Vətən müharibəsindən ötən 3 il ərzində regionda yaranan geosiyasi durum təhlil ediləndə, ilk növbədə, ölkəmizin sülhpərvər mövqeyi aydın nəzərə çarpır. Bununla yanaşı, rəsmi İrəvanın Qarabağ məsələsini yenidən dondurulmuş vəziyyətdə saxlamaq, status-kvonu qeyri-müəyyən müddətə qədər uzatmaq niyyəti, işğalçının revanş üçün hazırlıq planı və yekun həll prosesini diplomatik dalana dirəmək cəhdi isə onun münaqişəni aradan qaldırmağa çalışmadığını ortaya qoyur. Bu, özünü Azərbaycan, Ermənistan və Rusiya liderlərinin 2020-ci il 10 noyabr tarixində imzaladıqları üçtərəfli Bəyanatın indiyədək tam həll olunmamasında da aydın göstərir.
Bu kontekstdə ötən gün yerli televiziya kanallarına müsahibə verən Azərbaycan Prezidenti İlham Əliyev, əslində, Ermənistanla sülh müqaviləsinin imzalanması üçün rəsmi Bakının bütün şərtlərini bir daha ifadə etdi və qarşı tərəf üçün normallaşma prosesinin “yol xəritəsi”ni diqqətə çatdırdı.
Dövlətimizin başçısı müsahibədə Tbilisidə İpək Yolu Forumunda Ermənistanın baş nazirinin “erməni qovşağı” layihəsinin adı dəyişdirilmiş forması olan “sülhün kəsişməsi” təşəbbüsünə də münasibət bildirdi. Qeyd edək ki, Azərbaycan, Türkiyə, İran, Gürcüstan və Ermənistan arasında kommunikasiyaların yaradılması və inkişafını nəzərdə tutan belə bir ideya, əslində, yeni deyil. Bu, Azərbaycan tərəfindən üç il bundan əvvəl səsləndirilib və hazırda Nikol Paşinyan həmin təklifin müəllifi kimi çıxış edir.
Müxbirin bu məsələ ilə bağlı sualına cavabında dövlətimizin başçısı regionda Azərbaycanın razılığı olmadan belə layihələrin reallaşmasının mümkünsüzlüyünü vurğuladı. Ölkə rəhbəri fikrinə əlavə olaraq bildirdi ki, Ermənistanın bu təşəbbüsü öz adına çıxması, əslində, sadəcə olaraq, piar aksiyadır. Çünki işğalçı dövlət, bununla əlaqədar məlun 10 noyabr üçtərəfli Bəyanatın müvafiq müddəasını yerinə yetirmir və faktiki olaraq öz öhdəliyinə laqeyd yanaşır. Ona görə bunu pərdələmək, eyni zamanda, “Zəngəzur dəhlizi” sözünü sildirmək üçün belə bir təklif irəli sürür.
Azərbaycan rəhbəri müsahibəsində “Zəngəzur dəhlizi” sözünün Ermənistanı çox qıcıqlandırdığını vurğulayaraq dəhlizin hər hansı bir ölkənin suverenliyini şübhə altına almadığını bildirdi. Vurğuladı ki, Şimal–Cənub dəhlizi var, Azərbaycan ərazisindən keçir. Bu, o demək deyil ki, bizim suverenliyimiz burada şübhə altına düşür. “Şərq–Qərb dəhlizi” ifadəsinə isə hansısa məntiqlə Ermənistan fərqli baxışla yanaşır. Dövlətimizin başçısının haqlı olaraq qeyd etdiyi kimi, qarşı tərəf bunu “erməni yol kəsişməsi”, yaud “yolayırıcı”, daha sonra isə “sülh yol kəsişməsi” adlandırıb. Amma faktiki olaraq bu, piar aksiyadan başqa bir şey deyil.
Prezident İlham Əliyev müsahibədə bir daha məlum 10 noyabr üçtərəfli Bəyanatın müvafiq müddəasını xatırladaraq Ermənistanın, ilk növbədə, Zəngilanla Ordubad arasındakı ərazidə Azərbaycana maneəsiz keçid vermək öhdəliyini üzərinə götürdüyünü, Azərbaycandan Azərbaycana, yəni respublikamızın digər ərazilərindən Naxçıvana gedən yüklərin, eləcə də vətəndaşlar və avtonəqliyyat vasitələrinin heç bir yoxlamadan keçmədən, gömrük inzibatçılığına cəlb edilmədən sərbəst keçidinə əngəl törətmək istəyini diqqətə çatdırıb. Dövlətimizin başçısı bununla bərabər, digər ölkələrin yüklərinin Ermənistan ərazisindən daşınması prosesində isə bütün gömrük rüsumlarının tətbiqinin ədalətli mövqe olduğunu xatırladıb.
