Və yaxud Azərbaycan ərazilərinin 30 illik işğalına rəvac verən kimlər idi?
Bu günlərdə Rusiyanın “Beynəlxalq həyat” nəşrində Rusiya Xarici İşlər Nazirliyinin istefada olan baş məsləhətçisi Aleksandr Ananevin Birinci Qarabağ müharibəsinin gizlinlərindən bəhs edən “Rusiya 1990-cı illərdə Ermənistanı müdaxilələrdən necə xilas etdi” sərlövhəli çox maraqlı bir məqaləsi ilə tanış oldum. Yaxın tariximizin qaranlıq səhifələrinə işıq salan bu yazıda kimin dar ayaqda xalqımızın yanında olduğu və kimin bizə arxadan zərbə endirdiyi konkret faktlarla aydın göstərilir. Müəllif yazır:
“Birinci Qarabağ müharibəsi (1992-1994) zamanı Ermənistan üç dəfə Türkiyənin real müdaxiləsi təhlükəsi altında olub. Rusiya hər dəfə hadisələrin belə inkişafının qarşısını dinc yolla ala bilib.
Rusiyanın Ermənistandakı ilk səfiri Vladimir Stupişinin xatirələrinə görə, “Artsax” (qondarma “DQR”-in keçmiş erməni adı İ.R.) uğrunda döyüşün qızğın vaxtında “Burbulis və Qraçov (Rusiyanın keçmiş müdafiə naziri –İ.R.) Ermənistan prezidenti ilə Rusiya qoşunlarının Ermənistan ərazisində statusunu hüquqi cəhətdən rəsmiləşdirmək barədə razılığa gəlirlər”. Rusiyanın Ermənistandakı birinci elçisi sonra deyir: “Ermənistanda bizim hərbi mövcudluğumuz (SSRİ-nin dağılmasından sonra - müəllifin qeydi) onun hökumətinin və əminəm ki, bunu görmüş və indi də görən xalqın açıq şəkildə ifadə edilmiş iradəsinə uyğun olaraq qorunub saxlanıldı. Bu mövcudluq nə qədər simvolik olsa da, onların təhlükəsizliyinin ən mühüm təminatlarından biridir. Bəli, Gümrüdəki (keçmiş Leninakan) döyüşə hazır motoatıcı diviziya da o qədər simvolik deyildi”.
Bununla eyni vaxtda, “1992-ci ilin mayında Türkiyə parlamentində müzakirələr başlandı: gündəmdəki məsələ azərbaycanlı qardaşları erməni təcavüzkarlarından qorumaq üçün Naxçıvana qoşun göndərib-göndərməmək idi, çünki Türkiyənin 1921-ci il Qars müqaviləsinə əsasən belə bir hüququ var”. Bu müzakirələrdə həm Türkiyənin baş naziri Süleyman Dəmirəl, həm də prezident Turqut Özal iştirak edirdi.
Bu vaxta qədər Türkiyə Silahlı Qüvvələrinin 3-cü Səhra Ordusu artıq Ermənistan-Türkiyə sərhədində yerləşdirilmişdi, “onun sərəncamında 1500-dən çox tank, 2500-ə yaxın top və minaatan, 1100-dən çox zirehli transportyor var idi. Ermənilərə qarşı ikinci cəbhənin açılması perspektivi real konturlar alırdı. Taktiki hərbi hava qüvvələri komandanlığı da 270-ə qədər döyüş təyyarəsi ilə quru qoşunları qrupuna dəstək verirdi”. Türkiyə Quru Qoşunlarının Baş Komandanı Muhittin Fisunoğlu o zaman bildirdi ki, “bütün lazımi hazırlıqlar görülüb və ordu çıxarılma əmrini gözləyir”.
Rusiyada Türkiyə təhlükəsini çox ciddi qəbul etdilər: Rusiya Federasiyasının Dövlət Dumasında Türkiyə Ordusunun Ermənistan sərhədləri yaxınlığında kəskin fəallaşması ilə bağlı xüsusi dinləmələr keçirildi. Dinləmələrdə xarici işlər naziri Andrey Kozırev və MDB Birləşmiş Silahlı Qüvvələrinin baş komandanı, aviasiya marşalı Yevgeni Şapoşnikov iştirak ediblər. 1992-ci il mayın 20-də yaranmış vəziyyətə əsaslanaraq, baş komandan təcili olaraq İrəvana uçdu və hava limanında keçirdiyi mətbuat konfransında Türkiyə tərəfinə xəbərdarlıq edərək bildirdi ki, “oraya (Qarabağ münaqişəsinə İ.R.) başqa bir tərəf qoşularsa, onda biz Üçüncü Dünya müharibəsinin astanasında ola bilərik”.
