Azərbaycan Mətbuat Şurası Fransa Prezidenti Emmanuel Makrona ölkə Senatının sədri Jerar Larşenin paylaşımının Fransa mediasında yayılması və həmin paylaşımın yanlış təəssüratın formalaşmasına səbəb olması ilə bağlı açıq məktub ünvanlayıb. MŞ-dən “Xalq qəzeti”nə daxil olmuş məktubda bildirilib ki, Ermənistan Parlamentinin spikeri Alen Simonyan bu il iyulun 11-13-də Fransaya işgüzar səfəri çərçivəsində Senatın sədri Jerar Larşe tərəfindən qəbul edilib. J.Larşe iyulun 13-də özünün tvitter hesabındakı paylaşımında bildirib ki, A.Simonyanla ayın 11-də keçirdiyi görüşdə Qarabağı Ermənistanla birləşdirən Laçın dəhlizinin dərhal açılmasını guya Ermənistanın təhlükəsizliyinin təminatı məqsədilə Fransanın ona müdafiə xarakterli silahlar verməsini tezləşdirməyi tələb edib. 

Məktubda vurğulanıb ki, Fran­sa parlamentinin yuxarı palatası olan Senatın rəhbərinin bu mövqe­yi Azərbaycan cəmiyyətində ciddi etiraz formalaşdırdığı kimi, ölkə­mizin media ictimaiyyətinin də na­razılığına səbəb olub. Həmçinin, Larşenin paylaşımının Fransanın ayrı-ayrı media orqanlarında ya­yılması və təqdir edilməsi də ciddi narazılıq doğuran məqamlardan biridir: “Hesab edirik ki, Senat sədrinin belə fikir bildirməsi həs­saslığı ilə seçilən Cənubi Qafqaz bölgəsində sülhün əldə edilməsinə yönələn səylərə qarşı çıxmaq cəh­didir. Təəssüf ki, bu cəhd müxtə­lif media vasitələrinin köməyi ilə Fransanın ictimaiyyətinə ötürülüb, bununla faktiki müharibə ab-ha­vasının formalaşdırılmasına start verilib”.

Hazırda Azərbaycanla Ermə­nistan arasında danışıqların da­vam etdiyinin vurğulandığı açıq məktubda, eyni zamanda, Azər­baycan mediasının iki ölkənin or­taq məxrəcə gəlməsi, sülh müqa­viləsinin imzalanması, bölgədə kommunikasiyaların tam açılma­sı, sərhədlərin delimitasiyası kimi məsələlərin həllinə yönəlmiş səy­ləri yaxından izlədiyi vurğulanıb. Avropa İttifaqının da diqqət mərkə­zində olan bu prosesə bütövlükdə böyük ictimai marağın mövcudlu­ğu önə çəkilib: “Mövcud şəraitdə, sülh gündəliyinin aktuallıq daşı­dığı bir zamanda cənab Larşenin Ermənistanın silahlandırılması və yekun nəticədə isə regionun mili­tarizasiyası məqsədini güdən bu mesajını yolverilməz hesab edirik”. 

Müraciətdə o da vurğulanıb ki, otuz ilə yaxın müddətdə münaqişə­nin ədalətli həllinə yönəlmiş hər hansı addımın atılmaması, əksinə, Ermənistanın davamlı silahlandı­rılması işğalçının yeni cinayətlərə hədəflənməsinə şərait yaratdı. “Hesab edirik ki, beynəlxalq aləm, o cümlədən Fransa ictimaiyyəti və mediası ilk növbədə bunu nəzərə almalı, regionda gərginliyin daha da artmasına və arzuolunmaz ssenarilərin yaşanmasına qarşı müqavimət göstərməlidir. Cənab Larşenin fikirlərinin təbliği yaşadı­ğımız coğrafiyada hələ də kövrək olan sülh gündəmini təhlükəyə atır, millitarizmin vüsət alması üçün zə­min yaradır. Bu, Azərbaycan cə­miyyətinin müxtəlif təbəqələri kimi, ölkəmizin mühüm ictimai institut­larından sayılan, tərkibində apa­rıcı media orqanlarını və jurnalist təşkilatlarını birləşdirən Mətbuat Şurasını da məyus edir və təəs­süfləndirir. Azərbaycan jurnalistlə­ri hesab edirlər ki, indi yaranacaq hansısa xoşagəlməz hala, silahlı eskalasiyaya və digər gərginlik tə­mayüllərinə görə məsuliyyət birba­şa Fransa dövlətinin və onun rəh­bərliyinin üzərinə düşəcək”, – deyə sənəddə bildirilib. 

MŞ-nin məktubunda Fransa rəhbərliyinin birtərəfli mövqeyini, Ermənistanı silahlandırmaqla regi­onda qeyri-sabitliyin daha da güc­lənməsinə yönəlmiş siyasətini ye­nidən nəzərdən keçirəcəyinə ümid ifadə olunub: “Onu da diqqətinizə çatdırmaq istərdik ki, hazırkı dövrə kimi Fransa tərəfindən Ermənis­tana piyada döyüş maşınlarının, Fransanın lisenziyası ilə Hindis­tanda istehsal olunan artilleriya və raket sistemlərinin va digər hücum və öldürücü ağır silahların veril­məsinə dair faktlar vardır. Bundan başqa, Fransanın Ermənistanda hərbi attaşe ofisini yaratdığı da bil­dirilir. Ümid edirik ki, qeyd edilmiş bu məsələlər ciddi araşdırılacaq, bizim sorğularımız cavablandırıla­caq və Fransa dövləti bütün bunla­ra aydınlıq gətirəcəkdir”. 

MŞ məktubunda Makronu qaldırılan məsələyə həssas ya­naşmağa, Cənubi Qafqazda da­vamlı sülhün dəstəklənməsinə səy göstərməyə çağırıb: “İnanmaq istərdik ki, çağırışımıza adekvat münasibət ortaya qoyulacaq və Fransa bundan sonra Azərbay­canla Ermənistan arasında prob­lemlərin həlli məsələsində ədalətli mövqe nümayiş etdirəcək, gərgin­liyin aradan qalxmasına töhfə ver­məklə, hər iki ölkənin xalqlarının dinc və əmin-amanlıq şəraitində yaşaması kimi bəşəri missiyanın gerçəkləşməsinə kömək göstərə­cəkdir”.

“Xalq qəzeti”