Ölkə rəhbəri müsahibədə Zəngəzur dəhlizi ilə bağlı daha bir önəmli məqama – yolun təhlükəsizliyi ilə bağlı məsələyə də toxundu: “Mən dəfələrlə Ermənistan rəhbərliyinə demişəm ki, Ermənistanın qarantiyaları bizə kifayət deyil. 10 noyabr Bəyanatında göstərilmişdi ki, Rusiya sərhədçiləri 42-43 kilometr ərazidə təhlükəsizliyi və nəzarəti həyata keçirirlər və bu öhdəlik yerinə yetirilməlidir. Ermənistan isə bundan indi boyun qaçırmaq istəyir. Halbuki bu da məntiqli deyil. Çünki Rusiya sərhədçiləri Ermənistanın, İrəvanın aeroportundadırlar, Ermənistan-İran, Ermənistan-Türkiyə sərhədindədirlər. Niyə orada onlar qala bilərlər, amma burada qala bilməzlər? Sadəcə olaraq, bu, bir bəhanədir ki, bu yol açılmasın...”.
Bu məqamda xatırladaq ki, ötən müddətdə Ermənistanın havadarları, məsələn, Fransa dəhlizin açılmasına hər vəchlə mane olmağa çalışıb, hətta bu məsələ ilə bağlı Azərbaycana iftira atmaqdan belə çəkinməyib. Məsələn, işğalçı dövlətin mənafeyini müdafiə edən, haqq-ədalətdən dəm vuran bəzi dövlətlər, guya bu yol açılmasa, ölkəmizin güc tətbiq edərək məqsədini reallaşdırmaq istəyində olması ilə ittiham ediblər.
Prezident İlham Əliyevin sözləri ilə desək, halbuki bu, cəfəng bir ittihamdır. Belə ucuz şayiələri yayan da Fransadır. Biz dəqiq bilirik ki, hər yerdə danışırdılar və bu gün də yəqin ki, davam edir ki, bu gün-sabah Azərbaycan Ermənistana hücum edəcək. Halbuki bunun heç bir əsası yoxdur, heç bir hazırlıq da getmir və bu gün hazırlığı gizlətmək də mümkün deyil. Çünki hər şey yuxarıdan, peykdən görünür, digər informasiya mənbələri var...
Müsahibədə Azərbaycanın dəhliz infrastruktur ilə əlaqədar bundan sonrakı fəaliyyətinə də nəzər salınıb. Belə ki, üç il ərzində bölgədə sülhün, əmin-amanlığın bərpasını istəməyən qüvvələrin pozuculuğunun sonunu gözləmədən ölkəmiz alternativ yol seçmək fikrini reallaşdırdı–Azərbaycanın əsas hissəsinin Naxçıvanla birləşdirilməsi qərarına gəlindi. Bununla bağlı artıq İranla razılıq əldə edilib. Ötən qısa müddətdə infrastrukturun təməlqoyma mərasimi keçirilib. Hazırda Ağbənd istiqamətində artıq birinci körpünün inşasına başlanılıb və ikinci körpünün isə cari il Ordubad istiqamətində tikintisi nəzərdə tutulub.
Yeri gəlmişkən, Ermənistanın manipulyasiya edərək Azərbaycanın əsas hissəsindən Naxçıvana təklif etdiyi marşrut tamamilə yararsız haldadır və o yolun mütəmadi işləməsi mümkün deyil. Çünki həmin marşrutun keçdiyi ərazi relyef baxımından əlverişsizdir, yol payız-qış aylarında çox vaxt bağlı olur. Belə halda ən səmərəli variant Mehri ərazisindəndir. Bu coğrafiyada sovet vaxtında dəmir və avtomobil yolları istismar olunub. Ermənistanın belə bir ədalətli, həmçinin səmərəli təkliflə razılaşmadığı təqdirdə şübhəsiz ki, iqtisadi-ticari əlaqələrində acınacaqlı vəziyyət yaranacaq.
