Xocalı soyqırımı XX əsrin ən böyük insan qətliamlarından biri, müasir dünyanın gözü qarşısında baş vermiş bəşəriyyətin utanc nöqtəsi – ... 1992-ci ilin 26 fevralında Xocalı şəhərində Ermənistanın quldur hərbi birləşmələri və keçmiş SSRİ-nin 366-cı motoatıcı alayının dinc azərbaycanlılara qarşı kütləvi qətliam törətməsi illər keçsə də, unudulmur. Soyqırımı dəhşətlərini gözləri ilə görən, günlərlə ac-susuz girovluqda qalan, ailə üzvləri qətliama uğrayan Mürvət Məmmədov da yarası qaysaq bağlamayan vətəndaşlarımızdandır. Hər il təqvim üzrə həmin gün gəlib çatanda varından yox olur, o acıları ikiqat yaşayır.
Unudulmaz Xalq şairimiz Zəlimxan Yaqubun belə misraları var:
Sizi qınamıram ay Xocalılar,
Sizin başınızda şimşək oynadı,
Sizin başınızda dumanlar oldu.
Millətin dağ boyda fəlakətinə,
Gözünün ucuyla dönüb baxmayan,
Nazlanıb gözünü yumanlar oldu!
Bəli, o dövrün siyasi çəkişmələri, dünyanın susqunluğu da bir yandan yandırdı Xocalıda faşizmlə üz-üzə qalanları.
Mürvət Məmmədovun ailəsi sözün bütün mənalarında böyük məşəqqət çəkmişdir. O, Xocalı faciəsi zamanı atasını, üç qardaşını itirib, bir qardaşı yaralanıb, ailəlikcə əsir düşüblər və sonradan erməni əsir və meyitləri ilə dəyişdiriliblər. Bu ailə əslən Göyçə mahalındandır. 1988-ciildə Ermənistandan azərbaycanlıların deportasiyası başlananda Xocalıya pənah gətirmişdilər. Lakin nə biləydilər ki, cəmi 3-4 ildən sonra onları daha dəhşətli fəlakət yaxalayacaq.
Ona görə də Mürvət iki dəfə qaçqınlıq taleyi yaşadığını, üstəlik olmazın zillətlər gördüyünü yana-yana söyləyir. Məmmədovlar ailəsi hələ Göyçədən qaçqın düşərkən ailənin böyük oğlu Sərvərin faciəsi ilə üzləşiblər: o, qaçhaqaçda erməni gülləsinə tuş gəlib. Sonra birtəhər gəlib Xocalıya yerləşiblər. Mürvət deyir:
– Xocalı 1990-cı ildən blokada şəraitindəydi. Şəhərə giriş-çıxış yox idi. Sonuncu dəfə ora vertolyot dekabr ayında gəldi. Ermənilər qazımızı, işığımızı kəsdilər. Lakin biz dözüb orada qalırdıq. Fevralın 25-dən 26-na keçən gecə vəhşilər Xocalıya hücuma keçdilər. Əslində, hər gün bizi atəşə tuturdular. Lakin dinc sakinlərə bu qədər amansız, bu qədər misilsiz divan tutacaqlarına inanmırdıq. Keçmiş SSRİ-nin 366-cı alayı da onlarla birgə üstümüzə gəldi. Sonuncu gün böyük qardaşlarım və atam digər mərd xocalılılarla birgə postları qoruyurdular. Bir də gördüm ki, qardaşım həyəcanla gələrək ermənilərin yaxınlıqda olduğunu, artıq şəhərə girdiyini bildirdi. Bizim silahlarımız adi ov tüfəngləri idi və bu tüfənglərlə son gülləmizə qədər atışdıq. Şəhər sakinlərinin böyük əksəriyyətinin heç bir silahı yox idi, əliyalın qalmışdılar.
Xatrlayıram ki, ermənilər evimizi mühasirəyə aldılar və evə əl qumbarası atdılar. Qumbaranın qəlpəsinin biri ayağımı yaraladı. Digər qəlpə isə anamın kürəyinə dəymişdi. Qaçmaq imkanımız da olmadı. Hamımızı bir otağa yığdılar ki, bizi yandırsınlar. Üç yaşlı qardaşım var idi, çox çətin danışırdı. Amma Xocalı faciəsindən sonra dil açdı. O, erməni-rus zabitlərinə yaxınlaşaraq: “Noolar, məni yandırmayın, məni yandırmayın,” – deyib ağlayırdı. Sonra bizi döyə-döyə “Təcili yardım” maşınına doldurub Əsgərana gətirdilər. Xocalıda ən çox itki Qara qaya deyilən yerdə oldu. İndi ora “Qanlı qaya” deyirik.
