Nüfuzlu maliyyə qurumu “Bank Respublika” ilə layihələri davam etdirir

Son illər ölkəmizin maliyyə-bank sisteminin sağlamlaşdırılması və monetar siyasətin üzən məzənnə rejimi üzərində təkmilləşdirilməsi, həmçinin beynəlxalq maliyyə qurumları ilə əməkdaşlığın möhkəmləndirilməsi istiqamətində çoxsaylı layihələr həyata keçirilib. Dövlət başçısının 2016-cı il 6 dekabr tarixli fərmanı ilə təsdiqlənən “Azərbaycan Respublikasının milli iqtisadiyyat perspektivi üzrə Strateji Yol Xəritəsi”də bununla bağlı nəzərdə tutulan müəyyən tədbirlərin icrası diqqət mərkəzində saxlanılıb. Respublikada investisiya mühitinin daha da yaxşılaşdırılmasına müsbət təsir göstərən məsələlərin həlli, beynəlxalq maliyyə institutları ilə əlaqələrin genişləndirilməsi də gerçəkləşdirilib. 

Asiya İnvestisiya Bankı (AİB) bu baxımdan mühüm əhəmiyyət kəsb edir. Bu maliyyə təşkilatının ölkəmizlə əlaqələ­ri dövlət qurumları ilə yanaşı, həm də özəl sektoru əhatə edir və Azərbaycan hökumətinin inkişaf strategiyasına uyğun həyata keçirilir.

AİB-in ölkəmizdə icra etdiyi ilk la­yihələr Mingəçevirdə keçmiş məcburi köçkünlər üçün evlərin tikintisi, Şəki ra­yonunda sel daşqınlarının qarşısının alınması üçün bəndlərin inşası olub. Belə ki, AİB 2003-cü ildə yoxsulluq səviyyəsi ölkə üzrə göstəricidən yuxarı olan və daşqınların fəsadlarından əziyyət çəkən 12 regionun mühafizəsi üçün 22 milyon ABŞ dolları həcmində kreditin ayrılma­sını təsdiqləyib. Həmin layihədən beş şəhərin və 43 kəndin əhalisi faydalanıb və bu, daşqınlar zamanı itkilərlə üzləşən 240 mindən çox insanın həyat səviyyə­sinin yaxşılaşdırılmasına müsbət təsir göstərib. 

Bank sonrakı mərhələlərdə respubli­kamızla bağlı əməliyyatlara dair Bizness Planını təsdiq edərək öz fəaliyyətini daha çox nəqliyyat, energetika, su təchizatı və kanalizasiya sektorlarında davam etdirib. Azərbaycan hökumətinin maliyyə dəstəyi ilə ölkəmizin 5 şəhərində su və kanaliza­siya xətlərinin yenidən qurulması layihə­sini həyata keçirib. Maliyyə institutu ener­getika sektorunda da səmərəli fəaliyyət göstərib, Mingəçevirdən Abşeronadək 280 kilometrlik və “Şimal” Elektrik Stan­siyasından Hövsana qədər 97 kilometrlik olan elektrik ötürücü xətlərin tikintisinə önəmli töhfə verib. 

Burada mühüm bir məqamı da xa­tırlatmaq istərdik. AİB-in təşəbbüsü ilə Prezident İlham Əliyevlə sözügedən ma­liyyə institutunun prezidenti Masatsuqu Asakava arasında 2020-ci il iyunun 1-də keçirilən videokonfransda dövlətimizin başçısı respublikamızın bankla əmək­daşlığını yüksək qiymətləndirərək deyib: “Mən xatırlayıram ki, 5-6 il bundan əvvəl bizim maliyyə dəstəyinə ehtiyacımız olan­da Asiya İnkişaf Bankı çox tez reaksiya göstərdi və Cənub Qaz Dəhlizi layihəsinə kredit verən ilk böyük beynəlxalq banklar arasında birinci oldu. Bu çox mühüm və vaxtında göstərilən dəstək Azərbaycanın geniş kreditorlar qrupu yaratmasını şərt­ləndirdi. Həqiqətən də bu, mənə çox xoş təsir bağışladı və mən bir daha çox vax­tında göstərilmiş bu dostcasına yanaş­maya görə minnətdarlığımı ifadə etmək istəyirəm. Biz bunun əməkdaşlığın çox yaxşı əlaməti olduğunu nəzərə aldıq”.

Onu da deyək ki, AİB-in son illərdəki geniş portfeli də diqqət çəkir. Suvarma və təhsillə bağlı icra olunacaq müəyyən layihələrin icrası, həmçinin özəl sek­tor, infrastrukturun inkişafı, kiçik və orta müəssisələrə dəstək məsələlərinin həlli ilə əlaqədar görülən işlər də bunun bariz ifadəsidir. 