Dövlətimizin başçısı müsahibəsində Xəzər regionunun Avropanın enerji keçidinin əsas mərkəzlərindən birinə çevrilməsi, hətta 2030-cu ilə qədər bu potensialın 30 faiz artırılmasının planlaşdırılması, həmçinin ölkəmizin bu il COP29 kimi böyük bir tədbirə evsahibliyi edəcəyi ilə bağlı üzərinə düşən vəzifələr barədə ətraflı bəhs etdi. Dövlətimizin başçısı, eyni zamanda, bütün bunların Azərbaycan üçün mühüm önəm daşıdığını, respublikamızın beynəlxalq nüfuzunu göstərdiyini və uğurlu siyasətimizdən xəbər verdiyini bildirib.
Ölkə rəhbəri COP29-la bağlı son hadisələrin gedişatını təhlil edərək çox dəqiq və düşünülmüş diplomatik addımlar nəticəsində bu mötəbər tədbiri Azərbaycanda keçirmək üçün əlverişli imkan əldə edildiyini vurğulayıb: “COP30-un ev sahibi bəlli olsa da –Braziliya, COP29-un ev sahibi son günlərə qədər bəlli deyildi. Xüsusilə son həftələr ərzində, hətta COP konfransı Dubayda başlayandan sonra da hələ aktiv diplomatik təmaslar davam edirdi və biz burada da istədiyimizə nail olduq. Halbuki burada da, yenə də bizim dırnaqarası ənənəvi dostlarımız hər iki tədbirdə bizə əngəl törətməyə çalışırdılar, COP29-da, necə deyərlər, daha gizli formada. Çünki burada, eyni zamanda, bölgədə sülhə doğru bir addım nəzərdə tutulurdu və bu addıma qarşı getmək, əlbəttə ki, heç kimə şərəf gətirməzdi...”.
Deməli, BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası, yəni COP29-un bu il Azərbaycanda keçiriləcəyinə əngəllər göstərilsə də, son nəticədə bütün cəhdlər boşa çıxıb, ədalət qalib gəlib. Bununla bağlı qərar isə ötən il dekabrın 11–də Dubayda keçirilmiş plenar iclasında qəbul olunub.
COP iqlim dəyişikliyi ilə mübarizədə çox vacib və dünyanın ən əhəmiyyətli tədbirlərindən biridir. Azərbaycanın bu tədbirə Şərqi Avropa Qrupu ölkələri arasından yekdil qərarla ev sahibi seçilməsi ölkəmizə yüksək etimadın göstəricisidir. Azərbaycan artıq beynəlxalq tədbirlərə evsahibliyi etmək sahəsində özünə yetərincə müsbət imic qazanıb. Tədbirin Azərbaycanda keçirilməsi ilə bağlı qərar həm də ona görə əhəmiyyətlidir ki, bu, Azərbaycanın lokal antiterror tədbirlərindən iki ay yarım sonra verilib. Bu isə dünya ictimaiyyətinin Azərbaycanın atdığı addımlara dəstəyindən xəbər verir. Bu tədbir Azərbaycanın neft-qaz ölkəsi olmaqla yanaşı, yaşıl iqtisadiyyatı nə dərəcədə prioritet sahə kimi gördüyünü bütün dünyaya sübut edəcək. Tədbirin Bakıda keçirilməsi Azərbaycanın nüfuzunun daha da artmasına və ölkə reallıqlarının dünya ictimaiyyətinə birbaşa və asan çatdırılmasına böyük təkan verəcək.
Müsahibədə vurğulandığı kimi, 2024-cü ildə ölkəmizdə keçiriləcək COP29 dünyanın ən aktual bəşəri problemlərinin müzakirə olunduğu mühüm beynəlxalq platformadır. Bu tədbirin Azərbaycanda keçirilməsi böyük etimadın göstəricisi olmaqla, ölkəmizin qlobal problemlərin həllində məsuliyyətli və etibarlı tərəfdaş mövqeyini təsdiqləyir.
Azərbaycan BMT-nin İqlim Dəyişmələri üzrə Çərçivə Konvensiyasına tərəf olmaqla qlobal iqlim dəyişmələrinə qarşı mübarizədə öz töhfəsini verir. SOCAR-ın COP28-də metan tullantılarının sıfıra endirilməsi ilə bağlı könüllü öhdəlik götürməsi ölkəmizin iqlim problemlərinə həssaslığının təzahürüdür.
