Həddini aşanların acı aqibəti

post-img

Ən qədim peşələrdən hesab olunan xəbərçiliyin zaman keçdikcə özünün ilkin missiyasından uzaqlaşdığı danılmaz həqiqətdir. Cəmiyyətin informasiya tələbatını ödəmək vəzifəsinə ictimai rəylə manipulyasiya etmək taktikası ilə sırınan müasir kütləvi informasiya vasitələrinin boynuna daha “strateji” məşğuliyyətin qoyulması da günümüzün reallığıdır. “Böyük güclərin” çətiri altında fəaliyyət göstərən media-maqnatların yayımlandığı, müxbir məntəqələri açdıqları coğrafiyada fərqli işlərə baş vurmaları, xüsusi idarələrin tapşıqırlarını yerinə yetirmələri, həddini aşaraq, ayrı-ayrı ölkələrdə yerli hakimiyyətləri dəyişdirmək kimi siyasi təxribatlara baş vurmaları ilə artıq heç kəsi təəccübləndirmək mümkün deyil.

Dediklərimizin “parlaq” nümunəsi göz qabağındadır. Söhbət USAID beynəlxalq yardım agentliyindən, “Amerikanın səsi”, “Azadlıq” radiolarından gedir. Xəbərçilikdən çox uzaq əməlləri ifşa edilərək fəaliyyətlərinə xitam verilmiş bu qurumların on illərlə davam edən zərərli texnologiyaların altını Azərbaycan da çəkməkdədir.

Bu media qurumları yayıma başladıqları dövrdən ərazilərində lövbər saldıqları dövlətlərə qarşı siyasi təzyiq aləti kimi istifadə olunub. Onlar, bir qayda olaraq, yerli hakimiyyətə müxalif qüvvələrin dəstəklənməsi və seçilmiş iqtidara qarşı təzyiqlərin artırılması istiqamətində səy göstəriblər. Azərbaycanda fəaliyyət göstərdiyi müddət ərzində bu yardım və media qurumlarının dövlətçiliyimizə və xalqımıza qarşı müxtəlif layihələr adı altında kampaniyalar keçirdiklərinin şahidi olduq. Bundan vaxtında duyuq düşən, onların respublikamızda sərbəst yayım, informasiya siyasətinin altından görünən məkrli niyyətlərinin nəticələrini görən hökumət bununla bağlı lazımi addımları atmalı oldu. Vəziyyət o dərəcədə dözülməz həddə çatmışdı ki, belə bir addımı həmin “zəhər” tribunalarını maliyyələşdirən ABŞ-ın özü atmağa məcbur oldu. Beləliklə, Ağ evin yeni administrasiyası USAID beynəlxalq yardım agentliyinin, “Amerikanın səsi”, “Azadlıq” radiolarının fəaliyyətlərinin dayandırılmasına qərar verdi.

Bundan sonra məlum oldu ki, məlum radiostansiyaların xəbərçilikdən kənar “layihələri” təkcə Azərbaycanda deyil, onların yayım orbitindəki ölkələrdə haqlı narazılıqlara səbəb olurmuş. Bunun isə obyektiv və subyektiv, görünən və görünməyən tərəfləri var.

USAID agentliyi, “Amerikanın səsi”, “Azadlıq” radiosu söz azadlığının, insan hüquqlarının müdafiəsi ilə məşğul olduqlarını iddia etsələr də, reallıqda Azərbaycanda bəzi xarici dövlətlərin maraqlarını təmin etməyə çalışırdılar. Onlar cəmiyyətdə gərginlik yaratmaqla dolayısı ilə deyil, birbaşa Ermənistanın mövqeyinə dəstək verirdilər. Necə deyərlər, separatçılığın müasir formasını fəaliyyət prinsipi kimi qəbul etmişdilər. İndi acı aqibətlərini yaşayan bu qurumların əlindən zinhara gəlmiş ölkələrin başağrıları xeyli səngiyib...

İ.HƏSƏNQALA
XQ

Siyasət