...Bakı avtovağzalından Füzuliyə yola çıxanda alatoran idi. Dəqiqələr və kilometrlər arxada qaldıqca Arazqırağında aparılan bərpa-quruculuq işləri ilə bağlı qarşıdakı görüşlərin intizarı da güclənirdi. 4 saatlıq yolu beləcə ciddi ezamiyyət məsuliyyəti ilə aşıb Füzuli rayonunun Alxanlı nəzarət-buraxılış məntəqəsinə yaxınlaşdıq.
İlk diqqətimizi cəlb edən qrupumuzun bölgəyə gəlişini əks etdirən informasiya tablosu oldu. Səfərimizə verilən önəmin göstəricisi olaraq bu mənzərə bizi hədsiz təsirləndirdi. Demək, biz bu yerlərə can atdığımız kimi, burada da qrupumuzu gözləyirmişlər...
Daha gözləməyin yeri olmadığı üçün birbaşa işə başladıq. Qarşımızda açılan ilk mənzərə nəzərimizdən qaçmadı 27 il ərzində öz yurdunda məcburi köçkünə çevrilmiş soydaşlarımızın güc-bəla ilə dikəldib sığındıqları tikililərin qalıqları öz işini bitirib yorğun düşmüş insanlar sayağı “uyuyurdu”.
Təbii ki, azad olunmuş Füzuliyə səfərimiz rayonun Qaraxanbəyli kəndindən keçən yolun kənarında ucaldılan, üzərində “Vətən uğrunda canlarından keçən qəhrəmanların şəhid olduğu ilk yerlərdən biri” yazılan qaya parçasını ziyarətdən başladı.
Xatırladaq ki, bu daş abidə Vətən müharibəsinin ilk günlərində igidlik, şücaət nümayiş etdirən şəhidlərimizin şəhadətə ucaldıqları, qan tökdükləri Qarabağın müqəddəs məkanlarından birinin azadlıq pasportudur. Bu, artıq adi qaya parçası deyil, tarixin “Qisas qiyamətə qalmır” hökmünün daş yazısıdır. Bu qanlı keçid düşmənin 30 il işğal altında saxladığı əzəli torpaqlarımızda Zəfər yürüşünə açılan ilk qapıdır. Bu daş salnamə xalqımızın “öldü var, döndü yox” andının gerçəyə çevrildiyi müqəddəs savaşın ilk qələbə sorağıdır.
...Qrupumuzun Füzuliyə səfərinin yüksək səviyyədə təşkilinə görə, Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəsi Emin Hüseynova, eləcə də nümayəndəliyin məsul əməkdaşı Eldar Seyidova təşəkkürümüzü bildirməyi də bəri başdan özümüzə borc sayırıq. Məhz bu diqqət və həssas münasibətin nəticəsi olaraq bir iş günündə qarşımıza qoyduğumuz məqsədə asanlıqla çatdıq. Səfər üçün əlverişli şərait yaradılması və yüksək mina təhlükəsizliyinin təmin edilməsi sayəsində biz erməni urbisidinin və kulturisidinin nəticələri, eləcə də torpaqlarımızın dirçəlişi prosesi ilə detallı şəkildə tanış ola bildik.
Hələlik, qənaətimiz budur ki, XXI əsr insanı ermənilərin 30 il ərzində Azərbaycan torpaqlarında törətdikləri vəhşiliklərin məna və mahiyyətini anlamaqda istisnasız olaraq çətinlik çəkir. Bunu ötən dövrdə dünyanın müxtəlif yerlərindən bu yerüstü cəhənnəmə səfər etmiş çoxsaylı insanın heyrət və məyusluğu da sübut edir. Tarix 2 min il əvvəl belə əməllərə “vandallıq” adı vermişdi. Qədim Romanı yer üzündən silmiş vandalları bizim günlərdə geridə qoymuş ermənilərin mənəvi iflasının– vəhşiliyin son həddinə enişinin də gərək adı məhz “ermənilik” olsun. Bu anlamda ermənilik çağdaş insanlığın ən miskin utanc səhifəsidir.
Ağlasığmaz bir düşüncənin hökmüdür ki, özünə məxsus olmayanları məqsədyönlü şəkildə məhv edəsən. Əslində, ermənilərin Qarabağda və Şərqi Zəngəzurda törətdikləri vandalizm, urbisid, kulturisid və ekosid faktları qəti sübut edir ki, bu torpaqlar heç vaxt ermənilərə məxsus olmayıb. Əsl mülk sahibi belə hərəkət edə bilməz. Onu da əlavə edək ki, qəbiristanlıqların və məzarların alt-üst edilməsi, Tanrıya ibadət qapısı olan məscidlərin dağıdılıb murdarlanması heyvanların özü üçün də qəbuledilməz olan goreşənlik xislətidir.
Belə bir girişdən sonra qrupumuzun Arazqırağında gedən nəhəng quruculuq işləri barədə hazırladığı irihəcmli yazılar qəzetimizin növbəti sayından etibarən oxucularımıza təqdim ediləcək.
Vaqif BAYRAMOV,
Səbuhi MƏMMƏDOV,
Pünhan ƏFƏNDİYEV,
“Xalq qəzeti”,
Əbülfəz BABAZADƏ,
“Bakinskiy raboçiy”