2020-ci il sentyabrın 27-də başlayan və 44 gün davam edən Vətən mühari­bəsində Prezident, müzəffər Ali Baş Komandan İlham Əliyevin yaratdığı ordu illərlə işğal altında qalan torpaqlarımızı düşməndən qarış-qarış təmizlədi, Vətən bütövləşdi. Məhz o günlərdə dövlət başçısı xalqın ürəyindən keçən sözləri deyirdi: “Bu Qələbə bizim xalqımıza yaraşır, igid oğullarımıza yaraşır, dövlətimizə yaraşır və bu Qələbə gücümüzü göstərir”. Məhz o güc Vətən müharibəsindən keçən 3 ilin tamamında ərazi bütövlüyü üzərində dövlətin suverenliyini təmin etdi. 

Bu gün Qarabağda baş verənlər, qəhrəman ordumuzun cəmi bir sutkaya uğurla başa çatdırdığı lokal antiterror əməliyyatı sübut etdi ki, Azərbaycanla heç bir halda şərt, hədə dilində danış­maq olmaz. 30 illik düyünü təkbaşına açan bir ölkənin qarşısında hansısa qeyri-konstruktiv tələblər qoymaq, ya­lançı sülh təşəbbüsləri irəli sürmək yalnız Ermənistanın ziyanına işləyir, bunların heç biri Azərbaycanı öz hədəf­lərindən yayındırmır. 

Hələ Azərbaycan Ordusunun yara­dılmasının 100 illiyi münasibətilə 2018-ci ildə keçirilən hərbi paradda Prezident, Ali Baş Komandan İlham Əliyev demişdi ki, Ermənistan bizimlə heç cür rəqabət apara bilmir və bilməyəcək. Tarixi ədalət bizim tərəfimizdədir, beynəlxalq hüquq bizim tərəfimizdədir, iqtisadi güc bizdə­dir, hərbi güc bizdədir, vətənpərvərlik ruhu bizdədir. 

2019-cu il oktyabrın 3-də isə Pre­zident İlham Əliyev Rusiyada keçirilən Valday Sammitində Ermənistan baş nazirinin regionda yeni siyasi dinamit rolunu oynayan, nizamlama prosesinə ciddi zərbə vuran, Ermənistanın bugün­kü rəzil və rüsvayçı vəziyyətinə gətirib çıxaran “Qarabağ Ermənistandır və nöqtə” bəyanatına cavabında bildirdi ki, “Qarabağ tarixi, əzəli Azərbaycan torpağıdır. Qarabağ Azərbaycandır və nida işarəsi”. Bu bəyanatdan düz bir il sonra– 2020-ci il oktyabrın 3-də Azər­baycan Prezidenti hamının səbirsizlik­lə gözlədiyi xoş xəbəri doğma xalqı ilə paylaşdı, tarixi adını bərpa edən Suqo­vşanda Azərbaycan bayrağı dalğalandı. Azərbaycan Ordusunun şanlı Zəfəri bütün Azərbaycan vətəndaşlarının arzu və istəklərini ifadə edirdi. Bu hadisə həm də 30 ildir ermənilərin öz orduları haqqında yaratdığı “yenilməz Ermənis­tan ordusu” mifini darmadağın etmişdi, Azərbaycan əsgəri təkcə torpağı yox, həm də tariximizi, mədəniyyətimizi iş­ğaldan qurtarmışdı. Vətən müharibəsi­nin ilk dəqiqələrindən xalq öz dövlətinin və ordusunun ətrafında sıx birləşmişdi. Azərbaycan Ordusu tarixi ədaləti döyüş meydanında bərpa etmişdi, Prezident – Ordu – Xalq birliyinin ən ali nümayi­şi olan bu hadisə işğalçıya layiq olduğu yeri göstərmək üçün əsl “olum, ya ölüm” mübarizəsinə çevrilmişdi. O günlər­də xalq bütün dünyaya sübut edirdi ki, Qarabağ azərbaycanlıların milli ləyaqət rəmzidir. Ona görə də Prezident İlham Əliyev deyir ki, xalq, millət anlayışları ön planda olanda istənilən problem həllini tapa bilər və bizim siyasətimiz milli ma­raqlar üzərində qurulub.

Bu qələbənin təmin edilməsi üçün biz bir xalq olaraq, 30 illik yol gəldik. Çox çətinliklər oldu, müstəqilliyimiz dəfələrlə təhlükə altına düşdü. Lakin ulu öndər Heydər Əliyevin qətiyyəti, siyasi səriştə­si sayəsində xalqımız bütün çətinlikləri dəf etdi. O, ölkənin müstəqillik dayaq­larını gücləndirdi, Azərbaycanın siyasi sisteminə dövlətçilik anlayışı gətirdi. 

Məhz bu siyasi bünövrə üzərində qu­rulan və güclənən Azərbaycan Respub­likası Prezident İlham Əliyevin yürütdü­yü siyasət nəticəsində dünya birliyində öz layiqli yerini daha da möhkəmləndir­di. Bu, milli maraqlara söykənən siyasət idi, onun təməlində Azərbaycan xalqının maraqları dayanırdı. 

