Əgər Qarabağın bir ovuc ermənisi Bakının bərabərhüquqlu vətəndaşlarımız kimi Azərbaycanda yaşamaq təklifi ilə razılaşmırsa, onda getsin Marseldə, Kaliforniyada “öz müqəddəratlarını təyin etsin”.
Küləyin səmtinə görə mövqeyini dəyişən Hayastanın baş naziri Nikol Paşinyanın çoxçeşidli cəhdlərinə baxmayaraq, “Dağlıq Qarabağ mövzusu” indiyədək beynəlxalq gündəliyə daxil edilməyib. Bunun tam əksinə, İrəvanın dəstəyinə sığınmağa çalışdığı dünya gücləri rəsmi Bakının “Qarabağ Azərbaycanın daxili işidir” prinsipial mövqeyini qəbul etdilər. Çünki rəsmi Bakı özünün bu mövqeyini BMT-nin müvafiq konvensiyalarına, beynəlxalq hüquq normalarına əsaslanaraq formalaşdırmışdı. Bu səbəbdən də, tam təbii olaraq, Paşinyan hakimiyyətinin “diplomatik hay-küyü” dünyanın mötəbər siyasi arenalarında eşidilməz oldu. Səbəblərin sırasına Azərbaycanın yüksək diplomatik peşəkarlıqla beynəlxalq səviyyədə qəbul olunan gündəliyə uyğun konstruktiv mövqe sərgiləməsini də əlavə etmək lazımdır.
Birinci görüş martın 1-də Xocalı şəhərində, "Azərbaycan ərazisində müvəqqəti yerləşdirilmiş Rusiya sülhməramlı kontingentinin qərargahında" keçirilib. Təşkilatçı rolunda Rusiya sülhməramlıları çıxış ediblər. Bəli, boynuna düşən sülhyaratma missiyasına xəyanət edən həmin sülhməramlı kontingent! Bu məqamda bizə yalnız aşağıdakıları demək qalır: bir görüşün ki təşkilatçısı Qarabağı özünün qara biznes layihələrini gerçəkləşdirdiyi məkana çevirən Rusiya sülhməramlı kontingentin komandanı general-mayor Volkov ola, onun uğursuzluğa düçar olacağı əvvəlcədən bəlli idi. Bununla belə, bütün hallarda sonda uduzan haylar olacaq.
* * *
Məqamı gəlmişkən, Qarabağın xam xəyallarla yaşayan ermənilərin qara taleyinə çevrilmiş siyasi aqibətindən bir yarpağı yaşlı oxuculara xatırlatmağı, gənclərin isə diqqətinə çatdırmağı lazım bildik: 1987-ci ilin dekabr ayında o zaman Sov.İKP MK-nın Baş katibi, üç il sonra isə SSRİ-nin birinci və sonuncu prezidenti olmuş Mixail Qorbaçov Amerikaya rəsmi səfərə getmişdi. Onun Kaliforniya ştatında yerli erməni elitası ilə görüşündə əsas mövzu Dağlıq Qarabağ məsələsinin hayların xeyrinə həll olunması idi. Bu məsələdə tarixin “əzabkeş” ermənilərə qarşı ədalətsiz davrandığını söyləyən Qorbaçov problemi MK-nın Siyasi Bürosuna çıxaracağına söz verir. Bu vədin qarşılığında Amerika Erməni İcması Qorbaçova və onun xanımına erməni əsilli rəssam Ayvazovskinin “Peterburq. Vid na strelku Vasilyevskoqo ostrova” əsərini, zəngin Şakinyan ailəsi isə XVII əsrə aid rus əlyazmalar kitabını hədiyyə edirlər. SSRİ-nin birinci ledisi Raisa Maksimovna Qorbaçovaya isə brilyantla bəzədilmiş qolbaq bağışlanır.
Hiyləgərliklə tamahkarlığın sintezindən yoğrulmuş hay həyasızlığının bütün üsul və taktikaları tükənmək üzrədir. Məkrli məqsədlərinə çatmaq üçün maraqlı tərəfləri pulla, bəxşişlə (xüsusən qadınları ilə) satın almaq üsullarının çoxdan köhnəldiyini anlamaq istəməyən Paşinyanın və erməni diasporunun ağız açmadığı ünvan, döymədiyi qapı qalmayıb. Hansı ünvanlara üz tutmalarından, kimlərin qarşısında diz çökmələrindən asılı olmayaraq, bütün yollar onları Bakının ayağına gətirəcək. Məgər tarix nə vaxtsa məğlub ölkənin bundan fərqli aqibətinin şahidi olubmu?
