Mayın 25-də Moskvada keçirilən Ali Avrasiya İqtisadi Şurasının iclasında Azərbaycan Prezidenti İlham Əliyevin çıxışına yersiz replika ilə müdaxilə edən və anındaca tutarlı cavab alan Ermənistan baş naziri Nikol Paşinyan ənənəsinə sadiq qalaraq hərbi təxribata əl atıb. Belə ki, mayın 26-da Ermənistan–Azərbaycan şərti sərhədinin Zəngilan rayonunun Rəzdərə kəndi ərazisindən keçən hissəsində Hayastan ordusunun diversiya qrupu təxribata cəhd göstərib. Azərbaycan Dövlət Sərhəd Xidmətinin hərbçiləri tərəfindən təxribatın qarşısı dərhal alınıb.

Bununla bağlı Baş Prokurorluğun və Dövlət Sərhəd Xidmətinin birgə mə­lumatında bildirilib ki, sərhəd-döyüş məntəqəsində xidmətdə olan hərbi qulluqçularımızın sayıqlığı nəticəsində təxribat-diversiya qrupunun hərəkəti vaxtında aşkarlanaraq zəruri tədbirlər görülüb. Baş Prokurorluğun İstintaq İdarəsində aparılan araşdırma zamanı diversantların Azərbaycan ərazisin­də terror-təxribat əməlləri törətməyi planlaşdırdıqları məlum olub. Nəticə­də Ermənistan ordusunun 2 hərbi qul­luqçusu saxlanılıb. Toplanmış sübutlar əsasında cinayət işi açılıb. Harutyun Ovakimyan və Karen Qazaryan şü­bhəli şəxs qismində tutularaq istintaqa cəlb olunub. Diversiya qrupunun di­gər üzvləri ərazinin mürəkkəb relyefə malik olmasından istifadə edərək, geri qaça biliblər.

Erməni diversantlar qrupu Azərbay­can vətəndaşlarını, o cümlədən, hərb­çilərini öldürməyi planlaşdırsa da, Dövlət Sərhəd Xidmətinin hərbçiləri tərəfindən vaxtında aşkar ediliblər. Əgər diversiya baş tutsaydı, onlar Azərbaycanın digər ərazilərində də təxribat törədib mülki in­sanları hədəfə götürə bilərdilər.

Təxribatçıların ələ keçməsinə dair Azərbaycan mediasında məlumatın yayılmasından sonra erməni tərəfi məsələyə öz xislətinə uyğun münasibət bildirib. Hayastanın müdafiə nazirliyi ilk olaraq, xəbəri həmişəki kimi təkzib etməyə çalışıb: “Azərbaycan mediasın­da Ermənistan tərəfinin sərhəd xəttinin cənub-şərq hissəsində təxribat cəhdi barədə yayılan məlumat tamamilə ya­landır”. Sonra, artıq gecəyarısı təca­vüzkar ölkənin müdafiə nazirliyi “döyüş mövqelərini qida ilə təmin edən Ermə­nistan silahlı qüvvələrinin iki hərbçisi ilə əlaqənin kəsildiyini” bəyan edib. Ermə­ni tərəfi mayın 27-də günorta saatların­da, guya, həmin hərbçilərin olduğu qida və su ilə dolu hərbi yük maşının meşə­lik ərazidə tapılması barədə məlumat yayıb. Əslində, bunu səhnələşdirilmiş oyun adlandırmaq daha doğru olardı. Yəni, onlar, sadəcə olaraq, “KamAZ”ı meşəlik əraziyə sürüb, əlverişli rakurs­dan bir neçə kadr çəkib və bununla da təxribat törədilməsi ilə bağlı ittihamlar­dan qaçmaq istəyiblər. Yəqin ki, əmə­liyyatın uğursuz olmasından sonra Er­mənistan müdafiə nazirliyində bununla bağlı fəal müzakirə aparılıb. Güman et­mək olar ki, bu müzakirə zamanı ermə­ni tərəfi hərbçilərinin “itkin düşməsi” ilə bağlı vəziyyətin yeni “təfərrüatları”nı və versiyaları düzüb-qoşub. Bu yanaşma­nın məqsədi bəllidir – özünü “günahsız keçi” qismində göstərmək. Bu, həm də diqqəti əməliyyatın uğursuzluğundan yayındırmaq cəhdidir.

