərhələsi Bakı şəhərinin əsasən mərkəzi his­sələrini – İstiqlaliyyət küçəsi, Azər­baycan prospekti, Mirzağa Əliyev küçəsi, Bülbül prospekti, Fikrət Əmi­rov küçəsi və Bulvar ərazisini əhatə edir. 

Qurumdan qəzetimizə bildirildi ki, hazırda müvafiq nişanlanma işləri Azadlıq prospektinin Füzuli və Şəm­si Bədəlbəyli küçələri ilə kəsişməsin­də aparılır. İndiyədək 3 min 300 metr məsafədə müvafiq nişanlanma işləri aparılıb, yol nişanları quraşdırılıb. 13 məntəqədə isə mikromobillik va­sitələri üçün parklanma yerləri təşkil edilib. Növbəti mərhələdə avtomo­billərlə yarana biləcək mübahisəli nöqtələrin aradan qaldırılması üçün təhlükəsizlik sədləri quraşdırılacaq. Ümumilikdə, 7 kilometrə yaxın mə­safəni əhatə edən 1-ci mərhələ üzrə işlər yekunlaşandan sonra ilk dövri hərəkət təmin olunacaq. 

Bəs bu yollardan necə istifadə olunur? Yol nəqliyyatı eksperti Elməddin Muradlı mikromobillik infrastrukturunun getdikcə ge­nişləndirilməsinin müsbət hal ol­duğunu vurğulasa da, velosiped zolaqlarında hərəkətin hansı for­mada həyata keçirilməsi ilə bağlı bəzi məsələlərin açıq qaldığını dedi:

–Zolaqda qayda pozanlara nə kimi cəza tətbiq olunacaq? Velosi­pedçi ox işarəsinin əksinə hərəkət edərsə, onu hansı cəza gözləyir? Həmin zolağa girən hərəkət iştirak­çılarının yaş həddinə nəzarət olu­nurmu? Bu vasitələrin texniki vəziy­yəti nə yerdədir? Bu məsələlər açıq qalır və qanunvericiliklə tənzimlən­məlidir. 

Ekspert velosiped zolağından hələlik az insanın istifadə etdiyini də diqqətə çatdırdı. E.Muradlının fikrinə əlavə etmək istəyirik ki, bəzi qayda pozuntuları velosiped zolağında hərəkət iştirakçılarına mane olur. Məsələn, avtomobil sürücülərindən kimi mağazadan nə isə almaq, kimi sərnişin gözləmək bəhanəsi ilə zo­laqda park edir, kimi də xüsusi salın­mış yol ilə hərəkət edir. 

Avtomobil sürücülərinin mobillik infrastrukturu ilə bağlı fikirlərini öy­rəndik. Aqşin Cavadov adlı sürücü dedi: 

–Velosiped zolaqları yolların da­raldılması hesabına salınıb, bu avto­mobillərin hərəkətində sıxlıq yaradır. 

Digər sürücü Elçin Camalov:

– Velosiped, moped, skuter­lər qəza halları yaradır. Mobillik infrastrukturunun genişləndirilməsi təhlükəsizliyimiz üçün daha bir zə­manətdir. 

Bakı Şəhər Dövlət Yol Polisi İdarəsinin İctimai qurumlarla əlaqə şöbəsinin baş inspektoru Toğrul Nəsirlinin qəzetimizə verdiyi açıqla­masında ötən il ərzində paytaxt əra­zisində təkcə velosipedçilərin vurul­ması ilə nəticələnən 4 yol-nəqliyyat hadisəsinin qeydə alındığı və qəza­lar zamanı 3 nəfərin həyatını itirdiyi, 1 nəfərin isə yaralandığı bildirilir. 

Gənc velosipedçi Araz Əzimov isə hələlik onların hərəkəti üçün şəraitin olmamasından gileyləndi. Digər hərəkət iştirakçıları da gələ­cəkdə velosiped zolağının daha çox ərazini əhatə edəcəyinə ümid etdik­lərini bildirdilər. 

Diqqətimi səkidə skuterlə hərəkət edən gənc qız çəkdi. Söh­bətləşdik. Səidə Hüseynova 3 ildir avtomobillə işə gedir.

–Hərdən skuter köməyimə gə­lir. Təəssüf ki, velosiped zolağı çox qısa məsafəni əhatə edir. Səkilərlə getmək isə çox çətindir. Həm də utanıram. Ətrafdakılar diqqətlə məni süzürlər – deyə, o əlavə etdi.

Ölkəmizdə mobillik infrastruktu­runun mərhələli şəkildə genişləndiril­məsi və daha geniş ərazini əhatə et­məsi planlaşdırılır. Burada sakinlərin üzərinə də böyük məsuliyyət düşür. Yeniyetməsi məktəbə, böyüyü isə velosipedlə işə gedən danimarkalı­lar kimi, əvvəlcə velosipedi özümüzə ən yaxşı dost seçməliyik. O zaman velosiped zolağında daha çox yol hərəkəti iştirakçısı görəcəyik. 

Leyla QURBANOVA,
Elşən AĞALAR (foto)
XQ