Vay-şivənə, dezinformasiyaya “uyanların” məsələyə ikili standartla yanaşması şübhə doğurmur
Doğrudanmı, Qarabağ iqtisadi rayonunda yaşayan ermənilər yeməyə çörək tapmırlar, sanitar-gigiyenik vasitələrdən məhrum olublar? Real durumun heç də belə olmadığını İrəvanın “karvan-şousu”na “ləbbeyk” deyənlərin özləri də yaxşı bilirlər. Amma, buna baxmayaraq, onlar Bakı ilə ultimativ tonda danışmağa başlayıb, “Laçın dəhlizi”nin təcili açılmasını tələb edirlər.
Əvvəlcədən təşkil olunduğu şübhə doğurmayan bu siyasi şantaja və dezinformasiyaya söykənən təzyiqlər, ermənipərəst ölkələrin və beynəlxalq qurumların bəyanatları bir şeydən xəbər verir: Azərbaycana münasibətdə ikili standart mexanizmi yenidən işə salınıb.
Avropa İttifaqının vasitəçiliyi ilə keçirilən sonuncu Brüssel Zirvə görüşündən sonra Aİ Şurasının prezidenti Şarl Mişel Bakının Ağdam-Xankəndi yolundan alternativ marşrut kimi istifadə təklifini bəyəndiyini rəsmən açıqladı. Bəs həmin beştərəfli danışıqların gedişində niyə Ermənistanın baş naziri yüklərin Laçın yolu vasitəsilə daşınmasında israr etmədi? Axı, o, Bakının bu təklifinə narazılığını Brüssel görüşündən sonra da dilinə gətirə bilərdi. Amma heç nə demədi.
Məntiq isə bunu deyir: əgər İrəvan Azərbaycanın suveren ərazisi kimi tanıdığı Qarabağa humanitar yardım göndərmək barədə Bakıya hər hansı müraciət etməyibsə, deməli, indi görünən mənzərə planlaşdırılmış təxribatdır. Bəs nədən bir sıra dövlətlər hayların bu təxribat cəhdinə dəstək verirlər? Ortada boy atan şübhəli məqamlardan biri də separatçıların “blokada”, “humanitar böhran” bağırtılarına “züytutanların” bir qələmin məhsulu kimi görünən eyni məzmunda bəyanatlar vermələridir. Əslində, bu, rejissor çubuğu ilə hərəkətə gətirilən dəstəkçilərin məsələyə ikili standartla yanaşmasının növbəti bariz nümunəsidir.
“ABŞ Laçın dəhlizinin təcili şəkildə açılması çağırışını bir daha təsdiqləyir”. Hayastanın “armenpress” saytının yaydığı məlumata görə, Dövlət katibi Entoni Blinkenin “Laçın dəhlizinin özəl və kommersiya daşımaları üçün təcili açılması” ilə bağlı çağırışını Birləşmiş Ştatların Ermənistandakı səfirliyi özünün Facebook səhifəsində yerləşdirib. Məlumatda o da qeyd olunur ki, səfirin müavini Con Alelo diplomatik korpusun nümayəndələri ilə bir yerdə Sünikdə olub və buradakı məcburi köçkünlərdən və bölgənin rəhbərlərindən “Laçın dəhlizinin blokadası” səbəbindən üzləşdikləri “məhrumiyyətlər” barədə öyrənib. Amerikalı diplomatın Sünikdə (Zəngəzur) başqa nələri öyrəndiyini deyə bilmərik, amma cənab Alelonun məlum bəyanatı birbaşa “yuxarıların” diktəsi ilə verdiyinə şübhə yoxdur.
“Laçın dəhlizi mütləq açılmalıdır. Hətta Beynəlxalq Qırmızı Xaç Komitəsinin humanitar yardımının Ermənistandan Dağlıq Qarabağa çatdırmağın mümkünsüzlüyü faktı qəbulolunmazdır. Vəziyyətin daha da gərginləşməməsi üçün Azərbaycana təzyiq göstərmək vacibdir”. Bu “həyəcanverici” açıqlamanı Almaniya Bundestaqının İnsan haqları üzrə komissiyasının sədri Renata Alt Twitter-də yazıb. ADR hökumətinin Cənubi Qafqaz, Moldova və Mərkəzi Asiya ilə cəmiyyətlərarası əməkdaşlığın koordinatoru Robin Vaqener, Bundestaqın beynəlxalq məsələlər üzrə komitəsinin üzvü Merle Şpelerberq isə “Dağlıq Qarabağ” (?) sakinləri üçün göndərilən yardımın gərgin vəziyyətin yumşalmasına səbəb olacağını bildirir, “Laçın dəhlizinin Azərbaycan tərəfindən blokadasının təcili dayandırılmasını” tələb ediblər. Yəni, Almaniyada əyləşib kimlərinsə göstərişi ilə Bakıya ultimatum verirlər. Onların cavabını Azərbaycan XİN bölgədəki son vəziyyətə dair bəyanatında verdi: “Azərbaycan tərəfinin erməni sakinlərin ehtiyaclarının qarşılanması üçün “Ağdam-Xankəndi” yolundan və digər alternativ yollardan istifadə daxil olmaqla bir sıra təkliflər irəli sürməsinə və onların Avropa İttifaqı, BQXK tərəfindən dəstəklənməsinə baxmayaraq, erməni tərəfinin bu təkliflərə qarşı çıxması, alternativ yollara beton maneələr düzməklə əraziyə girişi bloklaması Ermənistanın humanitar vəziyyət barədə iddialarının siyasi şantaj və manipulyasiya olduğunu bir daha göstərib: “Ermənistanın məqsədi bölgəyə üçüncü tərəfləri cəlb etmək, gərginliyin coğrafiyasını genişləndirmək və sülh prosesini iflasa uğratmaqdan ibarətdir”.