Öz növbəsində, Rusiya Federasiyasının Türkiyədəki səfiri Albert Çernışev Türkiyənin münaqişəyə müdaxiləsinə Moskvanın mümkün reaksiyası ilə bağlı xəbərdarlıq edir ki, “1921-ci il Qars müqaviləsi nə Türkiyəyə, nə də Rusiyaya hərbi müdaxilə hüququ verir”. Bu bəyanatlar Türkiyənin hərbi-siyasi dairələrinin Ermənistan və Qarabağ problemi ilə bağlı sonrakı davranışlarına ciddi təsir göstərdi. Bundan sonra Türkiyə hücuma keçmək əvəzinə Ermənistana iqtisadi təzyiq yolunu tutmağa qərar verdi, sərhədi rəsmən bağladı, həmçinin Bakının döyüş sursatı ilə təmin edilməsi və azərbaycanlı mütəxəssislərin yenidən hazırlanması haqqında müqavilə imzaladı və ATƏT-in 1993-cü ilin fevralında qəbul edilən Dağlıq Qarabağ münaqişəsi bölgəsinə döyüş sursatı idxalını qadağan edən qərarını pozdu. (Rusiyalı diplomatın bu fikri adamda doğrudan da istehza və sarkazm doğurur. Elə ATƏT o zaman qəbul etdiyi qərar da bunun kimi. Demək Rusiya Ermənistanda qoşun yerləşdirib erməniləri silahlandıra bilər, amma Türkiyə Azərbaycana silah-sursat verə bilməz.– İ.R. )
İsveç Mərkəzi Asiya və Qafqaz Araşdırmaları İnstitutunun CA&C Press AB saytına görə, “1993-cü ilin yazında Azərbaycanın xeyrinə heç bir müsbət dəyişiklik baş vermədiyindən, Türkiyədə bəzi dairələr birbaşa hərbi müdaxilə ideyasını fəal şəkildə dəstəkləməyə başladılar. 1993-cü ilin aprelində Rifah Partiyasının spikeri və Ana Vətən Partiyasının deputatı Türkiyənin Ermənistan-Azərbaycan münaqişəsinə hərbi müdaxiləsinin zəruriliyini bəyan etdilər. Cümhuriyyət Xalq Partiyasının sədr müavini İstemihan Talay Türkiyə hökumətini Azərbaycan Respublikasına kifayət qədər hərbi yardım göstərməməkdə ittiham etdi”.
Türkiyə Xarici İşlər Nazirliyi BMT Təhlükəsizlik Şurasına üzv ölkələrin – ABŞ, Rusiya, Böyük Britaniya, Fransa, Çin səfirlərinə Dağlıq Qarabağda hadisələrin inkişafının, Ankaranın nöqteyi-nəzərindən 1974-cü ildə Kiprdəki vəziyyəti xatırlatması barədə xəbərdarlıq edərək bildirdi ki, Türkiyə “qardaş Azərbaycan xalqını qorumaq üçün” yenidən oxşar addımlara əl ata bilər.
Eyni zamanda, Ermənistana hərbi müdaxiləyə yeni hazırlıq üçün konkret tədbirlər görülür. “Türkiyə Silahlı Qüvvələrinin 3-cü Səhra Ordusu tam döyüşə hazır vəziyyətə gətirilir, Türkiyə Hərbi Hava Qüvvələrinin bazalarında “Fantom” aviasiyasının hücum eskadrilyaları sutka boyu hərbi növbəyə başlayırlar”. Parlamentdə də ehtiraslar coşmağa başlayır: 1974-cü ildə Türkiyənin Kiprə hərbi müdaxiləsi zamanı baş nazir olmuş deputat Bülənt Ecevit Naxçıvan, Zəngəzur və Qarabağ vasitəsilə Türkiyəni Azərbaycanla birləşdirmək üçün Ermənistanın cənub rayonlarının ilhaqını təklif edir. Eyni zamanda, Türkiyə tərəfdən Ermənistan ərazisinin atəşə tutulması kəskin surətdə güclənir. Vəziyyət saatbasaat pisləşirdi.
