Ermənistan ictimaiyyəti buna görə məhkəməni deyil, baş naziri təqsirləndirir

Bəri başdan deyək ki, məsələnin siyasi çalardan məhrum olmadığı məlumdur. Axı, mübarizəsinin ana xətti hakimiyyətdəki Qarabağ klanına qarşı olan Nikol Paşinyanın 2018-ci ildə “xalq inqilabı” nəticəsində Serj Sarkisyanı kürsüsün­dən devirəndə cəmiyyətə verdiyi ilk vədlərindən biri korrupsiyalaşmış məmur­ları təmizləmək idi. Az sonra İrəvanda ən yüksək postlara yiyələnmiş məhz Qarabağ klanının üzvləri barədə qaldırılan cinayət işləri, ardınca məhkəmə dinləmələri yeni baş nazirin vədinə xilaf çıxmadığından xəbər verirdi. Amma eks-prezident Serj Sarkisyanın büdcəni talaması, bir qrup şəxslə əlbir olub döv­lət vəsaitini külli miqdarda mənimsəməsi təkzibolunmaz sübutlarla ortaya qo­yulsa da, naməlum səbəbdən məhkəmə araşdırması acı bağırsaq kimi uzandı, sonda cinayətkarların azadlıqda qalması ilə nəticələndi. 

İrəvan şəhər məhkəməsi sabiq pre­zident Serj Sarkisyanı, “Flash Oil” şirkə­tinin sahibi Barseq Beqlaryanı və Kənd Təsərrüfatı Nazirliyinin Bitkiçilik De­partamentinin keçmiş rəhbəri Gevorq Arutyunyanı 1,3 milyon dollar dövlət vəsaitini mənimsəməkdə təqsirkar say­madığı barədə qərar çıxarıb. Məhkəmə, sadəcə, bununla kifayətlənməyib, həm də mütəşəkkil cinayətkar dəstənin bü­tün üzvlərinin həbsinin qeyri-mümkün­lüyünü “cinayət təqibi müddətinin başa çatması” ilə əsaslandırıb. 

Sosial şəbəkə xeyli müddətdir ki, məhkəmənin məlum hökmünü eninə-uzununa dartışdırmaqla məşğuldur. Bəli, törətdiyi dövləti cinayətin sübutları göz qabağında olsa da, Serj Sarkisya­na bəraət verilib. 2019-cu ildə açılmış cinayət işində adları keçən təqsirləndi­rilən şəxslərə qarşı beş il bundan əvvəl irəli sürülmüş ittihama görə, Serj Sar­kisyanın təşkilatçılığı, Barseq Beqlarya­nın təhriki, Samvel Qalstyan və Gevorq Arutyunyanın köməyi ilə Ermənistan hökumətinin ehtiyat fondundan 15 mil­yon 391 min 765 litr yanacaq 2013-cü il yanvarın 25-dən fevralın 7-dək Serqo Karapetyan tərəfindən israf edilib. G.A­rutyunyanın məhkəməyə verdiyi ifa­dəsinə görə, dövlət dəstəyi proqram­larının həyata keçirilməsi zamanı dizel yanacağına xüsusilə böyük miqdarda – 489.160.310 dram (1 milyon 266 min ABŞ dolları) subsidiya ayrılıbmış.

Serj Sarkisyan nə beş il əvvəl, nə də indi ona qarşı irəli sürülən ittihamları qə­bul edib. Onun vəkilləri hamısı bir ağız­dan məhkəmə prosesini Hayastanın si­yasi rəhbərliyinin sifarişinin nəticəsi kimi dəyərləndiriblər.

ARAYIŞ: Ermənistanın 3-cü prezi­denti Serj Sarkisyan 2008-ci ildən 2018-ci ilədək ölkəyə rəhbərlik edib. Ona qarşı Cinayət Məcəlləsinin 38 -179-cu maddələri (mənimsəmə və israfçılıq) üzrə ittiham irəli sürülüb. Oğru dövlət başçısının ölkədən çıxışına qadağa qo­yulub.

