Mən İranın üç prezidenti – Hatəmi, Əhmədinejad və Ruhani ilə işləmişəm. Bütün bu illər ərzində bugünkünə bənzər vəziyyət yaranmamışdı. Heç vaxt İran bizim sərhədimizdə bir neçə ay müddətində iki hərbi təlim keçirməmişdi. Heç zaman Azərbaycana qarşı bu qədər nifrət və hədə-qorxu ilə dolu bəyanat verilməmişdi.
İlham ƏLİYEV,
Azərbaycan Respublikasının Prezidenti
Hər iki məqsəd təhlükəlidir – “Böyük Ermənistan” da, “Şiə Ayparası” da. Hər iki məram təkcə Tehranla İrəvan üçün deyil, region və Avrasiya üçün də olduqca qaranlıq perspektivlər vəd edir. Məhz ona görə də beynəlxalq aləmdəki mütərəqqi düşüncəli siyasətçi və ziyalılar bu absurd iddiaların qarşısının mümkün qədər tez alınması zərurətini qabardırlar.
Ermənilərin uydurduğu “Böyük Ermənistan” xülyasının təməlində sırf kimlərinsə – bəli, haylar təkcə Azərbaycana deyil, digər qonşulara da ərazi iddiası irəli sürürlər– ərazisi hesabına özlərinə “zırpı” bir dövlət yaratmaq məqsədi dayanır. Yəni əsrlər boyu dünyanın bir çox ərazilərindən qovulmuş – zaman sübut edir ki, onları qovanların hamısı haqlı olmuşdur – hayların bu regionda daha böyük ərazini işğal və ya ilhaq etmək cəhdi təzə məsələ deyil. Bu məkrli və iyrənc məqsədin kökü qədimdir. Bunu normal düşüncə sahibləri bilir və qınayırlar.
İranın absurd və uydurma iddiası isə bu ölkədə İslam Respublikasının yaradılmasından sonra ortaya çıxmışdır. Bu məqsədin təməlində süni olaraq şişirdilən teoloji ixtilaflar dayanır. Ötən əsrin yetmişinci illərinin sonundakı inqilabdan sonra yaranan teokratik dövlət özü üçün “Şiə Ayparası” adlanan xəyali bir ərazi düşünməyə başlamışdır. İyirminci əsrdə dövləti dinlə idarə etməyə başlayan xəyalpərəstlər şiələrin çoxluq təşkil etdiyi ölkələrdə özləri üçün teoloji mərkəzlər yaratmağa, siyasi-ideoloji baza formalaşdırmağa başlamışdılar.
Heç kəsin yadından çıxmayıb. 2017-ci ildə Türkiyə – Azərbaycan münasibətləri yeni mərhələyə qədəm qoyanda İran iddia irəli sürmüşdü ki, Azərbaycan sünni ölkəsinə çevrilir. Onlar haray-həşir qaldırdılar ki, Azərbaycanın Türkiyə və Qazaxıstanla, eləcə də İsraillə olan münasibətləri, guya, ölkəmizdə şiəliyin zəifləməsinə səbəb olacaq.
Tehran ideoloqlarının düşünüb ərsəyə gətirdiyi “Şiə Ayparası” qrupuna əhalisinin əksəriyyətinin şiə müsəlmanları olduğu ölkələr – İraq, Azərbaycan, Bəhreyn, Suriya, Əfqanıstanın bir hissəsi, Yəmən və Livan daxil edilmişdi. Həmin ölkələrin bir çoxunda öz istəklərinin gerçəkləşdirilməsinə açıq şəkildə çalışsalar da, Azərbaycanda bu fəaliyyəti gizli aparırdılar. Hətta, bəzən “Azərbaycanın sünniləşdirilməsi bizi ciddi şəkildə narahat etməlidir” kimi xəbərdarlıqlar səsləndirilirdi. Əslində isə ölkəmizdə kimin sünni, kimin şiə olmasının dövlət üçün heç bir quruşluq belə əhəmiyyəti yoxdur. İnsan hüquqları yüksək səviyyədə qorunan ölkədə məzhəb məsələsi, nəinki dövlətin, hətta ayrı-ayrı fərdlərin də gündəliyində olmayıb və olmayacaq. İnsan hüquqlarına heç bir məhəl qoyulmayan İranda isə bu məsələ həm dövlətin, həm parlamentin, həm də əhalinin gündəliyindədir.