1993-cü il may ayının əvvəlində Rusiyanın müdafiə naziri Qraçov prezident Boris Yeltsinin tapşırığı ilə gözlənilmədən Ankaraya bir günlük səfərə yola düşür. Rusiyanın hərbi naziri vəziyyətlə bağlı Kremlin mövqeyini kəskin və lakonik şəkildə bildirir və türk tərəfinin mülahizələrinə qulaq asmadan dərhal təyyarəyə qayıdır. Rusiya mətbuatı yazır ki, Qraçov Ankaraya səfəri zamanı “Türkiyə yüksək hərbi komandanlığının nümayəndələri ilə Zaqafqaziyadakı münaqişələrin həlli məsələlərini müzakirə edib”.
Moskvanın xəbərdarlığından sonra Türkiyə rəhbərliyi Rusiya ilə qarşıdurmaya girmək riskinə düşməyərək ikinci dəfə müdaxilə ideyasından əl çəkir. Lakin buna baxmayaraq, Türkiyə diplomatik demarşa və iqtisadi sanksiyalara əl atır.
Dörd ay sonra, 1993-cü ilin sentyabrında Türkiyə rəhbərliyi Rusiyadakı parlament böhranı “pərdəsi altında” erməni məsələsini güc yolu ilə həll etmək şansının olduğu illüziyasına qapılir.
Ermənistan-Türkiyə sərhədində Türkiyə Silahlı Qüvvələrinin 9-cu Sarıkamış diviziyasının 220-ci mexanikləşdirilmiş və 9-cu artilleriya dəstələri atəş məsafəsində Ermənistanla sərhədə yaxınlaşır. Türkiyənin yeni baş naziri Tansu Çillər açıq şəkildə ermənilərin Dağlıq Qarabağa hücumu dayanmasa, bura qoşun göndərəcəyi ilə hədələyir.
Yunanıstanın Ermənistandakı o vaxtkı səfiri Leonidas Xrizantopulosun xatirələrinə (“Qafqaz xronikaları. Ermənistanda dövlət quruculuğu və diplomatiya”) görə, 1993-cü il sentyabrın sonunda Türkiyə rəhbərliyi Rusiya parlamentinin sədri Ruslan Xasbulatova müraciət edib, onu dəstəkləməkləri müqabilində türk qoşunlarının Ermənistana yaxınlaşan işğalına mane olmamaq barədə razılığa gəlirlər. Həmin vaxtda da Xasbulatovun Boris Yeltsinlə qarşıdurması özünün zirvəsində idi. L.Xrizantopulos Türkiyənin mümkün işğalı ilə bağlı məlumatı Fransa və ABŞ səfirləri France D'Artinqə və Harri Gilmordan alır: “Rusiya parlamentinin sədri Xasbulatov Türkiyənin baş naziri Tansu Çillər ilə gizli razılaşma əldə edirlər... Xasbulatov qalib gəlsəydi, rus sərhədçiləri Zaqafqaziyadan geri çəkiləcəkdilər... Bu, Türkiyəyə kürd problemini bəhanə edərək Ermənistana məhdud şəkildə müdaxiləni həyata keçirməyə imkan verəcəkdi”. Lakin Yeltsin əleyhinə üsyan yatırılan kimi türk qoşunları Ermənistan sərhədindən dərhal geri çəkildilər.
Beləliklə, Birinci Qarabağ müharibəsi boyu Rusiya Türkiyənin Ermənistan-Azərbaycan münaqişəsinə açıq müdaxiləsinin qəti əleyhdarı kimi çıxış etdi. Ermənistanın 1992-ci il mayın 15-də Kollektiv Təhlükəsizlik Müqaviləsinə qoşulması və Rusiyanın 102-ci ordusunun Gümrüdə yerləşdirilməsi bundan sonra Baş Qərargahın və Türkiyə rəhbərliyinin hadisələrə müdaxilə ehtirasını soyutdu.
Tərcümə etdi:
İlqar RÜSTƏMOV
XQ