* * *

Ermənistan KİV-nin yaydığı məlu­matda deyilir ki, indi prokurorluq məh­kəmənin hökmündən yuxarı instansi­yaya şikayət verməyə hazırlaşır. Amma sosial şəbəkədə olayla bağlı paylaşım­larda Sarkisyanın bütün hallarda azad­lıqda qalacağı qeyd olunur. Şəbəkə isti­fadəçilərindən biri yazır ki, “hətta yuxarı instansiya məhkəməsi adları hallanan keçmiş məmurları təqsirli hesab etsə belə, onların oğurladıqları iddia olunan vəsaiti geri qaytarmaları və yaxud həb­sxana cəzası alacaqları ehtimalı azdır”. Digər bir istifadəçi soydaşının qənaə­tini dəstəkləyərək, bəyan edib: “Bu, o deməkdir ki, Nikol Paşinyan son altı ildə torpaq paylamaqdan başqa, sözün əsl mənasında, heç nəyə nail olmayıb”. 

“Nikol Sarkisyanı həbsxanaya gön­dərmək istəmir. Çünki Serj onun qarşı­dakı seçki kampaniyasında ən böyük “sərvəti”dir. Amma bu zaman əsl müxa­lifətin lideri Varujan Avetisyan həbsxa­nada çürüyür”. İzləyicilərlə politoloji fi­kirlərini bu cür bölüşən sosial istifadəçi baş nazirlə bağlı mülahizəsinin ardınca sual edir: “Bunun səbəbini bilmək istə­yirsiniz?”. Sualına özü də cavab verir: “Çünki onun Serjə və tərəfdarlarına qarşı bütün sübutları məhv edən Krem­lin gizli agentləri var. İntəhası, Paşin­yan hakimiyyətə gələndə demişdi ki, dövlətdən, əhalidən oğurluq edən kor­rupsioner oğruların hamısını zindana atacağam. Üstündən altı il keçdi, Serj Sarkisyan, Robert Koçaryan kimi ci­nayətkarlar hələ də azadlıqda gəzirlər (və bundan sonra da gəzəcəklər). Əs­lində, Paşinyan özü də indi korrupsio­ner məmura çevrilib. Ona görə həbsdə olmalıdır. Allah bilir bu hökmü çıxartdır­maqdan ötrü hakimə, prokurora nə qə­dər rüşvət verib...”. 

* * * 

Beləliklə, erməni sosial şəbəkələri Qarabağ klanına güzəştə getdiyi iddia olunan baş nazir Nikol Paşinyanın özü­nü rüşvətxorluqda ittiham edirlər. Sosial ittihamçılardan birinin mövzu ilə bağlı paylaşımı maraq doğurur: “Axı, Paşin­yan başımıza çıxmış Qarabağ ermə­nilərinin bütün bu korrupsiya şəbəkəsini ifşa edən jurnalist olub. Düşünürdüm ki, onun özünün milyardı var, pula ehtiya­cı olmayan vicdanlı və istedadlı jurna­listdir. Baş nazir kürsüsünə oturan kimi bizi korrupsiya girdabından qurtaracaq. Amma, deyəsən, bunu zarafat elədim. Bu da bizim media, tərtəmiz zibildir. Gərək adını dəyişək...”.

Serj Sarkisyanın məhkəmə olayının Paşinyana qarşı düşünülmüş ssenari­nin bir qolu olduğunu istisna etməyərək, onu da xatırladaq ki, indiki vəziyyətdə kənardan idarə olunan keşişlərin baş­çılıq etdiyi “istefa” aksiyalarının sosial şəbəkəyə çıxarılması təmayülü hiss olunmaqdadır. 

P.S. Beş il əvvəl Serj Sarkisyanın Ermənistan tibb mərkəzinin baş həkimi vəzifəsindən azad edilmiş qudası Ara Minasyanın barəsində beynəlxalq axta­rış elan edilib. İrəvan şəhər məhkəməsi onun barəsində qiyabi həbs qərarı çıxa­rıb. A.Minasyanın istintaqdan gizlənmə­si və yerinin məlum olmaması səbəbin­dən barəsində beynəlxalq axtarış elan olunub. O, ağır nəticələrə səbəb olan kommersiya və ya digər təşkilatların sə­lahiyyətlərindən sui-istifadədə, bir qrup şəxslə əlbir olaraq sənədlərin saxtalaş­dırılmasında, böyük məbləğdə maliyyə vəsaitinin israfında və mənimsənilmə­sində təqsirli bilinir. Minasyan dövlətə 1,9 milyon ABŞ dolları həcmində ziyan vurub, 152 min dolları isə şəxsən mə­nimsəyib.

İ.HƏSƏNQALA
XQ