Müsahibimiz qeyd edir ki, Xocalıda az sayda özünümüdafiə dəstəsinin üzvü var idi. Milli Qəhrəman Əlif Hacıyev aeroportun rəisi idi. Ondan əlavə, Bakıdan 21 nəfər köməyə gəlmişdi. Onların da çoxu Əlif Hacıyev kimi qəhrəmanlıq göstərərək şəhid oldu. Tofiq Hüseynov var idi, Xocalı könüllü batalyonunun komandiri, ona “Mixaylo” ləqəbini vermişdilər. Çox cəsur adam idi. Hamısı bugünkü kimi gözümün qabağındadır. Hər tərəfdən mühasirədə qalmışdıq. Allah şəhidlərimizə rəhmət eləsin. Tofiq Hüseynov nə qədər dinc sakini xilas etmişdi, sonda görür ki, ələ keçəcək, meşənin sıx yerinə qaçaraq erməni silahlılarını aparır, qumbaranı özünə sıxaraq həlak olur. Yanındakı düşmən əsgərlərini də məhv edir. Ölümündən sonra Milli Qəhrəman adına layiq görülür.
– Bəs, necə oldu ki, əsirlikdən xilas oldunuz? – deyə soruşuram.
Özünü saxlaya bilmir, göz yaşları içində “Allahverdi” deyir. Sonra da izah edir:
– Erməni quldurları hər gün narkotikdən, içkidən istifadə edərək bizə işgəncə verirdilər. Yalandan “Ağdamı aldıq, Bakını da alacağıq” – deyir, ruhumuzu qırmağa çalışırdılar. Yadımdadır ki, hətta əsirlərimizə məcburən torpaq yedizdirir, lağlağı edərək: “Yeyin, yeyin, Qarabağ torpağımızdır, yeyin!” - deyirdilər. Sonra bir gün hamımızı bir avtobusa doldurub gətirdilər Ağdamın ərazisinə. Heç nədən xəbərimiz yox idi. Sonra öyrəndik ki, Milli Qəhrəman, mərhum Allahverdi Bağırovun sayəsində azad edilmişik. Allah ona qəni-qəni rəhmət eləsin, bizi erməni meyiti ilə dəyişdirmişdi.
Atası Məmməd Məmmədov, qardaşları Söhbət və Möhlət hələ əsir düşməmişdən öncə ermənilərə müqavimət göstərdikləri zaman öldürülmüşdülər. Əsgəranda erməni qəbiristanlığına apararaq erməni qəbirlərinin ayaq tərəfində qətlə yetirmişdilər. Mürvətgil bu dəhşətli xəbəri çox sonra, 2007-ci ildə öyrənə biliblər.
M. Məmmədov deyir ki, bu gün doğmalarının məzarlarının belə olmaması onları ikiqat yandırır.
– Üstündən 31 il keçsə də, o günləri, doğmalarımın, əzizlərimin vəhşicəsinə öldürülməsini, nakam həyatlarını düşünəndə özümə gələ bilmirəm. Barı yadigar şəkilləri də qalmayıb ki, baxıb təsəlli alaq...
Xocalı faciəsindən sonra bir müddət bütün təbliğat resurslarında ermənilərə uduzurduq. Lakin tədricən apardığımız təbliğat sayəsində mənhus soyqırımı barədə həqiqətləri, demək olar ki, bütün ölkələrdə yaya bildik. Dövlətimizin məqsədyönlü siyasəti nəticəsiz qalmadı, səfirliklərimiz, diaspor təşkilatlarımız faciənin miqyaslarını beynəlxalq ictimaiyyətə çatdırdılar. Heydər Əliyev Fondunun vitse-prezidenti Leyla xanım Əliyeva “Xocalıya ədalət!” beynəlxalq məlumatlandırma kampaniyası 2008-ci ildən bəri davam edir. 44 günlük müharibədə böyük qələbə qazanmağımız, torpaqlarımızı geri almağımız bizə böyük təsəlli oldu. Nə qədər şəhidlərimiz olsa da, sonunda qalib gəldik, düşməni diz çökdürdük. Amma uşaq yaddaşımızın bir köşəsində özünə möhkəm yer edən doğma Xocalımı bir gün görəcəyim arzusu ilə yaşayıram. Əminəm ki, bu da olacaq.
Bəli, Xocalı bizim qan yaddaşımızdır, tarixmizin unudulmaz səhifəsidir.
Anar TURAN, “Xalq qəzeti”