Ermənistanda hakimiyyət nə etdiyini bilmir. Baş nazir Nikol Paşinyan və onun administrasiyasında təmsil olunan şəxslərin bir sözü ilə o biri düzgün gəlmir. Ortada ölkə iqtidarının qeyri-ciddi obrazı canlanmaqdadır. Bəs müxalifət? Ermənistan müxalifəti hansı durumdadır?
Əlbəttə, ölkədə əks düşərgənin, əsasən, Rusiyaya yaxın şəxslərdən ibarət olduğu məlumdur. Nəzərə alsaq ki, Ermənistanda media da ruspərəstlərin əlində cəmləşib, o zaman müxalifət kimi qiymətləndirilən kəsimin səsinin daha çox çıxması qanunauyğundur. Sanki, Paşinyana qarşı total narazılıq dalğası var. Bəzən, elə təəssürat yaranır ki, baş nazirin devrilməsi an məsələsidir. Bu görüntü artıq neçə illərdir gündəmdədir, ancaq baş nazir kreslosunu tərk etmir. Tərk etmək fikrində olmadığı da aşkardır.
Məlumdur ki, Ermənistanın müasir tarixində hakimiyyət terroru da baş verib. 1999-cu ilin oktyabrındakı parlament qətliamını nəzərdə tuturuq. O qətliamı ki, ölkənin baş naziri və parlamentin spikeri daxil olmaqla, yüksək vəzifəli şəxslərin, o cümlədən, deputatların fiziki məhvi ilə nəticələnmişdi. Doğrudur, həmin terrorun sifarişçisi 1998-ci ildə ölkə prezidenti seçilmiş Robert Koçaryan və onun əlaltısı Serj Sarkisyan (Koçaryandan sonra Sarkisyan prezident oldu – red.) idi.
Yəni, terror, bilavasitə, müxalif kəsim deyil, hakimiyyətdə təmsilçiliyi olanlar tərəfindən gerçəkləşdirilmişdi. Ancaq onu da deməliyik ki, o zaman prezident Koçaryan baş nazir və parlament sədrinin, eləcə də digər nüfuzlu dövlət xadimlərinin cəmiyyətdəki üstün mövqeyi səbəbindən, demək olar, müxalifətə çevrilmək üzrəydi, həlledici söz sahibi deyildi. Ancaq bu amplua Qarabağ klanının təmsilçisi olan Robertə öz tərəfdarları ilə birgə Azərbaycana qarşı olan yumşalmanı aradan qaldırmağa maneçilik törətmədi. Bəli, 1999-cu ilin parlament qətliamı Bakı ilə İrəvan arasında reallığa çevrilməkdə olan və böyük nikbinlik doğurmuş sülh prosesini əngəllədi, daha dogrusu, sülh və güzəşt tərəfdarları məhv edildi. O vaxtdan başlayaraq, iyirmi ildən də artıq davam edən, mənasız danışıqlar mərhələsi start götürdü. Torpaqlarımız işğalda qaldı...
Terror məsələsini indi təsadüfən xatırlamadıq. Paşinyan administrasiyasının müxtəlif manipulyativ addımlarına baxmayaraq, Ermənistanda bütün yolların, hətta məcburi də olsa, Azərbaycanla sülh müqaviləsinə apardığı məlumdur. Sadəcə, bunun geci-tezi var. Tez olması Ermənistana xeyirdir, məsələnin uzanmasından isə ölkə daha çox ziyan görəcək...
Ancaq haqqında söz açdığımız terror təmayülünü də kənara qoymamalıyıq. Bəli, Ermənistanda Paşinyana qarşı da terror aktının gerçəkləşə bilmə ehtimalını düşünməyə dəyər. Hər halda, ümumən, erməni tarixinin həm də terror tarixi olduğunu unutmamalıyıq. Amma, görünən budur ki, terror gerçəkləşdirmək də adi məsələ deyilmiş. Üstəlik, Paşinyanı, yəni Cənubi Qafqazdakı anti-Rusiya bombasını Qərbin hansı xüsusi xidmət orqanlarının qoruduqları da məlumdur...
Əlqərəz, Ermənistan müxalifəti həm Nikola qarşı gerçək qüvvəyə çevrilməkdə, həm də terror gerçəkləşdirməkdə acizdir. Təbii ki, ikinci acizlik, müəyyən mənada, müsbət göstəricidir. Hərçənd, vurğuladıq ki, Paşinyana qarşı bundan sonra terrorun olmayacağını söyləmək də mümkünsüzdür. Bəlkə, baş nazir canından qorxduğu üçün Azərbaycanla ziddiyyətlərə son qoymaq, sülh müqaviləsi bağlamaq istəmir? Bu da ola bilər.
