Fransanın ardınca ABŞ və Avropa İttifaqı da Hayastana hərbi məqsədli yardım edir

Bütün daşlar yerinə oturur. O anlamda ki, əvvəllər Fransanın Ermənistanı silahlandırması rəsmi Parisin təkbaşına həyata keçirdiyi təşəbbüs təsiri bağışlayırdısa, artıq prosesin bütövlükdə kollektiv Qərbin egidası altında reallaşdırıldığını söyləmək üçün əsaslar var. Bu baxımdan iki məqamın üzərində dayanacağıq. 

Məlum olduğu kimi, ABŞ Dövlət kati­binin müavini Uzra Zeya bu günlərdə Er­mənistanın Müdafiə Nazirliyində Amerika ordusunun nümayəndəsinin çalışacağı ilə bağlı qərarın verildiyi barədə məlumatı təsdiqləmişdi. İndi isə Birləşmiş Ştatların İrəvandakı səfirliyi konkret detalları açıq­layıb. Ali diplomatik təmsilçilik “Azadlıq” radiostansiyasının sorğusuna cavab olaraq bildirib ki, ABŞ Dövlət Departa­mentinin mülki müşaviri yaxın aylarda erməni hərbi birləşmələrində konsultativ dəstəyə rəhbərliyə başlamaq niyyətin­dədir. Səfirlikdən bu işə dəqiq nə zaman start veriləcəyi açıqlanmasa da, deyilib ki, Qlobal Müdafiə İslahatları Proqramı üzrə Ermənistana göndəriləcək müşa­vir ABŞ ordusu və ya Müdafiə Nazirliyi tərəfindən maliyyələşdirilmir. Maliyyəni Dövlət Departamenti verir. Sən demə, müşavir Ermənistanın müdafiə institut­larını gücləndirməyə yardım göstərəcək­miş: “ABŞ Dövlət Departamentinin Qlo­bal Müdafiə İslahatları Proqramı strateji səviyyəli məsləhət dəstəyi ilə dünya üzrə tərəfdaş ölkələrə daha möhkəm, effektiv və hesabatlı təhlükəsizlik institutları qur­mağa kömək edir”.

***

O da məlumdur ki, Avropa İttifaqı 2020-ci ilin 44 günlük müharibəsindən sonra Azərbaycan və Ermənistan ara­sında münasibətlərin tənzimlənməsi və mövcud xüsusda tərəflərin sülhə gəl­mələri yönümündə bir sıra addımlar atıb. Bu baxımdan Aİ Şurasının prezidenti Şarl Mişelin əməyini vurğulamaq müm­kündür. Ancaq indi, görünür, vəziyyət dəyişib. Belə ki, Aİ Şurası Ermənistan Silahlı Qüvvələrinə dəstək üçün 10 mil­yon avro məbləğində yardım göstərmək barədə qərar qəbul edib. Məlumatı quru­mun mətbuat xidməti yayıb. 

Məlumatda bildirilib ki, sözügedən yardım Avropa Sülh Fondu (APF) çərçi­vəsində həyata keçiriləcək. Nəzərə alaq ki, belə bir təşəbbüs Ermənistan üçün ilkdir. Məqsəd ölkənin silahlı qüvvələri­nin maddi-texniki potensialını gücləndir­mək, böhran və fövqəladə hallarda mülki əhalinin müdafiəsinin yaxşılaşdırılma­sına töhfə verməkdir. Dəstək, həmçinin Ermənistanın dayanıqlılığını artırmaq və gələcəkdə Aİ tərəfindən aparılan bey­nəlxalq hərbi missiya və əməliyyatlarda mümkün iştirakı halında ölkənin silahlı qüvvələrinin qarşılıqlı fəaliyyətini sürət­ləndirmək məqsədini daşıyır. O da bildi­rilir ki, görülən tədbir tabor ölçülü bölmə üçün tam təchiz olunmuş çadır şəhərci­yini təmin etməyə imkan verəcək.

Aİ Şirasının mətbuat xidmətinin bə­yanatında o da bildirilib ki, hazırda Er­mənistana qəbul edilən dəstək proqramı Avropa İttifaqının ölkə ilə ortaq dəyərlərə əsaslanan, Ermənistanda və Cənubi Qafqazda sülh, sabitlik və rifahı təşviq etmək məqsədi daşıyan tərəfdaşlığı çər­çivəsində veriləcək. Aİ qurumla rəsmi İrəvanın Hərtərəfli və Genişləndirilmiş Tərəfdaşlıq Sazişi əsasında Ermənis­tanla siyasi və iqtisadi tərəfdaşlığını və əlaqələrini bütün ölçülərdə daha da güc­ləndirməyə sadiqdir. Bu, xarici siyasət və təhlükəsizlik siyasəti, o cümlədən, ümumi təhlükəsizlik və müdafiə siyasəti (CSDP) sahəsində dialoqun və əmək­daşlığın intensivləşdirilməsini əhatə edir.

Məsələ ilə bağlı Aİ-nin ən böyük er­mənipərəsti qurumun xarici işlər və təh­lükəsizlik siyasəti üzrə ali nümayəndəsi Jozep Borrelin fikirləri də var. Borrel bildirib ki, təhlükəsizlik Ermənistanla Aİ-nin ikitərəfli münasibətlərinin daha vacib elementinə çevrilir. Onun sözlərinə görə, Avropa Sülh Fondunun görəcəyi iş Er­mənistanın dayanıqlılığına töhfə verə­cək: “Xarici işlər və təhlükəsizlik siyasəti üzrə dialoqumuzu genişləndirməkdə, eləcə də Ermənistanın gələcəkdə Aİ-nin rəhbərlik etdiyi missiya və əməliyyatlar­da iştirakında marağımız var”.

Əvvəldə də bildirdiyimiz kimi, bu iki məsələ, ümumən kollektiv Qərbin Er­mənistana hərbi dəstək ritorikasının mövcudluğundan xəbər verir. Yalançı dəstəklər ölkənin düşdüyü illüziya bataq­lığındakı yerini bir qədər də möhkəmlən­dirir. İllüziyanın ilk avantürist simptomu isə artıq var. Ermənistan silahlı qüvvələri Kəlbəcər istiqamətində mövqelərimi­zi atəşə tutublar. Rəsmi İrəvan, daha dəqiq desək, baş nazir Nikol Paşinyan administrasiyası məsələ ilə bağlı açıq­lamasında faktı təkzib edib və məsələni Azərbaycanla qarşılıqlı əsasda araşdır­mağa hazır olduğunu bildirib. Bunun bir adı var: həyasızlıq.

Bəli, Ermənistan hakimiyyəti həya­sızlıq edir və ehtimal ki, rəsmi İrəvan bundan sonra da təxribatlarını davam et­dirəcək. Çünki illüziya bataqlığı ölkənin başbilənlərinin başqa cür, yəni normal düşünmələrinə imkan vermir. Düşünmə­sinlər, ancaq nəzərə alsınlar ki, indiyədək Azərbaycana yönəlmiş bütün anti-sülh davranışları yekunda uğursuzluqla üzlə­şib. Əminliklə demək olar ki, ölkə 2020-ci ildən bəri itirə-itirə gedir. Rəsmi İrə­van durumun fərqində deyil və anlamır ki, Azərbaycanla barış üçün itirilən hər gün Ermənistana son dərəcə acınacaqlı perspektiv vəd edir. Necə deyərlər: can özünün, cəhənnəm Tanrının. 

Ə.RÜSTƏMOV
XQ