Qədim bir rəvayətdə deyilir ki, bütün müsəlman ölkələrinə Allahın bərəkəti göydən yağır, Buxarada isə yerdən göyə ucalır. Çox güman ki, orta əsrlərdə Buxarada 360 məscidin və 80 mədrəsənin mövcudluğu ilə bağlı yaranıb bu kəlam.
Həmçinin “İslam dünyasının ulduzu” və “Orta Asiyanın müqəddəs şəhəri” titullarını daşıyan Buxarada dünya şöhrətli alimlər, mütəfəkkirlər, ilahiyyatçılar, şairlər yaşayıb yaradıblar. Təbabət, psixologiya, riyaziyyat, məntiq, fizika, musiiqi, poeziya, zoologiya sahələrində maraqlı tədqiqatları olan, “Tibb qanunu” əsərinin müəllifi, filosof, təbib, astronom Əbu Əli İbn Sina, ilahiyyatçı alim İmam Əl-Buxari, psixoloq, nəzəriyyəçi Əl-Həsən əl-Basri, tarixçi alimlər Məhəmməd Əmin-i Buxari və Abdulla Nəsrullahi, X əsr alimi Əbu Həfs Kəbir, yazıçı və şair Vasifi, həmçinin soydaşlarımız, böyük filosoflar Yusif Qarabaği və onun müəllimi Mirzəcan Şirazi və başqalarının həyatı Buxarayi-Şəriflə bağlı olub. Təməli bizim eradan əvvəl VI əsrdə qoyulan Buxara Orta Asiyanın qədim şəhərlərindən biri adını fəxrlə daşıyır.
İslam dünyasında Buxaranı İslam dininin müqəddəs şəhərinə çevirən sufi alimlərin adı da çox məşhurdur. Buxarada həm də Nəqşibəndi qardaşlığına aid olan yeddi müqəddəs pir yerləşir.
İlk müqəddəs pir Mərkəzi Asiya sufi məktəbinin təməlini qoyan Abdulla Abd-Əl-Xalik Qijduvaninin məzarıdır. Yusif-əl-Həmədaninin dini baxışlarını davam etdirən Əl-Qijduvani Xacəqan təriqətinin əsasını təşkil edən mənəvi-dini nəzəriyyənin səkkiz qaydasını fopmalaşdırıb, səssiz zikr etmənin əsasını qoyub. Onun fikrinə görə, imamlıq edən hər bir kəsin mütləq başqa bir peşəsi də olmalıdır. Yüksək mənəviyyatlı insan yetişdirilməsi Əl-Qijduvaninin əsərlərinin ana xəttini təşkil edir.
İkinci müqəddəs məkan Xoca Arif Rivqarinin məzarıdır. Sufilik yoluna gənc yaşlarında qədəm qoyan Rivqari 19 yaşında artıq fəlsəfə dərsləri verirdi. Onun “Nafaxat ul-uns” və “Arifnamə” əlyazmalarında məşhur sufinin həyatı əks olunub. Bu əsərlər göstərir ki, müqəddəs Xoca Arif Mohi tobon adlandırılan Ravqari Xacəqan təriqətinin başçısı olan Şeyx Abdulxalik Qigduvaninin ən layiqli davamçısı olub, Qijduvaninin ölümündən sonra qardaşlığa başçılıq edib.
Üçüncü pir Babkent rayonunun Əncirbağ kəndində yerləşən Xoca Mahmud Əncir Fəqnəvinin məzarıdır. Dövrünün məşhur sufilərindən olan Fəqnəvi bağçılıqla, dülgərliklə məşğul olub. Fəqnəvi Mavərənnəhrin nüfuzlu sufilərindən sayılıb. Dövrün ehtiyaclarına müvafiq olaraq açıq zikri həyata keçirən Fəqnəvidən bunun səbəbini soruşanda deyib: “Qoy yatanlar oyansın”.
Fəqnəvinin məzarının yaxınlığında gözəl bir mavzoley ucaldılıb, məscid tikilib. Məscidin həyətindəki quyunun suyu müqəddəs hesab olunur.
