Ermənistan parlamentinin sədri yerli-yersiz anti-Rusiya xətti nümayiş
etdirməkdən çəkinmir

Ermənistan parlamentinin spikeri Alen Simonyan, deyəsən, Rusiya Prezidenti Vladimir Putinlə məzələnmək qərarına gəlib. Əlbəttə, onun qatı anti-Rusiya mövqeyi ilə seçilən siyasətçi olduğu məlumdur. Amma mənasız yerə bu qədər qeyri-etik tərzdə fikir bildirəcəyini ehtimal etmək çətin idi. 

Əvvəla, Simonyanın Qarabağı Azər­baycana Rusiyanın verdiyinə dair bir müddət əvvəlki bəyanatını yada salaq. Erməni spiker konkret olaraq bildirmişdi ki, Moskva Qarabağı 10 noyabr 2020-ci il tarixli üçtərəfli Bəyanatla Bakıya ər­məğan edib. İndi isə o, təmsil olunduğu komandanın Rusiya Prezidenti Vladimir Putini Ermənistana daxil olacağı təq­dirdə, həbslə üzləşmək təhlükəsindən qurtardığını vurğulayıb. Necə? Söhbə­timiz əsasən bu barədədir, ancaq digər məqamlara da nəzər salacağıq. 

Məlum olduğu kimi, Ermənistan par­lamenti müxalif parlamentarilərin müza­kirəyə çıxardığı mənfur “Ayakve” təşəb­büsünü rədd edib. O təşəbbüsü ki, onun qəbulu ilə Qarabağın Azərbaycan ərazisi kimi tanınması kriminallaşdırılır, yəni ci­nayət məsuliyyəti yaradırdı. Əlbəttə, er­məni Milli Assambleyasının bu qondarma qanun layihəsini qəbul etməyəcəyi bilinir­di. Çünki “Ayakve” mahiyyətcə erməni iqtidarının anti-Azərbaycan fəaliyyətinə və Qarabağ avantürizminin davamı “sse­narisinə” zidd təmayüldür. Yada salaq ki, Qarabağı Azərbaycanın tərkib hissəsi kimi tanıdığını bəyan edən rəsmi İrəvan bütün beynəlxalq platformalarda böl­gə ermənilərinin hüquq və təhlükəsizliyi məsələsini qaldırır. Yəni, onun “yöntəmi” müxaliflərin yanaşmasından fərqlidir – əvvəl hüquq və təhlükəsiz təminatı, son­ra ərazi iddiası. 

Onu da vurğulayaq ki, A.Simonyanın tərkibində təmsil olunduğu hakim koman­da tam perspektivsiz “Ayakve” təşəb­büsünün parlament tribunalarına da­şınmasına qəsdən göz yumub. Məqsəd çox sadədir. Baş nazir Nikol Paşinyan və tərəfdarları Qərbə Ermənistanda Qara­bağ mövzusunda barışmaz, daha avan­türist kəsimin mövcudluğunu göstərmək istəyirlər. Ona görə göstərmək istəyirlər ki, Qərb dünyası rəsmi İrəvanın minu­mum kimi qiymətləndirilən tələbinin ye­rinə yetirilməsində, yəni haqqında danış­dığımız Qarabağ ermənilərinin hüquq və təhlükəsizliyi məsələsində israrlı davran­sın, Azərbaycana təzyiq göstərərək, onu tutduğu prinsipial yoldan döndərsin. Loru dildə desək, təxminən belə: ruspərəstlər çox istəyir, niyyətləri Kremlin Qarabağ müstəvisində Cənubi Qafqazda söz sa­hibinə çevrilməsidir, heç olmasa, bizə azı verin. 

