Milli Məclisin deputatı Fazil Mustafaya qarşı silahlı hücum İranın terrorçu mahiyyətinin növbəti təzahürüdür. Azərbaycan ictimaiyyətinin qənaəti bundan ibarətdir. Əlbəttə, belə düşünmək üçün əsaslar yetərincədir. Ölkənin ayrı-ayrı dairələrinin Fazil bəyin, guya, dünyasını dəyişdiyini iddia edib şadyanalıq etməsindən tutmuş, deputata ünvanlanmış təhdidlərədək, bir çox məqamları vurğulamaq mümkündür. Həqiqətən, çox acınacaqlı durumdur. O boyda ölkənin siyasi sistemi Fazil Mustafanın əlində girinc qalıbmış. Bax, elə budur o sistemin çürük mahiyyətinin göstəricisi. Axı, Fazil bəy heç nə etmirdi, sadəcə, danışırdı, öz fikrini deyirdi. Bu yerdə yadımıza “Nəsimi” filmindəki məşhur epizod düşür. Nəsimini azadlığa buraxan Əmir Teymur buna görə onun həndəvərində dayanan və səs-küy salan saxta dindarlara belə demişdi: hanı sizin kəlamınızın kəraməti? Nə vaxtadək mən baş kəsməklə qələbə qazanacam?!
Əlbəttə, İran terrorla əsla qələbə qazana bilməyəcək. Sözə düşmən münasibəti isə molla rejiminin tərəfdarlarının kəlamının olmadığından xəbər verir. Sual olunur: İrandakı dairələr nə üçün Fazil bəyə qarşı düşmən münasibətdədirlər? Səbəb aydındır. Fazil Mustafa çıxışlarında İranı tənqid edirdi. Nə üçün? Ona görə ki, deputat İranın Azərbaycanda din adı altında apardığı pozuculuğun, bölücülüyün mahiyyətini geniş ictimaiyyətə çatdırmağı vacib sayırdı və haqlı idi. O demirdi ki, nəyə görə, məsələn, Şirazda hansısa dini ayin düzgün icra olunmur və sair. Bəli, Fazil bəy, bilavasitə, İrandakı İslam adına ortada olan klerikal, teokratik baxışlara münasibətdə nə isə söyləmirdi. F.Mustafa o baxışların Azərbaycana transformasiyasından narahatlıq keçirir və bunu müxtəlif tribunalarda, o cümlədən, Milli Məclisdə bəyan edirdi. Etməməliydi?!
Bir çox şeyləri etməməli, etməkdən uzaq durmalı olan, məhz İrandır. Fars molla rejimi özünün Azərbaycan hədəfini unutmalıdır. Unutmalıdır ki, bu ölkə onun düşündüyü kimi, İrandan qopma deyil. Hələ bir qədər tarixə nəzər salıb fikirləşməlidir ki, hazırda bayrağına baxdıqları, himnini dinlədikləri ölkə Səfəvi türk dövlətinin mirasıdır. Teokrat mollaların oturub indi gəldikləri duruma şükür eləməkdənsə, Azərbaycanı tarixi səhv kimi görmələri, yumşaq desək, düzgün deyil. Fazil Mustafa düzgün olmayan bu məqamı, Tehranın ölkəmizdə təsir dairələri yaratmaq istiqamətindəki “fəaliyyətini”, başıpozuq dindar kütləsinin istehsalı üzrə konveyer formalaşdırmaq istiqamətindəki davamlı işlərini tənqid edir, bunun dövlətçiliyimiz üçün zərərlərini anladırdı. Yəni, fakta əsaslanmış sözlə mübarizə aparırdı. Onun sözünə qarşı İrançı dindarların deyiləcək nəyisə var idimi? Xeyr! Onlar hansısa arqument səsləndirə bilirdilərmi? Əsla! Çünki deməyə nə sözləri var, nə də əsasları.
Nə desinlər, deyə bilməzlər, axı. Arazın o tayı ilə bu tayının bir-birindən ayrılması böyük türk varlığına misilsiz təzavüz idi. İki xalqın bir-birindən ayrı salınması cinayət mahiyyəti daşıyırdı. Demələri mümkün deyil ki, Arazın o tayı azad, hürr yaşamaq istədiyi, fars şovinizminin boyunduruğundan xilas yolları barədə düşündüyü üçün, bu tayının azadlığı onlar üçün böyük mənəvi stimuldur. Deyə bilməzlər və ona görə bu tayı zəhərləmək, Azərbaycanda farsbaşlılar hazırlamaq yolu tuturlar. Müqavimət görəndə isə təhqirlərə və təhdidlərə keçirlər. Budur, İranın klerikallığının dəst-xətti. Budur onun mahiyyəti. Məgər İslam təhqir və ya təhdidmi deyir? İslam, hətta, din yolunda olmayanlara münasibətdə də nalayiq rəftarı inkar edir, maarifləndirməni rəhbər tutur. Dinimiz terroru, sui-qəsdi son dərəcə böyük günah görür. İranın isə bu qeyri-insani davranışı sistemləşdirdiyi, ideologiya halına gətirdiyi birmənalıdır.