Qeyd edək ki, “Yaşıl iqtisadiyyata keçid” və “yaşıl enerji” təchizatçısına çevrilmək Azərbaycanın iqtisadi siyasətinin prioritetlərindəndir. Dövlət başçısının müvafiq sərəncamı ilə 2024-cü ilin ölkəmizdə “Yaşıl dünya naminə həmrəylik ili” elan edilməsi də bu istiqamətdə təşəbbüsləri stimullaşdıracaq.
Prezident İlham Əliyev yerli televiziya kanallarına müsahibəsində Böyük Qayıdış Proqramına da toxunaraq Qarabağ və Şərqi Zəngəzur iqtisadi rayonlarında həyata keçirilən sürətli bərpa və yenidənqurma layihələrinin icrası ilə bağlı fikirlərini də bölüşüb. Dövlətimizin başçısı bununla əlaqədar hesabat ilində qarşıda duran vəzifələrdən bəhs edib və yerli sahibkarların, həmçinin xarici investorların bu işlərə daha da fəal cəlb olunması üçün hansı institusional addımlar atılmasından bəhs edib. Ölkə rəhbəri müsahibədə, ilk növbədə, işğaldan azad olunan ərazilərdə infrastruktur layihələri ilə yanaşı, əsas nailiyyəti–beş yaşayış məntəqəsinə keçən köçkünlərin məskunlaşdığını diqqətə çatdırıb.“Laçın, Füzuli şəhərləri, Ağalı, Talış və Zabux kəndləri artıq dirçəlir. Bu il həmin o yaşayış məntəqələrinə keçmiş köçkünlərin qaytarılması davam edəcək. Bu ilin İnvestisiya Proqramı yaxın günlərdə mənim tərəfimdən təsdiq olunacaq, bir neçə dəfə artıq müzakirədən keçib. Həm Qarabağa, Şərqi Zəngəzura, həm də ölkəmizin digər yerlərinə aid İnvestisiya Proqramı bizim əsas alətimizdir, bərpa üçün əsas alətimizdir”,–deyib.
Xatırladaq ki, cari il Qarabağ və Şərqi Zəngəzurda infrastruktur layihələrinin icrası davam etdiriləcək, su anbarları, yollar, körpülər, dəmir yolları, məktəblər və xəstəxanaların tikintisi diqqətdə saxlanılacaq. İçməli su xətləri, elektrik enerjisi ilə bağlı layihələrin gerçəkləşdirilməsinə xüsusi önəm veriləcək. Sərsəng və Xaçınçay su anbarlarının bərpası məqsədilə tədbirlər görüləcək. Yaxın gələcəkdə Füzulidəki Köndələnçay Su Anbarının açılışı reallaşacaq. Zabuxçay Su Anbarının tikintisi isə bu il tamamlanacaq. Bütün bunların nəticəsində böyük bir ərazinin suvarma suyu ilə təminatı öz həllini tapacaq.
Bu gün düşməndən təmizlənən ərazilərdə sənaye müəssisələri yaradılır. Artıq Ağdam və Cəbrayılda iki böyük sənaye zonası fəaliyyət göstərir, əraziləri getdikcə genişlənir. Belə bir sürətli bərpa-quruculuq işləri daha böyük sayda keçmiş köçkünləri öz dədə-baba torpaqlarına– Şuşa, Cəbrayıl, Kəlbəcər, Xankəndi və Xocalı şəhərlərinə qaytarılmasını da şərtləndirir.
Dövlətimizin başçısı müsahibədə Ağdam, Zəngilan, Qubadlı şəhərlərinə isə keçmiş məcburi köçkünlərin 2025-ci ildə qayıtmasının nəzərdə tutulduğunu, Xocalının Kərkicahan, Malıbəyli, Turşsu kəndlərinin də bərpasına artıq start verildiyini də bildirib və 2026-cı ilin sonuna qədər 140 min keçmiş köçkünün öz dədə-baba torpaqlarına qaytarılmasının əsas vəzifə olduğunu vurğulayıb. “Əminəm ki, biz buna da nail olacağıq. Onu da bir daha bildirməliyəm ki, bütün bunları biz öz daxili imkanlar hesabına edirik. Heç bir donor təşkilatı, heç bir digər tərəf bizə kömək göstərmir. Ancaq Özbəkistan və Qazaxıstan Füzulidə iki məktəbin tikintisi ilə bağlı bizə qardaş dəstəyi göstərmişdir, bütün qalan layihələr daxili imkanlar hesabına reallaşdırılır”,–deyə ölkə rəhbəri qeyd edib.
Vaqif BAYRAMOV
XQ