Bəs, belə demək mümkünsə, “Ayak­ve”çi müxalifətçilər kimlərdir? O adamlar ki, Rusiya ilə bağlıdırlar. Yəni, Ermənis­tandakı müxalif düşərgənin, əsasən, rusmeylli şəxslərdən təşkil olunduğu hər kəsə yaxşı məlumdur. Ona görə də A.Simonyan onların üzərindən Rusiya­nın dövlət başçısına, belə demək müm­künsə, “sataşmağa” cəsarətlənir. O deyir ki, “Ayakve” qanunvericilik təşəbbüsü qəbul olunsa, Ermənistan hüquq-müha­fizə orqanları Rusiya Prezidenti Vladimir Putinə qarşı cinayət işi başlatmağa məc­bur qalacaqdılar. Erməni spiker bunu ona görə bildirir ki, Kremlin rəhbəri dəfələrlə çıxışlarında Qarabağın Azərbaycana məxsusluğunu vurğulayıb. 

Bəli, “Ayakve” əsasında Ermənis­tanın Cinayət Məcəlləsinə dəyişiklikləri nəzərdə tutan səsvermənin nəticələri barədə danışan parlamentin sədri bildirib ki, müxalifət, qanun layihəsinin əleyhinə səs verdiyinə görə, hakim qüvvəyə min­nətdar olmalıdır. “Biz sizə sifətinizi xilas etməyə kömək göstərdik. Çünki siz bu qanun layihəsinin girovu oldunuz. Sualım budur: Bu qanun “Artsax”ı Azərbaycanın bir hissəsi kimi tanıdığına görə müttəfiqi­miz Rusiyanın prezidentinə şamil oluna­caqmı?”

Qeyd edək ki, A.Simonyanın sualı­nı “Ermənistan” fraksiyasının katibi və “Ayakve” təşəbbüsünün müəlliflərindən olan Artsvik Minasyan yerindən belə ca­vablandırıb: “Bu məsələ hakim qüvvədən başlayaraq, hamıya şamil olunacaq”. Ardınca spiker yenə də məzələnməyə keçib: “Təşəkkür edirəm, bunu bildirmə­yiniz çox vacibdir. Sonra da deyirlər ki, siz ruspərəst müxalifətsiniz. Mən şəxsən buna inanmıram”.

Birincisi, A.Simonyanın replikası məntiqsizdir. Elə bu məntiqsizliyə görə də bildirmək mümkündür ki, erməni spi­kerin məqsədi Rusiyaya qarşı nalayiq tərzdə söz açmaqdır. Hiss olunur ki, Er­mənistanın hakimiyyət komandasının hər bir üzvü kimi, A.Simonyan ölkəsi­nin anti-Rusiya xəttini yerli-yersiz bütün məqamlarda ortaya atmaq əzmindədir. 

Əslində, “Ayakve” təşəbbüsü Qara­bağın Azərbaycanın tərkib hissəsi kimi tanınmasına görə cinayət məsuliyyətini yalnız Ermənistan Respublikası adından danışan məmurlara şamil edir. Yəni, Pre­zident Putinin məsələyə, ümumiyyətlə, dəxli yoxdur. İkincisi, A.Minasyanın “qa­nun hamıya şamil ediləcək” cavabı da mənasızdır. Aydındır ki, onun hamıya şa­mil edilməsi mümkünsüzdür. Üçüncüsü isə əsas məsələ V.Putinin Ermənistana daxil olduqda dərhal həbsindədirsə, bu xüsusda üzərində dayayılmalı olan daha böyük məqam var. Söhbət ölkə parlame­tinin ratifikasiya etdiyi və prezidentinin təsdiqlədiyi Roma Statutundan gedir. 

Məlum olduğu kimi, Roma Statutu­na qoşulma Beynəlxalq Cinayət Məh­kəməsinin Rusiya Prezidenti V.Putinin və ölkənin digər rəsmilərinin həbsinə dair çıxardığı orderin Ermənistanda da keçər­liliyi anlamını verir. Bu o deməkdir ki, ha­zırkı dövrdə Putin “Ayakve”yə görə deyil, məhz Roma Statutuna görə həbslə üz­ləşə bilər. Əlbəttə, Ermənistana gəlsə... 

R.ƏVƏZ
XQ