44 günlük Vətən müharibəsində biabırçı məğlubiyyətə uğrayan, kapi­tulyasiya sənədinə imza atan Nikol Pa­şinyan qeyd etdiyimiz kimi, Moskvada Prezident İlham Əliyevlə “söz savaşı”­na başlamağa cəhd göstərib. Lakin son nəticədə həm Azərbaycanda, həm də Ermənistan və Rusiyada gülüş obyek­tinə çevrilib. Bu hadisə, vaxtaşırı pis vəziyyətlərə düşən N.Paşinyan üçün növbəti biabırçılıq idi, – desək, səhv etmərik. Paşinyan cənab İlham Əliye­vin sammitdə Ermənistanın rəsmən Qarabağı Azərbaycanın tərkib hissəsi kimi tanıması ilə bağlı sözlərinə etiraz etmədiyi üçün ölkə müxalifəti tərəfin­dən sərt tənqid edilib. Görünür, bu və­ziyyətdə, baş nazir “uğurlu lokal qələ­bə” ilə nəticələnəcək hərbi təxribata əl atmaq qərarına gəlib. Nikol Paşinyan bununla həm daxildə siyasi mövqeyini gücləndirəcəyinə, həm də iyunun 1-də Kişineuda keçirilməsi nəzərdə tutulan görüşdən əvvəl danışıqlarda irəliləyiş əldə olunmasının qarşısını alacağına ümid edib. Çünki sülh prosesini uzat­maq Ermənistanın həm əvvəlki rejimlə­rinin, həm də indiki hökumətinin məlum taktikasıdır.

Ermənistanın hərbi-siyasi rəhbərliyi bundan əvvəlki təxribatların da qarşı­sının Azərbaycan hərbçiləri tərəfindən qətiyyətlə alındığını nəzərə alaraq, nə­hayət, bu taktikadan əl çəkməli və hələ dərk etmədiyi sadə həqiqəti anlamalıdır. İrəvan rəhbərliyi başa düşməlidir ki, Er­mənistan üçün iqtisadi inkişaf, xilas yolu Azərbaycan və Türkiyə ilə münasibətlə­rin normallaşdırılmasından keçir. Bunun üçün İrəvan Bakı və Ankaraya ərazi iddi­alarına, təxribatlara son qoymalı, Azər­baycanla sülh danışıqlarını uzatmamalı, tezliklə sülh sazişinin imzalanmasına çalışmalı, Zəngəzur dəhlizinin açılma­sına mane olmağa cəhd etməməlidir. Ermənistan sülh gündəliyinə sadiqlik nü­mayiş etdirməli və təxribatçı əməlləri ilə sülhün qarşısını almaqdan əl çəkməlidir. Çünki sülhdən, regionda kommunikasi­yaların açılmasından ən çox xeyir görən tərəflərdən biri Ermənistan olacaq. Hər halda, Ermənistanın regionda bütün nəqliyyat və iqtisadi kommunikasiyala­rın blokadadan çıxarılmasına hazır oldu­ğunu mayın 25-də Nikol Paşinyan özü Moskvada etiraf edib.

Ermənistanın törətdiyi son təx­ribata münasibət bildirən politoloq Tural İsmayılov deyib ki, Azərbayca­nın sülhdən danışdığı bir vaxtda İrəva­nın ölkəmiz əleyhinə təxribat-diversiya qrupu vasitəsilə hücumlar təşkil etməsi, tez-tez şərti sərhəddə və cəbhə böl­gəsində vəziyyəti gərginləşdirməyə çalışması bu dövlətin terrorçu mahiy­yətini növbəti dəfə ortaya qoymuş olur: “Moskva görüşündən sonra Kişineuda iki ölkə arasında yekun sülh sazişinin imzalanması ilə bağlı razılığın əldə olunacağı məqamında İrəvanın Zəngi­lana diversantlar göndərməsi bir daha bunu deməyə əsas verir ki, Ermənistan yenidən Qarabağ və Şərqi Zəngəzur­da vəziyyəti gərginləşdirməyə çalışır. Həmçinin diversantların ərazilərimizə göndərilməsi Zəngilana qayıdacaq soy­daşlarımıza qarşı müxtəlif məkrli plan­ların olduğunu göstərir. Məlumdur ki, Azərbaycan vətəndaşları artıq Zəngila­nın Ağalı kəndinə geri dönüblər. Yaxın zamanda Zəngilanın digər kəndlərinə də soydaşlarımızın qayıdışı planlaşdı­rılır. Ona görə də Ermənistan qəsdən Zəngilana diversantlar göndərərək, müxtəlif təxribatçı əməllər törədə, o cümlədən, orada minalar basdıraraq soydaşlarımıza qarşı terror aktları hə­yata keçirə bilərdi. Sərhədçilərimizin ayıq-sayıqlığı nəticəsində növbəti dəfə Ermənistanın məkrli planları ifşa edildi”.

Tural İsmayılov onu da bildirib ki, Ki­şinyov görüşü öncəsi Zəngilanda həya­ta keçirilən diversiya hücumu həm Qərb, həm də Rusiya tərəfindən mütləq daha aydın şəkildə qiymətini almalıdır: “Siya­si güclər Ermənistanın bu hərəkətlərini pisləməlidir. Əks-təqdirdə Azərbaycan sülh əlini uzatdığı halda, Ermənistan yenə təxribatlara davam edəcək”.

Səxavət HƏMİD,
“Xalq qəzeti”