Bakı Şəhər Halqası (BŞH) Əməliyyat Şirkəti “Formula 1” üzrə Azərbaycan Qran-Prisində könüllülərin qeydiyyat mərhələsinə start verib.
BŞH-dən “XQ”-yə bildiriblər ki, Bakının 8-ci dəfə evsahibliyi edəcəyi yarışın təşkili zamanı 1500 könüllünün cəlb olunması planlaşdırılır. Seçim mərhələsini uğurla başa vurmuş könüllülər müxtəlif sahələrdə, o cümlədən insan resursları, işçi qüvvəsi, media ilə iş, tribunalar, trek, ofis və hava limanı əməliyyatları, həmçinin digər istiqamətlərdə fəaliyyət göstərəcəklər.
Əvvəlki illərin təcrübəsi nəzərə alınaraq, müraciətlərin sayı çox olduğu üçün seçim zamanı xarici dil biliyi (ingilis dili) olan və daha öncə könüllü kimi fəaliyyət göstərmiş namizədlərə üstünlük veriləcək. Könüllülük proqramına 16 yaşdan yuxarı şəxslər müraciət edə bilər.
Qeyd edək ki, Azərbaycan Qran-Prisi sentyabrın 13-15-də təşkil olunacaq.
Leyla SABİRQIZI
XQ
