Paşinyan Bakının dəvətindən özünə “press-şou” düzəldir 

Bu dəvət, sadəcə, BMT-nin ekoloji toplantısına deyil, sülhə çağırış kimi qəbul olunmalıdır. Və Bakı belə bir jesti hələ də rəsmi diplomatik əlaqələrə malik olmadığı İrəvana onilliklər boyu sürən münaqişəyə son qoymaq məqsədi daşıyan sülh prosesi fonunda edib. Azərbaycan bu addımı atmaqla həm də qoşulduğu beynəlxalq müqavilələrin, konvensiyaların prinsip və şərtlərinə, oyun qaydalarına riayət edən ölkə olduğunu bir daha sübuta yetirdi.

Azərbaycanın ilk dəfə evsahibliyi edəcəyi BMT-nin İqlim Dəyişikliyi Kon­vensiyasının 29-cu Tərəflər Konfransının (COP29) prezidenti, Ekologiya və təbii sərvətlər naziri Muxtar Babayevin Ermə­nistanın xarici işlər nazirinə göndərdiyi dəvət məktubu erməni mediasında müza­kirə mövzusu olaraq qalmaqdadır.

Ortada Bakının müasir dünyanın ça­ğırışlarına inklüziv yanaşması, keçmiş münaqişəyə, umu-küsüyə baxmayaraq, ayrı–seçkiliyə yol verməməsi kimi yük­sək bəşəri keyfiyyətlərinin nümayişi var. Bu nüfuzlu beynəlxalq tədbirdə dünyanın siyasət nəhəngləri ilə yanaşı iştirak etmək iki ölkə arasında münasibətlərin nizam­lanmasının, hətta sülh sazişinin imzalan­masının hüdudlarından xeyli kənara çıxır. Tarixi məqamın düzgün dəyərləndirilməsi siyasi uzaqgörənliklə yanaşı, həm də yük­sək şəxsi, mənəvi keyfiyyətlər tələb edir. Bu mənada, Bakının evsahibliyi edəcəyi möhtəşəm toplantıya İrəvanı dəvət etmə­si dünyaya sülh jestinin nümayişidirsə, bu tədbirdə iştirak edib-etməmək Paşin­yan üçün, bir növ, test imtahanıdır. Onun bu imtahandan üzüağ çıxması öz imicinə müsbət xal qazandırmaqla yanaşı, ölkəsi­nin mənafeyinə yalnız fayda gətirə bilər. 

“Hər şey o zamankı mövcud siyasi və­ziyyətdən asılı olacaq”. Bu, erməni siyasi ekspertlərdən birinin açıqlamasıdır. Hay mediasının Paşinyanın avqustda mətbuat konfransı keçirəcəyi və COP29-da işti­rak etmək üçün Bakıya gedib-getməməsi məsələsinə aydınlıq gətirəcəyi barədə yay­dıqları məlumatlar şou xarakterli xəbərlərə bənzəyir. Suala çoxsaylı müsbət və mənfi cavabların verildiyi açıqlamalarda bəzi blogerlər Nikol Paşinyanın özünü “ağır oturub batman gələn kişi”, hələlik rəqi­bini “intizarda saxlamağı” bacaran diplo­mat kimi aparmasından bəhs edirlər. Bu mövqenin tərəfdarları anlamaq istəmirlər ki, baş nazirlərinin COP29 tədbirinə gə­lib-gəlməyəcəyi Bakı üçün ciddi əhəmiy­yət kəsb eləmir. Əslində, bu dəvət özünü dünyanın 100-dən çox dövlətinin lideri arasında görmək imkanı qazanacaq Ermə­nistanın baş naziri üçün böyük önəm kəsb etməlidir. 

Başa düşürük, kənardan idarə olunan Paşinyan üçün Bakının, bir növ, test-sual mahiyyəti kəsb edən dəvətinə dərhal cavab vermək elə də asan deyil. Görünən odur ki, onun dəvətlə bağlı hansı qərarı qəbul edə­cəyindən həm sülh danışıqlarının sonrakı dinamikası, həm də ölkələrarası münasi­bətlərin nizamlanması prosesinin perspek­tivi, birbaşa olmasa da, dolayısı ilə asılıdır. 

İ.HƏSƏNQALA
XQ