“Türkiyə ilə Azərbaycan dövləti arasındakı əlaqələr dostluq əlaqələrindən çox yüksəkdir. Bunun tarixi dərinlikləri vardır. Çünki bizim tarixi soydaşlıq və qardaşlıq əlaqələrimiz mövcuddur.” 

Bu fikirləri “Xalq qəzeti”nin Türkiyə təmsilçisinə Türkiyə Prezidenti yanında Təhlükəsizlik və Xarici Əlaqələr Şurası­nın üzvü, professor İsmail Safi bildirib.

İsmail Safinin fikrincə, bu səbəbdən­dir ki, Azərbaycanla Türkiyə arasındakı müttəfiqlik başqa ölkələrlə müqayisə olunmayacaq qədər fərqlidir: “Yaxın keç­mişə nəzər salaq: 44 günlük Vətən mü­haribəsi dövründə Azərbaycan öz hərbi gücü ilə torpaqlarını işğaldan azad etsə də, Türkiyənin və şəxsən Rəcəb Tayyib Ərdoğanın Azərbaycana verdiyi siyasi dəstək nəticəsində “Qarabağ Azərbay­candır, türk yurdudur” faktı bütün dünya­da sübut olundu və bu zəfər təkcə Azər­baycanın deyil, bütün türk dünyasının zəfəri kimi dəyərləndirildi. Ondan sonra qəbul edilən Şuşa Bəyannaməsi isə Tür­kiyə ilə Azərbaycanın əlaqələrinin strateji müttəfiqlik səviyyəsinə qədər yüksəltdi. Məhz bu baxımdan Şuşa Bəyannaməsi bölgədə yeni geosiyasi və geoiqtisadi münasibətlərin başlanğıcını qoydu.

2021-ci ilin yayında baş verən küt­ləvi yanğın fəlakətində Azərbaycan Tür­kiyəyə ilk dəstək verən ölkə oldu. 

Bu ilin fevralında Türkiyədə 11 vilayə­timizi viranə qoyan zəlzələ fəlakətində yaşadığımız ağır, iztirablı günləri Azər­baycan dövləti və xalqı bizimlə barəbər yaşadı və bütün qüvvəsilə köməyini əsir­gəmədi. 

Bu ilin aprelində Türkiyədə keçirilən TEKNOFEST, bizim üçün bir elm, bilim bayramı idi, Azərbaycan ən yüksək sə­viyyədə iştirak etdi. 

Yeri gəlmişkən, onu da deyim ki, bü­tün dünyanın da diqqət mərkəzində olan birinci turu 14 may, ikinci turu 28 mayda keçirilən prezident seçkiləri prosesin­də Azərbaycanın verdiyi mənəvi dəstək demokratik seçkinin qələbəsinə verilən dəstək kimi qəbul edilməlidir. Çünki bu, həqiqətən, səmimi bir dəstək idi. 

Prezidentimizin yeni prezidentlik döv­rü üçün səlahiyyətlərinin icrasına baş­lama mərasimində Azərbaycan dövlət başçısına və xanımına verilən mötəbər yerdən də hər birimiz qürur duyduq. Yəni, bütün bunlar ilk növbədə, hər iki dövlətin eyni soydan olan xalqları tərə­findən arzulandığı üçün baş tutur və heç bir qüvvə bundan sonra iki qardaş xalqın münasibətlərinə xələl gətirə bilməz”. 

R.T.Ərdoğanın Azərbaycana son rəs­mi səfərini şərh edən professor deyib ki, Türkiyədə prezident seçildiyi zaman ilk səfər etdiyi ölkənin birincisi Şimali Kipr Türk Cümhuriyyəti, ilkincisinin isə Azər­baycan olması bir ənənə halını alıb: “Şi­mali Kipr bizim yavru vətənimizdir. Təkcə Türkiyənin deyil, bütün türk dünyasının, eləcə də Azərbaycanın. Amma Kıbrıs türkləri mövzusu bizim üçün nə qədər əhəmiyyətlidirsə, Azərbaycan türkləri də o qədər əhəmiyyətlidir. 

Bu gün Türkiyə ilə Azərbaycan ara­sında əlaqələrin bütün türk dünyasında çox konstruktiv təsiri var, bu da bizi vax­tilə xəyalımıza belə gətirə bilmədiyimiz Türk Dövlətləri Təşkilatının qurulması ilə nəticələnən bir nöqtəyə gətirib çıxar­dı. Bütün bunlar isə Cənab Ərdoğanla Cənab Əliyevin liderliklərinin və xid­mətlərinin nəticəsidir. Odur ki, növbəti dəfə prezident seçildikdən sonra Cənab Ərdoğanın Azərbaycana etdiyi rəsmi dövlət səfərində bütün dünyaya verilən çox ismarışlar vardı”.

Mehparə SULTANOVA, 

Ankara