Biz müharibə istəmirik, heç vaxt istəməmişik. Amma biz istəyirik ki, maraqlarımız təmin olunsun. Biz istəyirik ki, müharibə nəticəsində yaradılmış reallıqlar hamı tərəfindən qəbul edilsin. Ermənistan da bu reallığı qəbul etməlidir. Bu müharibəni unutmasınlar – nə onlar, nə də ki, onların sonrakı nəsilləri.
İlham ƏLİYEV,
Azərbaycan Respublikasının Prezidenti
Qədim türk məsəllərindən birində deyilir ki, dost min olsa da, az, düşmən bir olsa da, çoxdur. Bu, sözgəlişi deyilməyib. Bu, həm də ölkənin və ordunun taleyinə cavabdeh olan kəslərə hər an sərvaxt olmaq barədə göndərilən xəbərdarlıqdır. Çünki heç kəs düşmənin nə zaman, harada peyda olacağını bilmir. Biz son onillərdə dəfələrlə bunun şahidi olmuşuq.
Torpaqlarımızda dövlət yaratmış, yetmiş il çörək verdiyimiz ermənilərin nə zaman, harada düşmənçilik edəcəyini təxmin etsək də, can verməkdə olan Ermənistana silah-sursat, yanacaq, ərzaq və hətta canlı qüvvə göndərən qonşumuzun nə zaman düşmənçilik edəcəyini bilmək çətin idi. Ona görə də qarşıda duran ilk vəzifə ordunun maddi-texniki bazasının möhkəmləndirilməsi, şəxsi heyətin peşəkarlığının artırılması və silahlı qüvvələrin idarə edilməsinin müasirləşdirilməsidir.
Qətiyyətlə deyə bilərik ki, bu vəzifələr Prezident İlham Əliyevin gündəlik fəaliyyətində özünəməxsus yer tutur. Elə bir gün olmur ki, ordu quruculuğu ilə bağlı hansısa xəbəri eşitməyək. Üstəlik, dövlət başçımız hər il həm Silahlı Qüvvələr Günündə, həm də özünün ad günündə mütləq hansısa hərbi hissəyə gedir, həmin günü əsgər və zabitlərlə birlikdə keçirir.
Fevralın 23-də ölkənin kütləvi informasiya vasitələri xəbər verdilər ki, Azərbaycan Respublikası Müdafiə nazirinin təsdiq etdiyi 2023-cü ilin döyüş hazırlığı planına əsasən, Hərbi Hava Qüvvələrinin helikopter bölmələri ilə təlim-məşq uçuşları həyata keçirilib. Plana uyğun olaraq, helikopterlər aerodromlardan müəyyən edilmiş marşrutlar üzrə uçuşlar edib. Əlavə edilir ki, helikopter heyətlərinin döyüş vərdişlərinin təkmilləşdirilməsi məqsədi ilə keçirilən məşqlərdə qarşıya qoyulan tapşırıqlar müvəffəqiyyətlə yerinə yetirilib.
Bu təlimlərdə məqsəd təkcə hərb-çilərimizin peşəkarlığının artırılması deyil. Burada sırf siyasi məqsədlər də var. Biz istəyirik ki, xaricdəki havadarlarının fitnə-fəsadlarına uyaraq, revanş barədə düşünən işğalçı dövlətin terrorçu, təxribatçı siyasətçiləri anlasınlar ki, Azərbaycan güclü dövlətdir, Azərbaycanın güclü ordusu var, Azərbaycan əsgəri, zabiti dövlətimizi qorumaq üçün canını fəda etməyə hazırdır. Necə ki, İkinci Qarabağ müharibəsində canlarını fəda etdilər.
Başqa bir fakt. İki gün əvvəl Müdafiə Nazirliyinin elektron resurslarında oxuduq ki, ölkəmizdə rəsmi səfərdə olan Gürcüstanın nümayəndə heyəti Azərbaycan Xüsusi Təyinatlı Qüvvələrin və Hərbi Dəniz Qüvvələrinin hərbi hissələrini ziyarət edib. Dost ölkə təmsilçilərinə xüsusi təyinatlıların hazırlıq prosesi haqqında ətraflı məlumat verilib, qonaqları maraqlandıran suallar cavablandırılıb. Daha sonra nümayəndə heyəti dəniz xüsusi təyinatlılarının nümayiş məşğələlərini izləyib. Qonaqlara dəniz piyadalarının və xüsusi təyinatlıların istifadəsində olan müasir silahlar, döyüş və nəqliyyat vasitələri təqdim edilib. Məqsəd dostu sevindirmək, düşmənə xəbərdarlıq etmək idi. Necə ki, etdik...