* * *
Bakının Qarabağ erməni icmasına ikinci görüşün Azərbaycanın paytaxtlarında təşkil edilməsi ilə bağlı təklifi cavabsız qoyması ya onların düşdükləri vəziyyətdən tam hali olmaları, ya da kənar təhdidlərin qarşısında boynubükük qaldıqları qənaətinə gətirir. Düşünürük ki, onların bu yersiz inadkarlığının başqa bir səbəbi də gözlərini qaldırıb mövcud reallığı olduğu kimi görmək və qəbul etmək istəməmələridir. Reallıq isə ondan ibarətdir ki, artıq ermənilərin yaşadığı ərazi də daxil olmaqla, bütün Qarabağ Azərbaycanın hərbi-siyasi nəzarəti altındadır. Bakının iradəsindən kənar bütün gedişlərə, təxribatlara, Qarabağda Azərbaycanın suverenliyinə qarşı atılacaq istənilən addımlara, təhdidlərə müzəffər ordumuz layiqli cavablarını verir və bundan sonra da verəcək. Üstəlik, bir həqiqəti də görməli və anlamalıdırlar ki, onların bel bağladığı nə İrəvan, nə Paris, nə Tehran, nə də Rusiya sülhməramlıları artıq Azərbaycanın sərt və ədalətli mövqeyi qarşısında nəsə edə bilməyəcəklər.
Nəhayət, Qarabağ ermənilərinə yekun sözümüz: əgər iki yüz il bundan əvvəl köçürüldüyünüz Qarabağımızda bu gün də yaşamaq istəyirsinizsə, reallıqla razılaşın. Yoxsa, bunun Azərbaycan ərazisini tərk etməkdən savayı alternativiniz yoxdur. Bu seçim şansı isə sizə Prezident İlham Əliyev səviyyəsində bəyan edilib.
Rasim MUSABƏYOV,
politoloq
Qarabağın erməni icmasının nümayəndələri ilə birinci görüş Rusiya sülhməramlılarının iştirakı ilə Xocalıda baş tutdu. İkinci görüş üçün onları Bakıya dəvət etdik. Qarabağ ermənilərinin Azərbaycana reinteqrasiyası kimi problemlər var. Amma Bakıya gəlmək istəmirlər, deyirlər ki, məsələnin beynəlxalq formatda müzakirəsinə ehtiyac var. Bu o deməkdir ki, Qarabağ ermənilərini təmsil edənlər qanunsuz, cinayətkar, hərbi xuntanın adamlarıdır. Çox desinlər ki, biz onlarla danışığa gedirik, halbuki, hər birinin boynunda konkret cinayət maddəsi var və istənilən vaxt həbs olunaraq dustaqxanaya salına blərlər. Amma biz onlara fürsət veririk ki, gəlin problemləri bir yerdə müzakirə edək. Təki ağıllansınlar. Bir dövlət olaraq bizim qarşımızda kiçik icmanın nümayəndələridir. Sülhməramlılar orada yaşayan 50-60 min ermənidən danışırlar. Özlərinin yalandan bağırdıqları kimi, sayları lap 120 min olsun. Azərbaycanın azı otuz rayonun əhalisi 120 mindən çoxdur. Yəni, ərazisinə və əhalisinin sayına görə onlardan böyük rayonlardır. Azərbaycanda əksər etnik icmaların sayı da ermənilərdən çoxdur. Biz ermənilərin heç bir ölçüyə sığmayan iddiaları ilə hesablaşmalı deyilik. Fəqət bütün hallarda ölkəmizin ərazisində yaşayan və yolunu azmış insanlar üçün haqqın yoluna qayıtmaqdan ötrü qapımız açıqdır. Amma Azərbaycan Qarabağ ermənilərinin adından çıxış edən cinayətkarlarla daha danışıqmaq istəmir. Əlbəttə, vətəndaşlığımızı qəbul edəcək əhali üçün qapımız həmişə açıqdır. Onlara belə bir imkan və fürsət verilib.
İmran BƏDİRXANLI, “Xalq qəzeti”