* * *
Heç kim Azərbaycanla bu tərzdə danışa bilməz. Buna cürət etsələr də, sonda heç bir nəticəsi olmayacaq. “Karvan-şou”nun ideoloqlarının İrəvanın siyasi təxribatına dəstək nümayişi də iflasa uğrayacaq. Çünki haqsızdırlar. Azərbaycanın mövqeyi hamıya aydındır. Ağdamdan Xankəndiyə aparan yol tam hazırdır, bu barədə Bakı öz təklifini verib və Aİ bunu qəbul edib. Yəni, Qarabağ iqtisadi rayonunda yaşayan ermənilər üçün humanitar yüklər yalnız gömrük və sərhəd prosedurundan keçdikdən sonra göstərilən yolla Xankəndiyə çatdırıla bilər. Ermənistan və Azərbaycanın şərti sərhədində, Laçın yolundakı Həkəri postu isə əvvəlki ahəngi ilə fəaliyyət göstərir. Sıravi ermənilər bu məntəqədən hər iki istiqaməıtdə maneəsiz hərəkət edirlər.
Hər şeydən göründüyü kimi, İrəvan və onun “züytutanları” sülh danışıqlarının indiki mərhələsində siyasi manipulyasiya ilə məşğuldurlar. Amma onlar bu hərəkətləri ilə Azərbaycanın daxili işlərinə qarışmalarının, suverenliyimizə və ərazi bütövlüyümüzə qarşı hörmətsizlik etdiklərinin fərqinə varmalıdırlar. Azərbaycan XİN-in məhz onlara ünvanlanmış xəbərdarlıq xarakterli bəyanatında bu məqama xüsusi diqqət yetirlilib: “30 il ərzində Azərbaycan ərazilərinin işğalına göz yuman bir sıra ölkələrin və beynəlxalq təşkilatların Azərbaycana qarşı qərəzli bəyanatlar verməsi qəbuledilməzdir. Həmin ölkələr və beynəlxalq təşkilatlar son üç il ərzində Azərbaycan ərazilərində erməni silahlı qüvvələrinin mövcudluğuna, Ermənistanın kommunikasiyaların açılmasına maneçilik törətməsinə də etinasız yanaşıblar. Ermənistanın manipulyasiyalarına aldanıb qərəzli bəyanatlar verən ölkələrdən və beynəlxalq təşkilatlardan Azərbaycanın suverenliyinə və ərazi bütövlüyünə hörmətlə yanaşmağı, ölkəmizin daxili işlərinə qarışmamağı və ikili standartlar siyasətinə son qoymağı tələb edirik. Azərbaycan özünün Qarabağ bölgəsində yaşayan erməni sakinlərin hüquqlarını ölkə Konstitusiyası əsasında təmin edəcək, suverenliyi və ərazi bütövlüyünə qarşı istənilən addımın qarşısını isə qətiyyətlə alacaq”.
* * *
Qarabağ Ermənistan rəhbərliyinin, o cümlədən bütün dünyanın Azərbaycanın ayrılmaz tərkib hissəsi kimi tanıdığı ərazisidir. Bölgənin hər cəhətdən inkişaf etmiş dövlətinə çevrilən Azərbaycanın ərzaq çatışmazlığı kimi problemi yoxdur. Ərazimizdə yaşayan, vətəndaşımız olacaq erməni əhalinin də bütün ehtiyacını ödəməyə qadirik. Çünki Azərbaycan Ermənistan kimi xaricdən göndərilən ianələrin, lobbi paylarının hesabına yaşayan dövlət deyil. Özümüz-özümüzü hər cəhətdən təmin etməklə yanaşı, artıq mal-məhsulumuzu xaricə ixrac edirik. Yəni, belə bir şəraitdə Azərbaycanda hansı “humanitar böhran”dan danışmaq mümkündür? Böhranı yaradan Xankəndidən çıxmağa tələsməyən daşnak-separatçılardır. O hərbi-kriminal xunta ki, erməni əhalini girova çevirməklə, Ağdam-Əsgəran yoluna beton maneələr düzməklə onların Azərbaycana reinteqrasiyasının qarşısını almağa cəhd göstərirlər. Bunların heç bir faydası olmayacaq. Bakı son 30 ildə, xüsusən də son 3 ildə çox maneələri aşmağı bacardığı kimi, o beton plitələri də aradan qaldırmağa nail olacaq.
İmran BƏDİRXANLI, “Xalq qəzeti”