Ulu öndər Heydər Əliyevin fikrincə, ordunun gücünün artırılması üçün maddi-texniki bazanın möhkəmləndirilməsi və şəxsi heyətin peşəkarlığının yüksəldilməsi ilə yanaşı, beynəlxalq aləmlə əməkdaşlıq, güclü orduya malik dövlətlərin hərbi təcrübələrinin öyrənilməsi də mühüm şərtlər sırasındadır. Fəxrlə deyə bilərik ki, silahlı qüvvələrimizin bu istiqamətdəki fəaliyyəti də qalib ordunun adına layiqdir.
Bildirək ki, ikitərəfli hərbi əməkdaşlıq Azərbaycan Ordusu ilə xarici dövlətlərin silahlı qüvvələri və hərbi sənaye kompleksləri arasında aparılır və hər iki tərəfin maraqlarına xidmət edir. Hazırda Azərbaycan Ordusunun dünyanın 40-a yaxın ölkəsi ilə ikitərəfli əsasda hərbi əməkdaşlığı var. Eləcə də, Azərbaycan Respublikası ilə strateji tərəfdaşları arasında müdafiə sahəsində, xarici ölkələrin silahlı qüvvələri ilə əməkdaşlıq hədəflərinə müvafiq olaraq, yüksək səviyyədə həyata keçirilir.
Yeri gəlmişkən, 1994-cü il mayın 4-də Azərbaycan Respublikası NATO-nun“Sülh Naminə Tərəfdaşlıq” Proqramına qoşulub. Azərbaycan Respublikasının Müdafiə Nazirliyi NATO ilə əməkdaşlıq çərçivəsində SNT proqramı, Fərdi Tərəfdaşlıq üzrə Əməliyyat Planı, Planlaşdırma və Analiz Prosesi, Əməliyyat İmkanları Konsepsiyası, Tərəfdaşlığın Qərargah Vəzifələri, Müdafiə Təhsilinin Genişləndirilməsi Proqramı, Sülh Naminə Elm Proqramı və NATO-nun digər əhəmiyyətli tərəfdaşlıq mexanizmlərindən səmərəli şəkildə istifadə edir. Bütün bunlar isə Azərbaycan Ordusunun daha da müasirləşdirilməsini təmin edir.
Ordu quruculuğu barədə danışarkən yada salınmalı məqamlardan biri də iki gün sonra – fevralın 27-də qeyd edəcəyimiz bir əlamətdar günün tarixçəsidir. Belə ki, 2004-cü ilin həmin günü Azərbaycan Prezidenti İlham Əliyevin sərəncamı ilə Heydər Əliyev adına Hərbi Lisey yaradılmışdır. Lisey Azərbaycan xalqının ümummilli lideri Heydər Əliyevin xatirəsini əbədiləşdirmək, Azərbaycan Respublikasının Silahlı Qüvvələri üçün hərbi kadr hazırlığı sistemini təkmilləşdirmək və Milli Ordunun peşəkar kadrlara olan tələbatının ödənilməsi işini yaxşılaşdırmaq məqsədilə təsis edilmişdir. Ekspertlər xatırladırlar ki, 44 günlük İkinci Qarabağ müharibəsindəki şanlı Qələbəmizdə bu liseyin məzunlarının da xüsusi rolu olmuşdur.
Biz isə xatırladırıq ki, Prezident İlham Əliyev Azərbaycan Ordusunun arsenalının müasirləşdirilməsini daim diqqət mərkəzində saxlayır və deyir: “Biz ordu quruculuğu sahəsində öz işlərimizi davam etdiririk. Bizim artan iqtisadi və maliyyə imkanlarımızın bir hissəsi məhz bu məsələlərə istiqamətləndirilib. Büdcəyə əlavələr edildi, dürüstləşmə aparıldı və orada hərbi xərclər əhəmiyyətli dərəcədə artırıldı... Çünki biz görürük ki, yeni imzalanmış kontraktlara ehtiyac var. Ən müasir hərbi texnika və silahların alınması üçün bu il dürüstləşmə zamanı hərbi xərclərimiz artıb. Nə qədər lazımdırsa, o qədər də artıracağıq. Çünki biz müharibə nədir, işğal nədir yaxşı bilirik və təhlükə nədir onu da yaxşı bilirik. Hər an hazır olmalıyıq ki, öz hüququmuzu istənilən yolla təmin edək”.
İttifaq MİRZƏBƏYLİ, “Xalq qəzeti”