Hələlik isə Ermənistan müxalifətinin hazırkı durumuna diqqət yetirək. Diqqət yetirək və müəyyənləşdirək ki, onun iqtidarı dəyişmək şansı varmı və bu, nə dərəcədə realdır. Hər halda məsələnin, tam olmasa da, Azərbaycan üçün də əhəmiyyəti var. Buna görə də, erməni politoloq Sergey Melkonyanın ölkədə Paşinyana qarşı çıxan əks qütbün mahiyyəti, real şansları, durumu ilə bağlı fikirləri maraq doğurmaqdadır.
Melkonyan özünün Telegram kanalında müxalifətin 2022-ci ilin yaz-yay aylarında uzunmüddətli kütləvi etiraz aksiyaları təşkil etməsindən ötən müddətin incəliklərinə diqqət yetirərək, Ermənistandakı əks qütbün hazırkı vəziyyətinə nəzər salıb. Politoloq bildirib ki, doğrudur, erməni müxalifətinin etirazları Azərbaycanla sülh müqaviləsinin imzalanmasını təxirə salmağa şərait yaradıb. Yəni, erməni hakimiyyəti daxili təzyiqlərə görə, Bakı qarşısında, müəyyən qədər dirəniş göstərə bilib. Amma, Melkonyanın fikrincə, əks cinah ötən bir ildə, böyük ölçüdə, heç nə etməyib. 2018-ci ildə olduğu kimi, hələ də xilaskar axtarışındadır, tənqid xatirinə tənqidlə məşğuldur. Tənqidçilər isə bundan sonra da heç nə etməyəcəklər.
Qeyd edək ki, S.Melkonyan fikrini əsaslandırmaq üçün bir neçə məqamın üzərində də dayanır. Bildirir ki, qarşıdan İrəvan merinin seçimi gəlir. Faktiki olaraq, ölkə rəsmiləri seçkinin tarixini dəyişdirmək istəyirlər. Müxalifət isə heç kimin namizədliyini irəli sürməyib. Hələlik, yalnız Avinyan var ki, onu da hakimiyyət sıxışdırmaqdadır. Üstəlik, iqtidarın və müxalifətin əleyhdarları olan kəsim də heç kəsin namizədliyi üzərində dayanmır, daha doğrusu, dayanmağı bacarmır. Çünki belə bir şəxs yoxdur. Ermənistan siyasətində artıq üç ildir haqqında yazılan “üçüncü qüvvə” tapılmır ki, tapılmır. Mövcud durumda iqtidar daha güclü tərəf kimi görünür.
Politoloq Melkonyanın fikrini əsaslandırmaq üçün üzərində dayandığı ikinci məqam Ermənistan hakimiyyətinin Azərbaycanla sülh müqaviləsi imzalamağa hazır olmasıdır. O bildirir ki, müxalifət buna qarşı ötənilki kimi etiraz aksiyaları keçirmir. Eyni zamanda, əks cinahı fəaliyyətsizlikdə ittiham edənlər də hər hansı aktivlik göstərmirlər. Melkonyanın fikrincə, hər iki cinahı birləşdirən vahid xüsusiyyət budur ki, onlar Azərbaycanla sülh müqaviləsinin ikinci kapitulyasiya aktı olduğunu gözəl anlayırlar və buna doğru gedirlər.
Erməni politoloq ölkə daxilindəki, belə demək mümkünsə, köhnə müxalifətin gedəcəyi təqdirdə yeni müxalifətin gələcəyinə dair iddialara da münasibət bildirib. O, konkret olaraq, üçüncü qüvvə kimi qəbul oluna biləcək şəxslərin mövcudsuzluğunu vurğulayıb. Belə bir durumda isə müxalifət artıq bir ilə yaxındır ki, istənilən adama liderlik etməyə hazırdır. Eyni zamanda, istənilən adamın da heç nədən liderə çevrilməsi kimi qorxulu tendensiya var. Bu mənada sahə tamamilə azaddır. “Ancaq nədənsə heç kim ön planda görünmür”, – deyə Melkonyan vurğulayıb.
Nəhayət, politoloq Ermənistanın siyasi arenasındakı iflic durumu şərtləndirən ən mühüm cəhətə diqqət yetirib. Melkonyanın fikirlərindən anlaşılan budur ki, ölkənin hazırkı müxalifəti özünün fəaliyyət dəst-xətti ilə, faktiki olaraq, yeni qüvvələrin formalaşmasına maneçilik törədir, nəticə etibarilə, hakimiyyətin maraq və mənafelərinin qorunmasında iştirakçıya çevrilir. Politoloq, bu mənada, üçüncü qüvvə olmağa iddialı ola biləcək şəxslərin də hazırkı müxalifət tərəfindən sərt tənqidə məruz qalacağı, sıradan çıxarılacağı ehtimalı üzərinə gəlməyi də yaddan çıxarmır.
Ə.CAHANGİROĞLU, “Xalq qəzeti”