Ekspertlərin fikrincə, İran teoloqları Azərbaycanı qarışdırmaq məqsədlərini gizlətsələr də, ölkəmizin rəhbərliyi bütün incə məqamlardan xəbər tutur və məzhəb qarşıdurmasının gücləndirilməsinə imkan vermirdi. Çünki İranın yuxarıda adını çəkdiyimiz ölkələrdə son onilliklərdə törətdiyi iğtişaşlar – Yaxın Şərqdə, müharibələr, konkret olaraq, İraqda və Suriyada baş verənlər hamının gözü qabağındadır. Həmin ölkələrin bərpasına uzun illər və külli miqdarda vəsait lazımdır. Ekspertlər yazırlar ki, İran Yaxın Şərqdə olduğu kimi, Azərbaycanda da radikal siyasi şiələrin mərkəzi hakimiyyətə tabe olmayan, daha aqressiv dini-teoloji məntəqələrini yaratmağa başlamışdı. Bu baxımdan Nardaran əsas mərkəz, “baş qərargah” rolunu oynayırdı. Ancaq 2015-ci ilin noyabrında İranın teoloji qurğuları ilə idarə olunan və Azərbaycanın dövlət qanunlarına tabeçilikdən yayınmağa çalışan Nardaran “məntəqəsi” mövzusu tamamilə qapandı.
Bu “qapanma” da təsadüfi deyildi. Azərbaycan rəhbərliyi ölkəmizi yuxarıda qeyd edilən fəlakətlərdən qorumaq üçün əhalinin böyük əksəriyyətinin şiə olmasına baxmayaraq, “Şiə Ayparası”nı yaxına buraxmadı. Bununla da Tehranın Bakıya təzyiqləri, təhdidləri, hədə-qorxuları, hətta terror və təxribatları başlandı.
Ancaq bu, əsas fakt olsa da, İranın bizə qarşı düşmənçiliyini şərtləndirən başqa məqamlar da var. Məsələn, ərazilərimizin 20 faizi Ermənistan işğalı altında olanda İran həmin rayon və şəhərlərimizin təbii sərvətlərinin talan olunmasında düşməncəsinə iştirak edib. Dünyadakı narkoticarət şəbəkəsinin fəal üzvü olan İran nakobaronları Azərbaycanın işğal olunmuş ərazilərində otuz il “at oynadıblar”. Azərbaycanın 44 günlük İkinci Qarabağ müharibəsindəki tarixi qələbəsi həmin imkanların hamısını İranın əlindən alıb. Fikrimizcə, Tehranın Bakıya qarşı açıq düşmənçiliyinin səbəbləri arasında “Şiə Ayparası” xülyası ilə yanaşı, bu faktları da axtarmaq lazımdır.
O ki qaldı Azərbaycanın İrana etirazlarına, deyə bilərik ki, bizim heç bir iddia və ya etirazımız səbəbsiz deyil və heç zaman qərəzli olmayacaq. Biz Tehranın İrəvanı silahlandırmasına etiraz edirik. İrana etirazlarımızın əsas səbəblərindən biri də bu ölkənin hərbi-siyasi rəhbərliyinin 2020-ci ilin noyabrında məğlubiyyət aktını imzalamış Ermənistanda revanş əhval-ruhiyyəsinin gücləndirilməsidir. Bu əhval-ruhiyyəni təkcə rəsmi İrəvan yox, həm də Tehran qızışdırır.
Bunlardan başqa, biz Tehranın nəzərinə çatdırırıq ki, İran dövləti Cənubi Azərbaycanda və bu ölkənin başqa ərazilərində yaşayan on milyonlarla azərbaycanlının hüquqlarını tanımalıdır. Dövlət başçımız ötən il noyabrın 25-də ADA Universitetində keçirilən beynəlxalq tədbirdə demişdi ki, Azərbaycanda tədrisin rus dilində aparıldığı 340 məktəb fəaliyyət göstərir. Bununla yanaşı, respublikada 10 məktəbdə tədris gürcü dilindədir. Gürcüstanda 116 azərbaycandilli məktəb var: “İranda tədrisin erməni dilində aparıldığı məktəblər var, ancaq Azərbaycan dilində tədrisin olduğu məktəb yoxdur. Bu, necə ola bilər? Əgər kimsə deyir ki, bu, daxili işlərə müdaxilədir, biz bunu tamamilə rədd edirik. Azərbaycanın xarici siyasəti gün kimi aydındır – biz heç bir dövlətin daxili işinə qarışmamışıq və qarışmırıq. Biz İran məktəblərində Azərbaycan dilində tədris məsələsini ona görə qaldırırıq ki, əks-təqdirdə, ana dilində danışan İran azərbaycanlıları dilin ədəbi komponentini itirirlər və Azərbaycan dili sadəcə məişət səviyyəsində qalır”.
Bəli, siyasi-ideoloji məsələlərdə olduğu kimi, qonşuluq münasibətlərində də bir-birinin “fəaliyyətini tamamlayan” Ermənistan və İran rəhbərliyi bu işbirliyini hansısa mütərəqqi bir məcraya yönəltsələr, daha çox səmərə əldə edə bilərlər. Xəyanət, nankorluq və bədniyyətliliklə isə heç yana gedə bilməyəcək, daim uğursuzluqla üzləşəcəklər.
Təbii ki, biz heç kəsə yol göstərmək, tövsiyə vermək fikrində deyilik. Amma qədim bir Şərq məsəlində deyilir: “Sən xatırlat! Necə qəbul etmək onun işidir”.
İ.QAÇAYEV, “Xalq qəzeti”