600-dən yuxarı bal toplayan abituriyentlərlə görüş keçirilib

Naxçıvan Dövlət Universitetində 600-dən yuxarı bal toplayan abituriyentlərlə görüş keçirilib. Görüşdə Naxçıvan Dövlət Univesitetinin rektoru Elbrus İsayev və Naxçıvan Muxtar Respublikasının təhsil naziri Elxan Nəcəfov iştirak ediblər.

Univesitetin rektoru Elbrus İsayev ali təhsil ocağı haqqında ətraflı məlumat verib, universitetin beynəlxalq əlaqələri, Türkiyənin nüfuzlu ali təhsil müəssisələri arasında imzalanan əməkdaşlıq memoran­dumları, ikili diplom layihələri, peşəkar xarici mütəxəssislərin tədris prosesinə cəl­bi, eləcə də müasir tədris texnologiyaları­nın tətbiqi, ingilisdilli ixtisasların sayının artırılması haqqında danışıb. 

Diqqətə çatdırılıb ki, 2023-2024-cü tədris ilində universitet tərəfindən xüsusi təqaüd proqramı tətbiq edilərək 600-649 arası bal toplayanlara 1 il ərzində 200 manat, 650-dən yüksək bal toplayan tələ­bələrə isə 1 il ərzində 250 manat təqaüd verilməsi nəzərdə tutulub. 

Naxçıvan Muxtar Respublikasının təhsil naziri Elxan Nəcəfov universitetlər arasında rəqabət mühitinin formalaşma­sında abituriyentlərin rolundan bəhs edib. Diqqətə çatdırılıb ki, ötən illər ərzində Dövlət İmtahan Mərkəzinin həyata keçir­diyi qəbul imtahanlarındakı göstəricilərə görə muxtar respublika məktəbləri ölkə üzrə 2-ci yerdə qərarlaşıb. İxtisas seçimin­də diqqət olunmalı məqamlardan danışan təhsil naziri tələbəlik dövründə də elmi yolda əzmlə çalışmağın önəmini qeyd edib və abituriyentlərə müvəffəqiyyətlər arzu edib.

Sonra yüksək bal toplayan abituriyent­lərə hədiyyələr təqdim edilib. Abituriyent­lər universitetdəki maddi-texniki baza ilə yaxından tanış olublar.

Naxçıvanda biznesə güzəştli maliyyələşmə dəstəyi

Bu mövzuda Naxçıvan Biznes Mərkə­zində keçirilən konfransda Naxçıvan Muxtar Respublikası iqtisadiyyat naziri­nin müavini, nazir vəzifəsini müvəqqəti icra edən Abbas İsmayılov, Azərbaycan Respublikası Sahibkarlığın İnkişafı Fon­dunun idarə heyətinin sədri Osman Xa­lıyev, Azərbaycan Respublikası Mərkəzi Bankının Naxçıvan Muxtar Respublikası İdarəsinin sədri Elçin Əliyev, qurumların nümayəndələri və Naxçıvan Muxtar Res­publikasında fəaliyyət göstərən sahibkarlar iştirak ediblər. 

Çıxış edənlər bildiriblər ki, Naxçıvan­da 10-a yaxın bankın iştirakı ilə keçirilən bu tədbirin məqsədi maliyyə resurslarına əlçatanlığın təmin olunması məqsədilə kredit təşkilatları ilə əməkdaşlığın geniş­ləndirilməsi, sahibkarların güzəştli kredit­lərin verilməsi qaydaları ilə ətraflı tanış edilməsi, muxtar respublikanın investisiya mühitinin tanıdılmasıdır. 

Qeyd olunub ki, “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proq­ramı”nda 11 prioritet istiqamət müəyyən olunub. 2024-cü il üçün 4 əsas istiqamət - aqrar sahə, turizm, nəqliyyat-logistika, yaşıl enerji, həmçinin sənaye, o cümlə­dən emal sənayesi və real sektorun digər sahələri əsas prioritetlərdəndir. İqtisadiy­yat Nazirliyi yeni iş yerlərinin, əlavə dəyər yaradan sahələrin maliyyələşdirilməsində maraqlıdır.

Diqqətə çatdırılıb ki, muxtar respub­likada kredit borclarının geri qaytarılma­sının sürətləndirilməsi istiqamətində də zəruri tədbirlər həyata keçirilib. Sahib­karlığın İnkişafı Fonduna öhdəlik olaraq vaxtında qaytarılmalı, lakin qaytarılması təmin edilməyən vaxtı keçmiş kreditlərin məbləği bu il yanvarın 1-nə 16 milyon ma­nata yaxın olubsa, iyulun 1-nə 10,1 milyon manat və yaxud 63,5 faiz az – 5,8 milyon manat olub. Nəticədə fondun ehtiyatlarının qalıq məbləği 2,4 dəfə artaraq 6,7 milyon manatdan 16,1 milyon manata çatıb. 

Tədbirdə fondun iş adamlarına təqdim etdiyi mexanizmlər üzrə geniş təqdimatlar sahibkarların diqqətinə çatdırılıb. Həmçi­nin Naxçıvanın turizm, aqrar, ixrac, nəq­liyyat-logistika potensialı və digər mövzu­lar ətrafında müzakirələr aparılıb. 

Səbuhi HƏSƏNOV,
XQ-nin Naxçıvan müxbiri