Paqanininin skripkasını “Atəşgah” məbədinə gətirdən soydaşımız ifaları ilə dünyaya səs salıb

Körpəliyindən musiqi ilə nəfəs alan Anarın atası Niyazi ilə işləmiş skripkaçı, anası və bacısı arfa ifa­çıları, dayısı violonçelçi, xalası və 2 xalası qızı fortepiano sənətçisi kimi tanınırlar. Ağlı kəsəndən onun ilk sevimli musiqisi Antonio Vivaldinin “2 skripka üçün konserti” olub. Soydaşımızın həyat yoldaşı Anas­tasiya da piano ifaçısıdır və onunla bir kollektivdə çalışır. 

Anar Bramo (İbrahimov) Almaniyanın Essen şəhərində yaşayan azərbaycanlı vio­lin ifaçısı, dirijor və bəstəkardır. 1981-ci ildə Bakıda doğulub, 5 yaşından skripka çalmağı öyrənib, 14 yaşında filarmoniyada ilk solo konserti verib. 1997-də incəsənət gimnaziya­sını əla qiymətlərlə bitirib. Növbəti ildə Üze­yir Hacıbəyli adına Musiqi Akademiyasına qəbul olunub. 

Musiqi Akademiyasında professor Ba­yandur Mehdiyevin sinfində təhsil almış Anar sonra Almaniyanın Folkvanq İncəsənət, eləcə də, Köln Musiqi və Rəqs Universite­tində oxuyub. 2010-2016-cı illərdə Almani­yada Südvestfalen Filarmonik Orkestrinin köməkçi konsertmeysteri vəzifəsində çalı­şıb. 130-dan artıq peşəkar orkestrin olduğu Almaniyada, necə deyərlər, özünü göstərə bilib. İndi Attendorn Kamera Orkestrinin baş dirijoru və Oberberq simfonik orkestri­nin dirijorudur. O, tez-tez dünyanın müxtəlif ölkələrində çoxsaylı orkestrlərlə çıxışlara və müxtəlif festivallara solist kimi dəvət olunur. Səsi-sorağı Qız qalasından Köln kafedralına qədər yayılıb.

2002-ci ildə həmyerlimizin solo ifasına heyran qalan İtaliyanın Azərbaycandakı səfi­ri Marqarita Kostanın təşəbbüsü və Genuya Şəhər İdarəsinin icazəsi ilə Nikollo Paqani­ninin “Sivori” violinisinin Anarın Bakıda ifa etməsi üçün 2 günlük Azərbaycana gətirilmə­si mühüm hadisələrdəndir. O zamana qədər 180 il ərzində Genuyada muzeydə saxlanılan “Sivori” violini cəmi 12 ifaçı tərəfindən səs­ləndirilmişdi.

Soydaşımız deyir ki, konsertdən 1 gün öncə məşq edən zaman bərk həyəcanlı olub, qorxub ki, çox böyük tarixi dəyəri olan həmin skripkanı əlindən yerə salar. Amma Atəş­gahda keçirilən konsertdə tez “isnişiblər” və Qara Qarayev adına Kamera Orkestrinin müşayiəti ilə Anarın virtuoz ifası yetərincə romantik ruhda keçib. Bir neçə il sonra Ge­nuyada olarkən muzeyə gedib və Paqanininin misilsiz yadigarında musiqi ifa etmiş 13-cü ifaçı həmin alətlə bir daha “görüşüb”. 

2006-cı ildə, o, Parisdə Hektor Berli­oz Milli Assosiasiyasının “Hektor Berlioz” medalına layiq görülüb. 2020-ci ildə yazdığı “Ürəyim Şuşa” mahnısı Heydər Əliyev Fon­du tərəfindən Bakı Media Mərkəzinin birba­şa dəstəyi ilə lentə alınaraq ilk olaraq vətəni Azərbaycanda, sonra isə Berlin Filarmoniya­sında təqdim olunub. Şuşanın alınmasına 1 gün qalmış ərsəyə gələn bu kompozisiyada yurd sevgisi, inam ruhu, zəfər sevinci çulğa­laşıb. Sözləri Çexiyada yaşayan soydaşımız Leyla Bəyimə, Azərbaycan, rus və ingilis dillərində səs ifaları Sevda Ələkbərzadəyə, Orxan Cəlilova və Ülviyyə Salayevaya aid­dir. Dirijorluğu Anarın tələbə yoldaşı və dos­tu, şuşalı Fuad İbrahimov edib. Mahnının fortepiano partiyasını isə sevimli Anastasiya yazıb.

2023-də dünya şöhrətli azərbaycanlı skripkaçı və dirijor Anar Bramo Rumıniyada keçirilən beynəlxalq dirijorlar müsabiqəsinin xüsusi mükafatına layiq görülüb. Müxtəlif ölkələrdən 70 dirijor Buxarest simfonik or­kestri ilə çıxış edirdi. Anarın dirijor kimi ilk sınağı idi.

Ötən ilin dekabrında Berlində “Heydər Əliyevin 100 illiyinə həsr olunan konsertdə parlaq çıxış edib. Ondan öncə Şuşada gözəl çıxış edib. Musiqi kompozisiyalarından ibarət “Şuşa” və “Young Blood” (“Gənc qan”) albomları populyardır. Hər ikisinə sevə-sevə qulaq asmışam. Vətən üçün, qo­humları və dostları üçün darıxan, Bakını əsl cənnət guşəsi adlandıran Anar bura tez-tez gəlib çıxışlar etməyi vəfa borcu sayır. Odur ki, dəfələrlə Bakıda konsertləri olub. 

İki həftə öncə Anarın paytaxtımızda so­nuncu çıxışı musiqisevərlər arasında “Ba­kıda Karmen fantaziyası” kimi dastan olub. Proqramda Yohannes Bramsın “Yozef Haydn mövzusuna variasiyalar”ı, Maks Bruçun Vi­olin və orkestr üçün 1 saylı konserti, Alek­sandr Borodinin “Knyaz İqor” operasından “Qıpçaqların rəqsi” və Jorj Bize–Frans Vaks­man–Anar Bramonun “Karmen fantaziyası” səslənib. Anar Bramonun bu barədə dediklə­ri: 

– Bakı filarmoniyasında keçən konserti böyük məmnunluqla xatırlayıram. Dirijor dostum Fuadla, Azərbaycan Dövlər Sim­fonik Orkestri ilə çıxış etmək əsl səadətdir. Filarmoniyanın kollektivinə, xüsusilə də direktor Murad Adıgözəlzadəyə, həmçinin sənətşünas Ayla Kərimova-Zəkəriyyəyə, konsertə gələn hər kəsə ürəkdən minnətda­ram. 

Onu da qeyd edək ki, soydaşımız bu gün­lərdə filarmoniyanın Kamera və Orqan Mu­siqisi Zalında gənc istedadlar üçün ustad dər­si də keçib. Onların hazırlıq səviyyəsindən razı qalan Anar Bramo dərs zamanı ən kiçik nüanslara diqqət yetirərək müəyyən ifaçılıq tapşırıqlarının həllinin sadə yollarını nüma­yiş etdirib, təcrübəsini bölüşüb.

Əli NƏCƏFXANLI
XQ