Ermənilərin Xəlfəli–Turşsu yolundakı təxribatının ardınca, həmin istiqamətdə ermənilərə məxsus hərbi kolonun hərəkəti müşahidə edilib. Bununla bağlı mediada yer alan görüntülərdə hərbi kolonun Rusiya sülhməramlıları tərəfindən müşayiət edildiyi aydın şəkildə öz əksini tapıb. 5 mart hadisəsindən sonra qanunsuz yük daşımalarını davam etdirməsi rəsmi İrəvanın təxribat siyasətindən əl çəkmədiyini göstərir. Paşinyan hökumətinin ölkəmizə qarşı terror və təxribatçılıq siyasətini genişləndirməsi, dövlətimizin ərazi bütövlüyü və təhlükəsizliyi üçün təhdid mənbəyi olaraq qalması Azərbaycanı hərbi müstəvidə sərt addımlar atmaq zərurəti ilə üz-üzə qoyur.
Anti-terror əməliyyatının 5 əsas səbəbi
Azərbaycanın sülhə gəlməyən Ermənistana qarşı yeni anti-terror əməliyyatı həyata keçirməsini zəruri edən 5 əsas səbəb var. Bunlardan biri İrəvanın rəsmi şəkildə üzərinə götürdüyü 10 noyabr Bəyanatının şərtlərini yerinə yetirməməsidir. Sözügedən bəyanatda erməni silahlılarının Azərbaycan torpaqlarını tərk etməsi, tərəflər arasında sülh müqaviləsinin imzalanması nəzərdə tutulur. Rəsmi İrəvan iki ildən çoxdur ki, bu öhdəliklərə əməl etmir, sazişi də heçə sayır.
Anti-terror əməliyyatını zəruri edən ikinci səbəb Ermənistanın bu gün də ölkəmizə qarşı mina terrorunu davam etdirməsidir.
Torpaqlarımızda 2021-ci il istehsalı olan minaların aşkarlanması, erməni separatizminin müharibədən sonra da mina terrorunu davam etdirdiyini göstərir. Azərbaycan tərəfinin bu təxribatı dayandırmaqla bağlı çoxsaylı çağırışlarına məhəl qoymayan İrəvan bununla post-müharibə reallığını dəyişdirməyə, təmas xəttində təşəbbüsü ələ almağa çalışır.
Yeni hərbi əməliyyatları vacib edən üçüncü amil Ermənistan tərəfinin mütəmadi şəkildə ordumuzun mövqelərini atəşə tutması, bölgədəki kövrək sabitliyi vaxtaşırı pozmasıdır. Bu yolla Azərbaycanı təxribata çəkməyə çalışan İrəvan beynəlxalq platformadakı havadarlarının vasitəsilə yeni reallıq yaradacağına inanır.
Azərbaycanı anti-terror əməliyyatlarına təhrik edən dördüncü amil Rusiya sülhməramlıları və Avropa İttifaqının missiyasının uğursuz fəaliyyəti ilə bağlıdır. Üstəlik, baş verənlərin mahiyyətini təhrif edən məlumatlar yayırlar ki, bu da Azərbaycanın proseslərə bilavasitə və qəti müdaxiləsini zəruri edir.
Beşinci amil erməni təxribatlarının sadəcə hərbi müstəvidə deyil, siyasi-diplomatik, informasiya və digər platformalarda da davam etməsi, hibrid müharibə formasını almasıdır. Ölkəmizin bütün platformalarda təxribatlara cəlb edilməsi problemin biryolluq və prinsipial həllini aktuallaşdırır ki, bu da “dəmir yumruğun” yenidən hərəkətə keçməsi ilə mümkündür.
30 ildə bacarmadığını 3 ildə etmək istəyir
Ermənistanın açıq terror və təxribat siyasəti onun Azərbaycanı yeni hərbi qarşıdurmaya cəlb etməkdə maraqlı olduğunu göstərir. 2020-ci il 10 noyabr Bəyanatının yerinə yetirilməməsi, ordumuzun mövqelərinin tez-tez atəşə tutulması, mina terrorunun davam etdirilməsi və s. bunu göstərir. Maraqlıdır, İrəvan 30 illik hazırlıq mərhələsindən sonra bacarmadığı işi 3 illik hazırlıqdan sonra görəcəyinə ümid edir. Hansı məntiqlə?
Vətən müharibəsində Ermənistan Azərbaycana qarşı bütün havadarlarının gücündən istifadə edirdi. Ancaq Ermənistanın sahib olduğu üstünlüklərin heç biri onun qələbəsini təmin etmədi. Əksinə, Azərbaycan 44 gün ərzində ildırımsürətli müharibə taktikası ortaya qoymaqla sübut etdi ki, onu heç bir güc dayandırmaq qüdrətinə malik deyil. Belə olan halda, Ermənistanın 3 ilə yaxın hazırlıqdan sonra Azərbaycana diş qıcaması, buynuz göstərməsi intihar qərarından başqa bir şey deyil.
Deyəsən, İrəvanın yürütdüyü terror siyasəti bölgədə yeni hərbi qarşıdurmanı qaçılmaz edəcək. Yuxarıda qeyd etdiyimiz kimi, bu qarşıdurma nəticəsində Ermənistanda hərbi qəbiristanlıqların sayının sürətlə artacağı şəksizdir. Bu isə Ermənistanın indiki hakimiyyətinin öz xalqına, onun bugününə və gələcəyinə verə biləcəyi “ən böyük töhfəsi” olacaq.
Seymur ƏLİYEV, “Xalq qəzeti”