AİB ilə ölkəmiz bu gün birgə biz­nes əməliyyatları strategiyasını uğurla reallaşdırır. Bu strategiya çərçivəsində beynəlxalq bank Azərbaycanla əlaqədar kredit prioritetlərini müəyyənləşdirməyə çalışır. Eyni zamanda bank respublika­mızla əlaqədar mühüm texniki yardım proqramlarında fəal iştirak edir. 

Ümumiyyətlə, AİB Azərbaycan Hö­kuməti ilə həyata keçirdiyi layihələrdə qarşıya qoyduğu məqsədləri–insanların həyat şəraitinin yaxşılaşdırılması, yoxsul­luğun azaldılması, infrastrukturun müasir tələblər səviyyəsinə qaldırılması kimi və­zifələri uğurla yerinə yetirir. 

Beynəlxalq maliyyə qurumu ölkəmiz­də səmərəli fəaliyyətini hazırda da da­vam etdirir, maliyyə sektorunun inkişafını daha da sürətləndirmək üçün layihələr reallaşdırır. Məsələn, bir neçə gün əv­vəl Azərbaycanda real sektoru dəstək­ləyən ölkənin aparıcı banklarından biri olan “Bank Respublika” və AİB arasında kredit sazişi imzalanıb. Sazişə əsasən, banka 20 milyon ABŞ dolları ekvivalenti həcmində milli valyutada irihəcmli kredit ayrılacağı nəzərdə tutulub.

Məlumatda qeyd edilir ki, cəlb edilən vəsait həm “Bank Respublika”ya, həm də ölkə iqtisadiyyatı üçün prioritet sahə olan real sektora kredit dəstəyinin güc­ləndirilməsinə, xüsusilə mikro, kiçik və orta müəssisələrin maliyyələşdirilmə­sinə, o cümlədən gənclərin və qadınların sahibkarlıq fəaliyyətinin maliyyələşdiril­məsinə imkan verəcək. “Bank Respub­lika”nın geniş filial şəbəkəsi sayəsində cəlb olunan vəsait Azərbaycanın bütün regionlarındakı sahibkarların dəstəklən­məsinə şərait yaradacaq. 

“Bank Respublika”nın İdarə Heyətinin sədri Tariyel İsmayılov mediaya müsa­hibəsində AİB-in uzun fasilədən sonra Azərbaycanın maliyyə bazarına məhz adıçəkilən bank ilə birgə qayıtmasını yüksək qiymətləndirir. T.İsmayılov qeyd edir ki, tərəflər arasında sazişin imza­lanması həmin beynəlxalq maliyyə insti­tutunun həm ölkəmizdə bank sisteminin sabitliyinə, həm də “Bank Respublika”nın etibarlılığına inamının daha bir mühüm göstəricisidir. AİB kimi aparıcı beynəlxalq maliyyə təşkilatları ilə tərəfdaşlıq “Bank Respublika”ya real sektoru daha sərfəli şərtlərlə dəstəkləmək imkanı yaradır və bununla da Azərbaycanda sahibkarlığın inkişafına töhfə verir. 

AİB-in Azərbaycandakı Nümayən­dəliyinin rəhbəri Candice McDeiganın “Bank Respublika” və AİB arasında kre­dit sazişinin imzalanması ilə bağlı fikirləri də diqqət çəkir. O, bildirir ki, kiçik və orta sahibkarlıq respublikamızda gəlirlərin ar­tırılması və iş yerlərinin yaradılması üçün mühüm əhəmiyyət kəsb edir, çünki hə­min sahibkarlıq subyektləri əmək qabiliy­yətli əhalinin üçdə ikisindən çoxunun işlə təminatını reallaşdırır, həmçinin aqrar sektorda qeydiyyatdan keçən sahibkar­lıq subyektlərinin demək olar ki, 40 faizi qadınlara məxsusdur. “Bank Respublika” AİB-in uzun illərdir ki, etibarlı tərəfdaşıdır və onun fəaliyyəti bu beynəlxalq maliyyə institutunun ərzaq təhlükəsizliyini yaxşı­laşdırmaq, kənd təsərrüfatını gücləndir­mək və qadınların maliyyə, təlim və ba­zarlara çıxışına kömək etmək məqsədləri ilə uzlaşır.

Sonda xatırladaq ki, “Bank Respubli­ka” 1992-ci ildə yaradılıb və Azərbayca­nın aparıcı beş bankından biridir. Bu ma­liyyə qurumunun səhmdarları arasında Almaniyanın ən böyük maliyyə institut­larından olan “Sparkassen International Development Trust” (Sparkassen–Fi­nanzgruppe maliyyə qrupunun üzvü) də var. “Bank Respublika”, eyni zamanda ölkəmizin bank sektorunda ən yüksək beynəlxalq reytinqlərdən birinə – “Sabit” proqnozlu “B2” reytinqinə (Moody’s) ma­likdir.

Vaqif BAYRAMOV
XQ