Şəkidə aşkar edilmiş yoluxma nəzarətdə saxlanılır
Səhiyyə Nazirliyinin Şəkidə qızılca infeksiyasının yayılmasına dair yaydığı məlumatda bildirilir ki, Azərbaycanda son illər yoluxucu xəstəliklərə qarşı aparılan profilaktik tədbirlər nəticəsində qızılca və məxmərək xəstəlikləri üzrə sabit epidemioloji vəziyyət müşahidə olunur. Bununla belə, cari ilin ötən dövründə Türkiyə, Rusiya Federasiyası, İran, Qazaxıstan, Gürcüstandan gətirilmə sporadik yoluxma halları müşahidə edilib. Təxirəsalınmaz profilaktik tədbirlər nəticəsində yoluxmanın geniş yayılmasının qarşısı vaxtında alınıb.
Məlumata görə, Şəki Şəhər İnteqrasiya Təlimli İnternat Tipli Gimnaziyanın şagirdləri arasında ötən ayın sonlarından başlayaraq, qızılca infeksiyasına yoluxma halları baş verib. Belə ki, gimnaziyanın 22 sinfindən 18-də tək-tək yoluxma halları müşahidə olunub. Araşdırmalar nəticəsində məlum olub ki, bu hallar, əsasən, qızılcaya qarşı peyvənd olunmayan uşaqlar arasında baş verib.
Xəstəlik aşkarlanan uşaqlar izolyasiya edilib, onlardan laborator müayinə üçün nümunələr götürülüb. Alınan nəticələrə əsasən, uşaqlara xəstəxana şəraitində tibbi yardım göstərilib. Amma gimnaziya fəaliyyətini dayandırmayıb. Dərslər xəstələrlə sıx təmasda olan digər uşaqlara gündəlik həkim baxışı və hərarət ölçülməsi həyata keçirilməklə davam edir.
Hazırda gimnaziyada epidemioloji vəziyyət ciddi nəzarət altındadır. Son yoluxma hadisəsi oktyabrın 6-da qeyd edilib. Bu tarixdən etibarən xəstəliyin inkubasiya dövrü tamamlanana qədər (21 gün) ocaqda nəzarət işləri davam etdiriləcək.
Qeyd edək ki, bu ilin fevral ayında da poliklinikalara qızılca xəstəliyi ilə bağlı çoxlu müraciət olmuşdu. Həmin müraciətlərdə də xəstəliyə yoluxanların sırf vaksin almayanlar olduğu aşkarlanmışdı.
Pediatr Vaqif Qarayev qızılca xəstəliyi, peyvəndin vacibliyi, həmçinin Azərbaycanda bununla bağlı vəziyyət barədə sorğumuza münasibət bildirdi:
– Qızılca infeksion xəstəlik olaraq, adətən, uşaqlar arasında yayılır. Amma peyvənd almayan böyük yaşlı insanlar da hər hansı yaşda qızılcaya yoluxa bilirlər. Pandemiyadan öncə qızılca bizdə də geniş yayılmışdı. Yoluxmanın artması, xəstəliyə qarşı peyvənd vurdurmamaqla bağlıdır. Hətta bir müddət əvvəl ÜST həyəcan təbili çalırdı ki, uşaqları peyvənd olunmayan ölkələrdə qızılcanın epidemiyası müşahidə edilir.
Bütün yoluxucu xəstəliklər kimi, qızılca da uşaqlara, eləcə də böyüklərə hava-damcı yolu ilə keçir. Əlamətləri mərhələlərlə gedir. İlkin mərhələ üç-dörd gün çəkir. Hərarət 37,5–38 dərəcə olur. Burun axır, öskürək başlayır, gözlər qızarır, konyuktivit əlamətləri müşahidə edilir. Sonrakı üç gündə səpki dövrü başlayır. Öncə üzdə, qulağın arxasında, sonrakı gün bədəndə, üçüncü gün əllərdə və ayaqlarda qırmızı ləkəli səpkilər müşahidə edilir. Qızılca xəstəliyində ağırlaşma olmasa, sonrakı üç-dörd gündə səpkilər sönməyə doğru gedir və uşağın vəziyyəti yaxşılaşır. Amma müalicə qaydasına düzgün əməl edilməyəndə xəstəlik ağır formaya keçir. Xəstəliyin ən qorxulu ağırlaşması uşaqda qızılca pnevmoniyası, bir də ensefalitin (baş beyininin zədələnməsi) baş verməsidir.
Qızılca, məxmərək, epidemik parotit kimi yoluxucu xəstəliklərdən qorunmaq üçün yeganə üsul peyvənd vurdurmaqdır. Ümumiyyətlə, bütün yoluxucu xəstəliklərdən qorunmağın düzgün yolu vaksinasiyadır. Təəssüf ki, bizdə son vaxtlar peyvəndə qarşı əks münasibət yaranıb. Heç bir əsası olmadığı halda, cəmiyyətdə “peyvənd ağırlaşma verir”, “peyvənddən sonra qolu tutuldu, ayağı tutldu” – kimi əsassız fikirlər səslənir. Əslində, düzgün yol uşağın vaxtında peyvənd olunmasıdır. Peyvənd təqviminə uyğun olaraq uşaqlar iki dəfə – 1 yaşında və 6 yaşında qızılca əleyhinə vaksin almalıdırlar.
Pediatr açıqlamasının sonunda dedi: “Buna görə də övladının sağlamlığını düşünən hər kəs Səhiyyə Nazirliyinin yaydığı məlumata biganə qalmamalıdır. Çünki qurum belə halların qarşısının alınması məqsədilə bir daha vaksinasiyanın vacibliyini vurğulayır və hər hansı səbəbdən peyvənddən kənarda qalan uşaqların yaşayış yeri üzrə uşaq əhalisinə ambulator-poliklinik xidmət göstərən tibb müəssisələrində qızılca, epidemik parotit və məxmərək infeksiyaları əleyhinə peyvənd edilməsini tövsiyə edir”.
Zərifə BƏŞİRQIZI
XQ
