Birləşmiş Millətlər Təşkilatının (BMT) katibliyi Qərbi Azərbaycan İcmasının (QAİ) Qayıdış Konsepsiyasını BMT Təhlükəsizlik Şurasının, Baş Assambleyasının və İqtisadi və Sosial Şurasının rəsmi sənədi kimi yayıb. Bu, İcmanın BMT sənədi kimi yayılmış ikinci sənədidir. İlk sənədin yayılması isə bu il martın əvvəlinə təsadüf etmişdi. Qısa müddətdə mövcud istiqamətdə belə uğurların əldə edilməsi son dərəcə qürurvericidir. Şübhəsiz, bu, eyni zamanda aparılmış ardıcıl və məqsədyönlü fəaliyyətin effektiv nəticəsidir.
Fəaliyyətin əsası isə ötən il dekabrın 24-də qoyulmuşdu. Həmin gün, yəni özünün doğum günündə Azərbaycan Prezidenti İlham Əliyev Qərbi Azərbaycan İcmasının inzibati binasında yaradılan şəraitlə tanış olmuş və Qərbi Azərbaycandan olan bir qrup ziyalı ilə görüşmüşdü.
Dövlətimizin başçısı görüş zamanı çıxış edərək bildirmişdi: “Qərbi Azərbaycan bizim tarixi torpağımızdır, bunu bir çox tarixi sənədlər təsdiqləyir, tarixi xəritələr təsdiqləyir, bizim tariximiz təsdiqləyir. Ancaq əfsuslar olsun ki, ermənilər Qarabağdakı kimi, Qərbi Azərbaycanda da bizim bütün tarixi, dini abidələrimizi yerlə-yeksan ediblər, dağıdıblar, azərbaycanlıların tarixi irsini silmək istəyiblər, ancaq buna nail ola bilməyiblər. Çünki tarix var, sənədlər var, xəritələr var. Bu binada nümayiş etdirilən, XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin. Artıq bu istiqamətdə işlər başlamışdır. Ancaq, əminəm ki, icma bu işləri daha məqsədyönlü şəkildə və nəticəyə hesablanmış tərzdə aparacaqdır”.
Bəli, Prezidentin vurğuladığı tərzdə kifayət qədər məqsədyönlü işlər aparılıb və bildirdiyimiz kimi, Qərbi Azərbaycan İcmasının Qayıdış Konsepsiyasının BMT sənədi kimi artıq ikinci dəfə rəsmiləşməsi konkret nəticədir. Qeyd edək ki, indiki Ermənistan ərazisindən qovulmuş Azərbaycanlıların sülh yolu ilə, təhlükəsiz və ləyaqətli şəkildə geri qayıtma hüququnun təmin edilməsi, qayıdışdan sonra onların fərdi və kollektiv hüquqlarının, o cümlədən, mülkiyyət hüquqlarının, mədəni-tarixi irsinin bərpası və qorunması məsələlərini əhatə edən Qayıdış Konsepsiyası BMT-nin bütün rəsmi dillərində (ingilis, fransız, rus, çin, ərəb və ispan), adı çəkilən əsas orqanların gündəliyinin silahlı münaqişələrin qarşısının alınması, sülh quruculuğu, qaçqınların hüquqlarının qorunması, irqi ayrı-seçkiliyin aradan qaldırılması, insan hüquqlarının təşviq olunması, soyqırımının, etnik təmizləmənin və insanlığa qarşı cinayətlərin qarşısının alınmasına dair bəndləri altında yayılıb.
Bütün bunlar isə gələcək üçün kifayət qədər tutarlı istinadgahlardır, hüquqi mahiyyət daşıyan rıçaqlardır. Onu da vurğulamaq lazımdır ki, bu konsepsiyanın BMT-də rəsmi sənəd kimi yayılması Ermənistan hökumətinin Qərbi Azərbaycan mövzusunu təhrif etməsi imkanlarını daha da azaldır. Nəticə etibarilə, bu, İrəvanın İcma ilə danışıqlara başlamasına çağırışdır. Deməli, mövcud istiqamətdə beynəlxalq prosesin başlanması da mümkündür.
Bütün bunların yaşanması isə həm də fədakar əməyin məhsuludur. Yeri gəlmişkən, Prezident İlham Əliyev icma nümayəndələri ilə görüşündə də məhz bu barədə söz açmış və bildirmişdi ki, xalqımız əsrlər boyu öz hüquqlarını qorumaq üçün, tarixi torpaqlarında yaşamaq üçün böyük fədakarlıq göstərmişdir: “Ancaq buna baxmayaraq, tarixin müxtəlif vaxtlarında bizim xalqımız öz doğma torpaqlarından məhrum edilmişdir. XX əsr bu baxımdan xalqımız üçün çox böyük faciələr gətirmişdir. 1918-ci ildə təzə yaradılmış Azərbaycan Xalq Cümhuriyyəti özünün ilk qərarlarından birində bizim tarixi şəhərimizi – İrəvanı Ermənistana faktiki olaraq bağışlamışdır. Bu, bağışlanmaz bir addım idi, bu, xəyanət idi və cinayət idi. Bunu biz hamımız yaxşı bilirik, xalqımız da bunu bilməlidir. Biz heç vaxt tariximizi təhrif etməməliyik”.