Dördüncü pir Xoca Əli Romitaninin məzarıdır. Xoca Əli Romitani 1195-ci ildə Kurqanda dünyaya göz açıb.Toxuculuqla məşğul olub. Xacəqan sufi məktəbinin ən nüfuzlu simalarından sayılıb. Yüksək mənəvi keyfiyyətlərə malik olan Romitani xalq arasında Azizon (hörmətli şeyx) deyə çağırılıb. Hətta monqol xanları da ona inanaraq islamı qəbul etmişdilər.Deyilənə görə, Romitani insanların fikrini oxuya bilib, həkimlik edib. Saysız-hesabsız şagirdləri arasında öz oğulları da olub. Kiçik oğlu Xoca İbrahimə öz davamçısı olmağı vəsiyyət edib.
Romitaninin “İki halda – danışarkən və yeyərkən özünə diqqət et” kəlamı indi də xalq arasında işlədilir.
Beşinci pir Xoca Məhəmməd Babai Sammasinin məqbərəsidir. Xacəqan məktəbinin ənənələrini davam etdirən məşhur sufi Sammasi Xoca Əli Romitaninin şagirdi və davamçısı olub. Bahauddin Nəqşibəndinin həyata gələcəyini məhz o, dilə gətirib: “Vaxt keçəcək, onun ətri bütün dünyaya yayılacaq və o – “muşkil quş” “çətinlikləri dəf edən” olacaq.
Sammasinin Xacəqan sufi məktəbinin inkişafinda, təsəvvüf texnikasının işlənməsində əvəzsiz rolu var.
Altıncı pir Xoca Səid Əmir Kulal Buxarinin memorial kompleksidir. Sənəti dulusçuluq olan Kulal hələ həyatda ikən “Böyük” təxəllüsü daşıyırdı. Bəzi mənbələrə görə, Səid Əmir Kulal 1363-cü ildə hökmdar Əmir Teymurla da görüşüb. Yüzlərlə davamçısı olan şeyx vaxtının çoxunu gənclərlə söhbətdə keçirir, onlara məsləhətlər verirdi. Gəncləri ən kiçik səhvlərdən belə çəkindirən şeyx Məhəmməd Peyğəmbərin sözləriini misal çəkirdi:” İnsanların hər gün etdiyi xırda günahlar böyük günahlara çevrilir və onları cəhənnəmə götürür”.
Səid Əmir Kulalın davamçılarından biri də Bahauddin Məhəmməd Nəqşibəndi olub. Nəqşibəndini sufiliyin əsasları, düzgün zikr edilməsi, Xacəqan məktəbinin ənənələri ilə məhz Əmir Kulal tanış edib.
Bahauddin Nəqşibəndi memorial kompleksi Buxaranın 12 kilometrliyində yerləşən sonuncu yeddinci pirdir. Kompleks “sufiliyin müəllimi”, XIV əsr Orta Asiya sufi məktəbinin nəhəng simalarından biri Bahauddin Nəqşibəndinin şərəfinə ucaldılıb. Nəqşibənd naxış vuran deməkdir və Nəqşibəndiyə sufi qardaşlığının adı məhz Bahauddin Nəqşibəndinin sənətinin naxış vüran olması ilə bağlıdır.
Əbdürəhman Cami yazırdı ki, Bahauddin heç vaxt qul saxlamayıb. Bunun səbəbini soruşanda Bahauddin deyib ki, eyni vaxtda həm Allahın, həm də ağanın qulu olmaq mümkün deyil. Ölümündən sonra Bahauddin “müqəddəs” elan edilib, Buxaranın himayədarı hesab olunub.
Nəqşibəndi belə hesab edib ki, sufi olan kəs öz əməyi ilə bir parça çörəyini qazanmalıdır. Özü bir neçə sənətə yiyələnib.Toxuculuq, dulusçuluq, dəmir üstə döymə ilə məşğul olub. Nəqşibəndi ardıcıllarını hər hansı bir sənət sahibi olmağa, torpağı əkib-becərməyə, ticarətlə məşğul olmağa çağırıb. Mənəvi təmizlik, cah-cəlaldan uzaq yaşamaq, hakim dairələrlə əlaqədən qaçmaq, çox az adamla ünsiyyət saxlamaq, şəriət qanunlarına əməl etmək onun prinsipləri olub.
Bu gün də müqəddəs sufinin məzarını ziyarət edənlərin arası kəsilmir. Deyilənə görə, bu mavzoleyə üç dəfə toxunmaq Məkkəyə Həcc ziyarətinə getməyə bərabər sayılır.
Qulu KƏNGƏRLİ,
XQ-nin xüsusi müxbiri
Buxara