Çox keçmədi ki, Azərbaycan 155 ölkənin dəstəyini alaraq BMT Təhlükə­sizlik Şurasına qeyri-daimi üzv seçildi, dünyanı narahat edən bir sıra məsələlə­rin həllində əsas söz sahiblərindən biri oldu. Bakı artıq bir çox beynəlxalq təşəbbüslərin reallaşdığı, forumların ke­çirildiyi əsas məkan kimi tanındı. 

Azərbaycan qlobal layihələrin ic­rasına başladı. 2006-cı ildə Bakı-Tbi­lisi-Ceyhan neft kəməri istismara ve­riləndən sonra “Şahdəniz” qaz yatağı kəşf olundu, Bakı-Tbilisi-Ərzurum qaz kəməri çəkildi. Avropanın enerji təhlükə­sizliyində mühüm rol oynayan Cənub Qaz Dəhlizi, TANAP və TAP layihələri uğurla reallaşdı. Asiya ilə Avropanı bir­ləşdirən Bakı-Tbilisi-Qars dəmir yolu xətti fəaliyyətə başladı. Azərbaycan kos­mik ölkələr klubuna daxil oldu. Ölkənin sosial-təsərrüfat infrastrukturu tamamilə yeniləndi. Azərbaycan öz iqtisadi gücü­nü hərbi sahənin inkişafına uğurla trans­formasiya etdi. Silahlı Qüvvələrə ayrılan xərclər artdı, ordu quruculuğu dövlət siyasətinin prioritetləri arasında birinci yerə yüksəldi. Azərbaycan xalqı isə bu siyasətin bəhrəsini Vətən müharibəsin­də və bu yaxınlarda keçirilmiş 23 saatlıq lokal antiterror əməliyyatlarında gördü. Bütün bunlar müstəillik dövründə keç­diyimiz inkişaf yolunu tam mahiyyəti ilə ortaya qoydu. Əldə edilən tarixi Qələbə­nin hansı zəhmət hesabına ərsəyə gəl­məsi barədə hamımızda dəqiq təsəvvür yaratdı. 

Azərbaycanın xarici siyasətdə əldə etdiyi etimad, etibarlı tərəfdaşlıq modeli indi bir çox hədəflərimizə çatmaq üçün bizə heç bir maneə tanımır. Bir vaxtlar Azərbaycanı mənasız danışıqlara inan­dırmağa, yalançı sülh vədlərinin aktual­lığını qorumağa çalışan xarici qüvvələr 3 il öncə ordumuzun döyüş meydanın­dakı məharətindən şoka düşmüşdü. İndi hamı yaxşı bilir ki, Azərbaycanı öz məqsədindən yayındıracaq güc yoxdur. Azərbaycan bütün məqsədlərinə nail olacaq. Prezident İlham Əliyev də deyir ki, Azərbaycan tarixdə heç vaxt bu qə­dər güclü olmayıb. Bunu şərtləndirən əsas amillər isə Azərbaycan dövlətinin siyasətində görünür. 

Prezident siyasi, iqtisadi və digər sahələri əhatə edən islahatlar həyata keçirir. Xalq haqlı olaraq öz Prezidenti­ni dəstəkləyir, onun siyasətinin cəmiy­yətdə vətəndaş həmrəyliyi yaratdığına ürəkdən inanır. Bununla da Prezident İlham Əliyev Azərbaycanda hüquqi dövlət modeli formalaşdırır. Bu prosesə ictimai marağı artırır, insan hüquq və azadlıqlarının yüksək səviyyədə təmin olunması ilə bağlı tədbirlər görür. Bu­günkü uğurların təməlində duran həm də budur: Prezident İlham Əliyevin qalib dövlət və qalib xalq formulu. 

Prezident İlham Əliyev Qarabağ düyününü özü açdı. Bu, Prezident İl­ham Əliyevin xalqı və dövləti qarşısın­da müqəddəs tarixi xidmətidir. Biz indi bir millət olaraq yenidən doğuluruq. Xalqımızda qeyri-adi ruh yüksəkliyi var. Məhz bu əhval-ruhiyyə ilə 30 il ərzində dağıdılmış şəhər və rayonlarımız öz he­sabımıza yenidən qurulur, insanlarımı­zın öz doğma yurdlarına qayıtması ilə azad Qarabağda həyat yenidən canla­nır. Bundan sonra bizim hər uğurumu­zun adı “Zəfər” olacaq. 30 illik Qarabağ həsrətinin tükənən ümidi bu möhtəşəm zəfəri gerçəyə çevirən, ona əbədi ömür verən liderin sayəsində ölmədi, əksinə, “dəmir yumruq” əbədiyyət qazandı. İndi illərlə əsir olan ruhumuz azaddır. Bu azadlığın qüdrəti bizim birliyimizdə, xalqımızın hünərində, tarixdən gələn qəhrəmanlığındadır. 

Günay ABİDOVA,
Nəsimi Rayon Məhkəməsinin hakimi