Dövlətimizin başçısının diqqətə çatdırdığımız fikirlərinə əsasən deyə bilərik ki, Qərbi Azərbaycana Qayıdış Konsepsiyasının BMT-nin sənədi kimi növbəti dəfə yayılması, eyni zamanda, tarixi ədalətin bərpası istiqamətindəki mühüm addımlardan biridir. Nəzərə alaq ki, Konsepsiyanın qurumun ən mötəbər orqanlarının gündəliyində yer alması azərbaycanlıların öz evlərinə qayıtmasının, təməl insan hüquqlarının qorunmasının, beynəlxalq sülhün, təhlükəsizliyin və əməkdaşlığın zəruriliyinin beynəlxalq müstəvidəki təsdiqidir.
Qeyd edək ki, bu ilin yanvar ayında Qərbi Azərbaycan İcmasının beynəlxalq ictimaiyyətə müraciəti yayılmışdı. Yanvarın 26-da Qayıdış Konsepsiyası qəbul edilmişdi və həmin sənəddə indiki Ermənistan ərazisindən zorla çıxarılmış azərbaycanlıların geriyə qayıtması üçün QAİ-nin həyata keçirəcəyi fəaliyyətin məqsədləri, prinsipləri, hazırlıq və icra tədbirləri üçün ümumi çərçivə müəyyənləşdirilmişdi.
Onu da bildirək ki, konsepsiya beynəlxalq hüquqa, aidiyyəti dövlətdaxili hüquqa, tarixi faktlara əsaslanır, ədalətin və sülhün bərqərar olunmasına xidmət edir. Dövlətimizin başçısı QAİ təmsilçiləri ilə görüşündə də bu məqama toxunmuşdu. “Bununla bərabər, hesab edirəm ki, İcmanın bundan az əhəmiyyət kəsb etməyən beynəlxalq müstəvidə fəaliyyəti olmalıdır. Çünki biz bu həqiqətləri dünya ictimaiyyətinin diqqətinə çatdırmalıyıq, necə ki, Qarabağ həqiqətlərini çatdırmışdıq”, – deyə Prezident İlham Əliyev vurğulamışdı.
Əlbəttə, Qarabağdakı erməni vəhşiliyini beynəlxalq ictimaiyyətin diqqətinə çatdırdığımız kimi, bu vəhşiliyin Qərbi Azərbaycandakı təzahür formalarını da yüksək səslə bəyan etməyi bacarmalıyıq. Mövcud fəaliyyət azərbaycanlıların timsalında yalnız bir xalqın pozulmuş hüquqlarının bərpasına yönələn iş deyil. Bu fəaliyyət, eyni zamanda, dünya üçün də presedentdir. Axı dünyada da öz doğma yurd-yuvalarından, ata-baba məskənlərindən zorla qovulmuş xalqlar var. Belə qeyri-insanı halların mövcudluğu isə bütövlükdə bəşəriyyət üçün təhdiddir. Deməli, bununla bağlı beynəlxalq birlikdə ciddi müqavimət hissi olmalı, humanizmdən uzaq təmayüllərə münasibətdə mənəvi immunitet formalaşmalıdır. Əslində QAİ-nin apardığı təbliğatın, gördüyü işlərin motivində həm də bu amil dayanır.
Ermənistan daxilində də QAİ-nin apardığı beynəlxalq miqyaslı fəaliyyətdən söz açılır və əndişə duyulur. Haylar azərbaycanlıların qayıdış ideyasını, bir növ, süngü ilə qarşılayır. Əslində Azərbaycan Prezidenti də dekabrın 24-dəki görüş zamanı çıxış edərkən Qərbi azərbaycanlıların qanunsuz olaraq dəfələrlə deportasiyaya məruz qaldıqlarını, onların hüquqlarının bərpasının vacibliyini vurğulamaqla yanaşı, erməni siyasi rəhbərliyindəki ehtimal olunan psixozla əlaqədar da proqnozunu vermişdi: “Mən bunu deyəndə təxmin edirəm, yenə də Ermənistanda növbəti dəfə isterika başlayacaq ki, Azərbaycan gəldi bizi işğal etdi və sair. Yox. Biz bunu sülh yolu ilə etmək istəyirik. Biz hüquqlarımızı sülh yolu ilə təmin etmək istəyirik və yenə də deyirəm, bütün konvensiyalar bu hüququ tanıyır. Ona görə buna nail olmaq üçün biz, o cümlədən beynəlxalq müstəvidə daha fəal olmalıyıq”.
Bəli, QAİ bundan sonra da fəal olmalı, başladığı yüksək səviyyəli işin davamında israrlı olmalıdır. Göründüyü kimi, qurumun fəaliyyəti artıq öz bəhrəsini verməkdədir və bundan sonra da verəcəkdir.
R.AMİN