Belə nəticəyə gəlirik ki, İranın fars molla rejimi özü üçün ayrıca din icad edib, sadəcə, ona təzə ad tapa bilmədiyindən, İslam kimi qələmə verir. Əminliklə demək olar ki, mollaların uydurduqları din İslamı bütün dünyada gözdən salmaq cəhdindən başqa bir şey deyil. Heç şübhəsiz ki, bu cəhd beynəlxalq birliyin müsəlmanlığa qarşı antoqonist baxışlara köklənmiş dairələri tərəfindən ciddi şəkildə idarə olunur. Fazil Mustafa da çıxışlarında bunlardan, İranın din “icadından”, uydurmalarından danışırdı. Danışmamalıydı? Axı görürdü ki, Tehran rejimi müxtəlif vasitələrlə özünün “dindarlığını” Azərbaycana sırıyıb insanımızı zəhərləməklə məşğuldur. Görürdü ki, İran dairələri Azərbaycanın dünyəvi modelinə qəsd ritorikasını işə salıblar. Görürdü ki, Tehran ölkəmizdəki başıpozuqlarının köməyi ilə Bakıda düzənlənən hər vacib tədbir öncəsi Azərbaycanı dünyanın qorxduğu dini fundamentalizmin tüğyan yuvasına çevirmək məqsədli “təşəbbüslər” qaldırır, “kampaniyalar” düzənləyir.
Fazil Musrafa anti-İran baxışlarında tək olmayıb. Müstəqil Azərbaycandakı ictimai fikir hər zaman İranı saxta görüb. Həmişə ziyalılarımız bu ölkəni səmimiyyətdən uzaq sayıblar, belə demək mümkünsə, İran islamçılığını həqiqi dinə həqarət biliblər. Çıxışlarında da bunu bildiriblər. Yazıçı, publisist Rafiq Tağı da zamanında bildirirdi. Nə oldu? Qətlə yetirildi. İran sözün bax belə bir düşmənidir. Həm başqa dövlətin işinə qarışasan, onun varlığını qəbul etməyəsən, həm də bu dövlətin ziyalısına, aydınına qəsd edəsən! Bu qədər həyasızlıq və azğınlıq dolu məkr! İranın dövlət düşüncəsi bu anormallıq üzərindədir. Fazil Mustafa da bu anormallığın hədəfinə çevrildi.
İranın dövlətçilik düşüncəsi özünün bəsit maraqları naminə Ermənistan kimi fəalliyyəti Allahsızlıq olan bir quzğun birləşməsi ilə işbirliyinə əsaslanır. Budur, ölkənin quru qoşunlarının komandanı Kiomərs Heydəri Azərbaycana qarşı çirkin iftiralar səsləndirdiyi açıqlamasında, rejimin Ermənistana təəssübkeşliyini qabardıb və bildirib ki, Tehran onun sərhədlərində dəyişikliyə icazə verməyəcək. Ancaq 30 ilə yaxın müddətdə müsəlman Azərbaycanının sərhədlərinin pozulmasına göz yumdu. Belə din “təəssübkeşidir” İran! Məscidlərdə donuz saxlanılmasına göz yuman şarlatanların idarə etdiyi dövlətdir İran! Müsəlman türklərin dövlətçilik mirasını “mənimsəmiş” kitabsız fars millətçiliyinin İran adı ilə qərarlaşmış dövlətinin mövcudluğu, bütövlükdə türk dünyasına təhdiddir.
Bəli, sonda bir daha deyək ki, türk düşməni Ermənistan kimi, digər türk düşməni fars şovinizmi də sözə düşməndir. Qətiyyən fərqlənmirlər, tam şəkildə tapışıblar. Onlar terror törətməkdə də bir-birlərini tamamlamaqdadırlar. Həm Ermənistan, həm də İran dövlət miqyasında terroru, terrorçunu dəstəkləyən ölkələrdir.
Terror niyyətlilərin sözdən, fikirdən çəkinmələri isə bu hikmətlərin doğruları, reallıqları anlatması məramından irəli gəlir. O reallıqların ki, tarixidir və onların dönə-dönə dilə gətirilməsi İranın bir dövlət kimi saxtalığı, fars imperializminin məhsulu olduğu faktını ölkədəki bütün xalqların yaddaşında möhkəmləndirəcəkdir. Səmimiyyətsizliyin, zülmün və istibdadın dövlət idarəçiliyinə hakim kəsildiyi quruluşlarda belə möhkəmlənmələrin baş verməsi saxtakarlıq üçün ölüm hökmüdür. Bu hökmün İran rejimi üçün də, saxta Ermənistan üçün də çıxarılacağı, şübhəsizdir.
Ə.RÜSTƏMOV, “Xalq qəzeti”